Link to home pageLanguagesLink to all Bible versions on this site
2
Isra7eele Kochata Maara
1 Goday Musenne Aarona haysada yaagis; 2 Isra7eele asay banta kochan kochan mallanne banta kocha kocha erisiya bandira kaallidi, Geeshsha Dunkaaniyape guuthi haakidi iya yuushuwan dunkaanona.

3 Doloha baggara Yihuda kochay banta malla kaallidi dunkaanona. Yihuda kochaa kaalethey Amnadaabe na7aa Na7asoona. 4 Iya cugaa tayboy 74,600.

5 Yihuda gakidi dunkaananay Yisakoore kochaa. Yisakoora kochaa kaalethey Zu7ara na7aa Natina7eela. 6 Iya cugaa tayboy 54,400.
7 Iyape kaallidi Zabloona kochay dunkaanees. Zabloona kochaa kaalethey Heloona na7aa Eli7aaba. 8 Iya cugaa tayboy 57,400
9 Yihuda baggan dunkaanida olanchota tayboy 186,400. Isra7eele asay gutaa yeddidi biya wode koyroti keyey enta.

10 Dugeha baggara Robeela kochay banta malla kaallidi dunkaanona. Enta kaalethey Sadiyoora na7aa Elisuura. 11 Iya cugaa tayboy 46,500. 12 Robeela gakidi dunkaaney Simoona kochaa. Simoona kochaa kaalethey Zurishadaya na7a Salumi7eela. 13 Iya cuga tayboy 59,300.

14 Iyape kaallidi Gaade kochay dunkaanees. Enta kaalethey De7u7eela na7aa Eliyasaafa. 15 Enta cugaa tayboy 45,650.
16 Robeela, baggan dunkaanida olanchota tayboy 151,450. Isra7eele asay gutaa yeddidi biya wode nam7antho keyey enta.

17 Hessafe guye, koyro keyiya Yihuda cugaapenne nam7antho keyiya Robeela cugaape giddon Geeshsha dunkaaniya tookidi Leeweti geloosona. Issi issi kochay banta dunkaanida maaran banta malla oykidi keyo.

18 Wuloha baggara Efreema baggay banta malla kaallidi dunkaanona. Entana kaalethey Amhuda na7aa Elishama7a. 19 Enta cugaa tayboy 40,500. 20 Enta gakidi Minaase kochay dunkaanees. Entana kaalethey Padazuura na7aa Gamali7eela. 21 Enta olanchota tayboy 32,200. 22 Iyape kaallidi dunkaaney Biniyaame kochaa. Biniyaame kochaa kaalethey Gidi7oona na7aa Abdaana. 23 Enta cugaa tayboy 35,400. 24 Efreema baggan dunkaanida olanchota tayboy 108,100. Isra7eele asay gutaa yeddidi biya wode heedzantho keyey enta.

25 Pudeha baggara Daane kochay banta malla kaallidi dunkaanona. Entana kaalethey Amsadaya na7aa Aki7ezera. 26 Enta cugaa tayboy 62,700. 27 Entana gakidi Aseera kochay dunkaanees. Aseera kochaa kaalethey Okraana na7aa Pagi7eela. 28 Enta cugaa tayboy 41,500. 29 Iyape kaallidi Niftaaleme kochay dunkaanees. Niftaaleme kochaa kaalethey Enaana na7aa Akira. 30 Enta cugaa tayboy 53,400

31 Daane baggan dunkaanida olanchota tayboy 157,600. Isra7eele asay gutaa yeddidi biya wode wursethan keyey enta.

32 Banta kochan kochan shaaketidi taybetida Isra7eele olanchota tayboy 603,550. 33 Shin Goday Muse kiitidaysada, Leeweti hara Isra7eele asaara taybetibookona. 34 Isra7eele asay, Goday Muse Kiittidaba ubbaa oothidosona. Enti banta mala kaallidi dunkaanidosona; qassi banta kochaanne banta soo asaa asaa kaallidi keyoosona.

<- Taybo Maxaafa 1Taybo Maxaafa 3 ->