1 Hessa gisho, neno harata bolla pirdeyso, neeni gaasoyabay baawa. Neeni harata bolla pirdashe, he neeni pirdiya uraa mela oothiko, neeni, ne bolla pirdaasa.[a] 2 Hessa mela ooso ootheyisata bolla Xoossay xillo pirdaa pirdeysa nu eroos. 3 Neno, hessa mela ooso ootheyisata bolla pirdeyso, enti ootheysa mela ootheyso, neeni Xoossaa pirdaafe attanaba daanii? 4 Woyko Xoossaa keehatetha, gencanne danda7a darotethaa kadhayee? Xoossay new keehiday nena nagaraape zaaranaw gideysa erikiyee?

5 Shin hintew shucha wozaninne si7onna haythi de7ees. Hessa gisho, Xoossaa hanqoynne xillo pirday qonciya gallas, ne bolla pirday darana mela oothaasa. 6 Xoossay issuwas issuwas iya oosuwa mela immana.[b] 7 Lo77o ooson minnidi, galataa, bonchonne dhayonna de7uwa koyeysatas Xoossay merinaa de7uwa immana. 8 Shin bantana siiqeyisata, tumaa ixeysatanne iitabaa oothanaw koyeyisata bolla Xoossaa hanqoynne pirday yaana. 9 Iitabaa oothiya asa ubbaa, koyrottidi Ayhudeta, kaallidi Ayhude gidonna asaa metoynne waayey gakana. 10 Shin Xoossay lo77o ooso oothiya ubbaas, koyrottidi Ayhudetas, kaallidi Ayhude gidonaysatas galataa, bonchonne sarotethaa immana. 11 Xoossay som7o be7idi ase shaakenna.[c]

12 Higgey bayna nagara oothida ubbay higgey bayna dhayana. Higgey de7ishin, nagara oothida ubbay higgen pirdetana. 13 Xoossaa sinthan xilleysati higge naageysatape attishin, higge sissa xalaala si7eyisata gidokona. 14 Higgey bayna Ayhude gidonna asay medhon higgey kiitteysa oothosona. Entaw xaafetida higgey bayna ixikoka enti banta wozanan higgiya eroosona. 15 Enta hanotay, higge kiitay enta wozanan xaafetidaysa bessees. Qassi enta kahay enta bolla markatees. Enta qofay issi issi toho entana bala gees; issi issi toho entana like gees. 16 Ta tamaarsida Wongela mela Xoossay Yesuus Kiristoosa baggara asa wozanan geemmida qofaa pirdiya wode hessi eretana.

17 Shin ne nena Ayhude gaasa; higgen zempaasa; Xoossan ceeqasa. 18 Ne oothana mela Xoossay koyiyabay aybeko eraasa. Higgiya tamaarida gisho, tuma gidiyaba dooranaw eraasa. 19 Neeni qooqeta kaaletheysa, qassi dhuman de7eysatas poo7o gideysa shaaka eraasa. 20 Neeni higgiyafe demmida eratethaninne tumatethan eeyata eriseysanne yoogata tamaarseysa gideysa eraasa. 21 Yaatin, ne harata tamaarseysi ne nena ayis tamaarsikii? Neeni, “Kaysotopa” gashe, neeni ne huuphen kaysotayee? 22 Neeni, “Laammofa” gashe, neeni ne huuphen laammayee? Neeni eeqa ixashe, eeqay de7iya keethaa bonqayee? 23 Neeni Xoossaa higgiyan ceeqetasa, shin higgiyas kiitetonna ixada Xoossaa yeellayay? 24 Geeshsha Maxaafan, “Hinte gaason Xoossaa sunthay Ayhude gidonna asatan cayetees” geetetidi xaafetis.[d]

25 Ne higges kiitetiko, ne qaxaretethaas maadey de7ees, shin neeni higgiyas kiitetonna ixiko ne qaxaretethay qaxaretiboona mela gidees. 26 Ayhude gidonna asi qaxaretonna de7ishe, higgiyas kiitetiko, Xoossay iya qaxaretida mela taybennee? 27 Hinte, Ayhude asati, hintew xaafetida higgeynne qaxaroy de7ishin, hinte higges kiitetonna ixiko, Ayhude gidonna asay qaxaretonna ixikoka higges kiitetidi, hinte bolla pirdana.[e]

28 Hiza, sunthan Ayhude gidida ubbay tuma Ayhude gidenna. Qassi kare asatethaa qaxaroy tuma qaxaro gidenna. 29 Shin tuma Ayhudetethi gaatha baggan Ayhude gideysa. Tuma qaxaretethi Xoossaa Ayyaanan oosetiya wozana qaxaretethafe attishin, xaafetida higgiyan oosetiya asatethaa qaxaro gidenna. He uray galataa Xoossafe ekeesipe attishin, asape gidenna.[f]

<- Roome Kiita 1Roome Kiita 3 ->