Luqaasa Wongela 3

Xammaqiya Yohaanisi Oge Pitees

(Maato 3:1-12; Mar 1:1-8; Yoha 1:19-28)

1 Kawoy Xibaryoosi Roome biittan kawotin, tammanne ichashantho laythan, Phenxe Philaxoosi Yihuda haariya wode, Herodiisi Galila haariya wode, iya ishaa Filphoosi Ixuuriyasanne Xirakondoosa haariya wode, Lisaniyoosi Ablaanisa haariya wode, 2 Haannaranne Qayyaafara kahine halaqa gidi de7ishin, Xoossaa qaalay Zakaryaasa na7aa Yohaanisako mela biitta yis. 3 Yohaanisi, “Hinte nagaraape simmitenne xammaqetite. Xoossay hinte nagaraa atto gaana” yaagidi tamaarsishe Yordaanose Shaafa heeran de7iya biitta ubbaa bis. 4 Hessika nabey Isayaasi ba maxaafan,[a]

“Mela biittan ba qaala dhoqu oothidi,

waassiya uraa qaalay,

‘Godaa ogiya giigisite,

horogaaka piddi oothite.

5 Aafo ubbay kumana,

zumaynne derey ziqi gaana.

Wobbe ogey luulana,

giigonna horogay qinxi gaana.

6 Asho ma7ida ubbay,

Xoossaa ashuwa be7ana’ ”

gidi xaafidaysada hanis.

7 Yohaanisi, ba kushen xammaqetanaw yida asaako, “Hinteno, shoosha nayto yaanaw de7iya hanquwafe attana mela hintena zoriday oonee?[b] 8 Hiza, hinte simuwa qoncisiya lo77o ooso oothite, hinte wozanan, ‘Nuus, nu aaway Abrahaamey de7ees gidi ceeqetofite.’ Haa si7ite, ha shuchatape Xoossay Abrahaames na7a kessanaw danda7ees.[c] 9 Heko, beexey mithaa xaphon de7ees. Hiza, lo77o ayfe ayfonna mitha ubbay qanxetidi taman yegetana” yaagis.[d]

10 Asay, “Yaatin nuuni ay oothinoo?” yaagidi oychidosona.

11 Yohaanisi zaaridi, “Nam7u afili de7iya asi baynaysas immo. Kathi de7eysi baynaysas immo” yaagis.

12 Qaraxa qanxiseysati xammaqetanaw yidi, “Astamaariyaw, nuuni ay oothinoo?” yaagidosona.[e]

13 I zaaridi, “Hinte qanxisanaw kiitetoysafe aathidi ekofite” yaagis. 14 Qassi wotaadareti yidi, “Nuuni ay oothinoo” yaagidi oychidosona.

Yohaanisi, “Oodebaaka wolqan dafidi ekofite, oonaka wordon mootopite, hinte damoozey hintew gido; ufaytidi de7ite” yaagis.

15 Asay Kiristoosa naagishe de7iya gisho, Yohaanisa, “I Kiristoosa gidandesha?” gidi qopidosona. 16 Yohaanisi ubbaas zaaridi, “Taani hintena haathan xammaqayis, shin taape aadhidi wolqaameysi yaana. Taani iya caammaa wodoruwa billanaw bessonna asi. I hintena Geeshsha Ayyaananinne taman xammaqana. 17 Wudumman de7iya kathaa polo geeshshanaw pithey iya kushen de7ees. Geeshsha kathaa ba shaaliyan qolana; kaliya dhayonna taman xuuggana” yaagis.

18 Qassi Yohaanisi asaa daro zore zoridi Wongela[f] odis.

19 Shin Yohaanisi Herodiisi ba ishaa machiw, Herodiyada, ekida gishonne haraa iita oosota gisho hanqeetida wode,[g] 20 Herodiisi kaseysa bolla haraba ubbaa gujidi Yohaanisa woyne gelsis.

Yesuusa Xammaqetethi

(Maato 1:1-17; 3:13-17; Mar 1:9-11)

21 Yohaanisi qashetanaape sinthe asaa ubbaa xammaqidi simmin, qasi Yesuusika xammaqetis. I woossishin saloy dooyetis. 22 Geeshsha Ayyaanay holleda bentishe iya bolla uttis. Salope “Taani dosiya na7ay nena; ne tana ufaysaasa” giya qaalay yis.[h]

23 Yesuusi tamaarso oykiya wode iyaw hastamu laythi gidishin, asay iya Yoosefa na7a gidi qopis.

Yoosefi Eele na7a, 24 Eeley Mata na7a,

Mati Leewe na7a, Leewey Malka na7a,

Malki Yoona na7a, Yooni Yoosefa na7a,

25 Yoosefi Mataata na7a, Mataati Amoxe na7a,

Amoxey Nahoome na7a, Nahoomey Asiliime na7a,

Asiliimey Naage na7a, 26 Naagey Ma7aate na7a,

Ma7aatey Mataata na7a, Mataati Samaye na7a,

27 Samayey Yihuda na7a, Yihudi Yonaana na7a, Yoonaney Rase na7a,

Rasey Zarubaabela na7a, Zarubaabeli Salatiyaala na7a,

Salatiyaali Neera na7a, 28 Neeri Malka na7a,

Malki Hade na7a, Hadi Qoosama na7a,

Qoosami Elmodaana na7a, Elmodaani Era na7a,

29 Eri Yoose7a na7a, Yoose7i Alaazara na7a,

Alaazari Yoraame na7a, Yoraamey Mata na7a,

Mata Leewe na7a, 30 Leewey Simoona na7a,

Simooni Yihuda na7a, Yihudi Yoosefa na7a,

Yoosefi Yonaana na7a, Yoonaney Eliyaqeeme na7a,

31 Eliyaqeemi Maliya na7a, Maliyi Maynaane na7a,

Maynaaney Mata na7a, Mati Naatana na7a,

Naatani Dawita na7a, 32 Dawiti Isseye na7a,

Isseyey Iyobeeda na7a, Iyobeedi Boo7eza na7a,

Boo7ezi Salmoona na7a, Salmoona Na7asoona na7a,

33 Na7asooni Amnadaabe na7a, Amnadaabey Raame na7a, Raamey Arne na7a,

Arney Asroome na7a, 34 Asroomey Faaresa na7a,

Faaresi Yihuda na7a,

Yihudi Yayqooba na7a,

Yayqoobi Yisaaqa na7a, Yisaaqi Abrahaame na7a,

Abrahaamey Taara na7a, 35 Taari Nakoora na7a,

Naakorey Saruga na7a, Sarugi Rehu na7a,

Rehuy Faleqa na7a, Faleqi Ebeera na7a,

Ebeeroy Seela na7a, 36 Seeli Qaynama na7a,

Qaynami Arfakisaade na7a, Arfakisaadi Seema na7a,

Seemi Nohe na7a, Nohey Laameha na7a,

37 Laamehi Matusaala na7a, Matusaali Heenoke na7a,

Heenokey Yaareda na7a, Yaaredi Malal7eela na7a,

Malal7eeli Qaynana na7a, 38 Qaynani Henoosa na7a,

Henoosi Seeta na7a, Seeti Addaame na7a,

Addaamey Xoossaa na7a.

<- Luqaasa Wongela 2 Luqaasa Wongela 4 ->