Taybo Maxaafa
Gaatha Qofa
Taybo maxaafay, Isra7eele asay Siina zumaape dendida wodepe doomidi, Xoossay entaw immana gidi qaala gelida biittas doloha bagga zawa gakanaw hemetida oytamu laytha taarike odees. Maxaafa sunthay, Isra7eele asay Siina zumaape dendidi baanape sinthe, issi yeletape guye Yordaanose Shaafape doloha baggan, Moo7abe biittan, Musey asa taybida taybuwa bessees. Nam7u taybotape giddon de7iya woden, Isra7eele asay Kanaanepe dugeha bagga zawan de7iya Qaades-Barne matidi de7ees. Gidoshin, enti Xoossay immana gida biitta yaara gelanaw danda7ibookona. Hessa gisho, enti he heeran daro laythi aathidaape guye, Yordaanose Shaafape doloha baggara de7iya biitta gakidosona. Entafe baggay yan daanaw qofa qachin, attida asay Yordaanose pinnidi, Kanaane baanaw bantana giigisidosona.
Taybo maxaafay, daro metoy gakiya wode yayyiyanne ufaysi qanxiya asaa taarike bessees. Xoossa bollanne enta kaalethana mela Xoossay doorida Muse bolla geellatethan dendida asaa taarike qoncisees. Asay daaburanchonne kiitetonna dere gidikoka, Xoossay ammanthiya Xoosse gididi, enta naagidi wothidaysa taarikey odees. Hessadaka, Musey issi issi toho danda7a dhaykoka, mino ammanoy iyaw de7iya gisho, Xoossasinne asas ammanetidi oothiya asi gididi bentis.
Maxaafa Ayfe Qofata
Koyro taybuwa (1:1—4:49)
Leewetanne dumma dumma higge (5:1—8:26)
Paasika Ba7aale (9:1-23)
Siina zumaape Moo7abe gakanaw hemetida hemetha (10:1—15:41)
Asa geellatetha (16:1—17:13)
Kahinetanne Leeweta (18:1—19:22)
Moo7abe gakanaw hemetida hemethi (20:1—21:35)
Balaamanne Balaaqa (22:1—24:25)
Asa ammanetona ixuwanne nam7antho taybuwa (25:1—26:65)
Selophaada macca naytanne Iyyasu dooretetha (27:1-23)
Dumma dumma higgetanne ba7aale wode yarshota (28:1—30:16)
Midiyaameta xoonetethanne Yordaanose pinetha (31:1—36:13)

Koyro Isra7eele Asa Taybetetha

1 Isra7eele asay Gibxe biittafe keyida nam7antho laythan, nam7antho ageenan, he ageena koyro gallasan, Goday Siina mela biittan Geeshsha Dunkaaniyan Museko haysada yaagis; 2 “Neeranne Aaronara Isra7eele asa ubbaa enta kochan kochan, qassi enta soo asan asan taybadi, adde asaa sunthaa xaafite. 3 Laythi laatamanne iyape bolla gidida, oletanaw danda7iya Isra7eele asa ubbaa taybite. 4 Kochape kochape issi issi asi ba soo asaas halaqa gididi hintena maaddo. 5 Hintena maaddana asaa sunthay haysafe kaallidi xaafetidaysa.

Robeelape, Shade7ura na7aa Elixura; 6 Simoonape Sursadaya na7a Salumi7eela;

7 Yihudape Amnadaabe na7aa Na7asoona;

8 Yisakoorape Zu7ara na7aa Natina7eela;

9 Zabloonape Heloona na7aa Eli7aaba;

10 Yoosefa naytape,

Efreemape Amhuda na7aa Elishama7a;

Minaasepe Padazuura na7aa Gamali7eela;

11 Biniyaamepe Gadiyoona na7aa Abdaana;

12 Daanape Amsadaya na7aa Aki7ezera;

13 Aseerape Okraana na7aa Pagi7eela;

14 Gaadape Ragu7eela na7aa Elyaasafa;

15 Niftaalemepe Enaana na7a Akira;

16 Ha asay banta aawata keethaa asaape kaalethanaw dooretida Isra7eele yarata halaqata” yaagis.

17 Yaatin Museynne Aaroni he dooretida asata ekidi, 18 nam7antho ageenan koyro gallasan kumetha maabara xeegidi shiishidosona. Asay banta kochan kochan, qassi banta soo asan asan laatamu laythinne iyape bolla gidida adde ubbay xaafetis. 19 Goday iya Kiittidaysada Musey enta Siina mela biittan taybis.

20-21 Oletanaw danda7iya adde ubbay, laatamu laythinne iyape bolla gidida adde ubbay taybetidi huuphen huuphen xaafetidosona. Enti banta kochan kochaaninne banta soo asan shaaketidi haysafe kaallidi de7iya taybo maaran mazgabetidosona.

Bayra na7aa Robeelape 46,500 22-23 Simoonape 59,300

24-25 Gaadape 45,650

26-27 Yihudape 74,600

28-29 Yisakoorape 54,400

30-31 Zabloonape 57,400

32-33 Yoosefa na7aa Efreemape 40,500

34-35 Yoosefa na7aa Minaasepe 32,200

36-37 Biniyaamepe 35,400

38-39 Daanepe 62,700

40-41 Aseerape 41,500

42-43 Niftaalemepe 53,400

44 Musey, Aaroninne banta soo asaape asaape dooretida tammanne nam7u Isra7eele kochaa halaqati taybida asay haysata. 45 Oletanaw danda7iya adde ubbay, laatamu laythinne iyape bolla gidida asay banta soo asan asan taybetidosona. 46 Kumetha asaa tayboy 603,550.

47 Shin Leewe kochati taybetibookona. 48 Gaasoyka kase Goday Museko haysada yaagis; 49 “Leewe kochata taybopa; enta attida Isra7eele asaa taybon gelsofa. 50 Leeweta, Geeshsha Dunkaaniyaninne iyan de7iya miisheta ubbaa bolla halaqa oothada shuuma. Enti Dunkaaniyanne iyan de7iya miisheta tookana; iya giddon oothananne iya yuushon dunkaanana. 51 Geeshsha Dunkaaney shodetiya wode Leeweti shoddo; Geeshsha Dunkaaney eqiya wode Leeweti esso; entafe hari oonika iyako shiiqiko hayqo. 52 Hanko Isra7eele asay banta heeraninne banta cugan cugan shaaketidi, banta dunkaaniya dunkaanona. 53 Shin Godaa hanqoy Isra7eele maabara bolla wodhonna mela Leeweti Dunkaaniya yuushuwan banta dunkaaniya dunkaanidi naago” yaagis. 54 Isra7eele asay Goday Muse kiitida ubbaa oothidosona.

Taybo Maxaafa 2 ->