Luqaasa Wongela 2

Yesuusa yeletethaa

(Maato 1:18-25)

1 He wode Roome biittan de7iya asa ubbay taybetana melanne sunthay xaafetana mela kawoy Awugisxoosi kiittis. 2 Hessika Qerenoosi Soore biitta aysiya wode oosetida koyro taybuwa. 3 Hessa gisho, issi issi asi ba sunthaa xaafetanaw ba yeletida biitta bis.

4 Yoosefika Dawita keethaafenne yaraape gidida gisho, Galila Naazirete katamaape dendidi Dawita katama gidida Yihuda Beeteleme bis. 5 Bishe, yelanaw wodey wurida I oychi wothida, Mayraamira wolla xaafetanaw bis. 6 Enti yan de7ishin iw yelo wodey gakis. 7 Ba bayra na7aa yelasu. Curqara xaaxada imathi aqiya keethan bessi dhayida gisho daran mehe muziya gongen zin7isasu.

Henthanchotanne kiitanchota

8 He gadiyan qamma dorsa wudiya naagishe karen aqiya henthanchoti de7oosona. 9 Godaa kiitanchoy hassayonna yidi enta matan eqis. Godaa bonchoy enta yuushuwan poo7is; entika wolqaama yashshi yayyidosona. 10 Shin kiitanchoy, “Yayyofite! Heko, asaa ubbaas gidiya gita ufaysaa mishiraachuwa ekada yas. 11 Hessika, Dawita kataman ashsheysi hintew hachi yeletis. I Godaa Kiristoosa. 12 Zoqale na7i curqara xaaxetidi gongen zin7idaysa hinte demmana; hessika hintew malla gido” yaagis.

13 Qoponna daro salo kiitanchoti kiitanchuwara issife qoncidi,

14 “Bonchoy Xoossaas dhoqa saluwan,

saroy biitta bolla Xoossay dosiya asaas gido”

yaagidi galatidosona.

15 Kiitanchoti entafe shaaketidi saluwa keydaape guye henthanchoti, “Ane Goday nuus qoncisidabaanne hanidaba be7anaw Beeteleme boos” yaagidosona.

16 Entika ellesidi bidosona. Mayraamo, Yoosefanne zoqale na7aa gongen zin7idaysa be7idosona. 17 Be7i simmidi na7aba entaw odetoysa, qoncisidi he bessan de7iya asaas markatidosona. 18 Hessa si7ida ubbay henthanchoti odidaysan malaaletidosona. 19 Mayraama hanidaba ubbaa ba wozanan qopashe de7asu. 20 Henthanchoti entaw odetidaysada hanin be7idosona. Hessa gisho, banta si7idabaasinne be7idaba ubbaas Xoossaa bonchishenne galatishe simmidosona.

Yesuusa Xoossa Keethi Efidosona

21 Hospuntha qamman, qaxaro wodey gakin, I qanthatanaape sinthe kiitanchoy wothida sunthan Yesuusa geetetis.[a] 22 Muse woga mela enta geeshshatetha wodey poletidaape guye Yoosefaranne Mayraamira yooga na7aa banta Godaas immanaw Yerusalaame bidosona. 23 Hessika, Godaa wogan, “Adde gidida bayra na7i ubbay Godaas dummatidaysa gido” geetetidi xaafetidaysa polanaasa.[b] 24 Qassi Godaa wogan, nam7u kuraacho woyko holle yarshanaw efidosona. 25 He wode geeshshinne ammanora mino gidida Simoona geetetiya asi Yerusalaamen de7ees. I Isra7eeleta atotetha naagishe de7ees. Geeshsha Ayyaanayka iya bolla de7ees. 26 Qassi Kiristoosa be7onna hayqonnaysa Geeshsha Ayyaanay iyaw qoncisin eridi de7ees. 27 I he gallas Ayyaanay kaalethin Xoossa Keethi bis. Na7aa aayeranne aawara wogaa polanaw yooga na7aa Yesuusa ekidi gelida wode, 28 Simooni moki ekidi na7aa idimmidi,

29 “Godaw ne taw gelida qaala mela,

ha77i ne aylliya saron moyza.

30 Ta ayfey asaa ubbaa sinthan ne giigisida,

31 ne ashuwa be7is.

32 Hessika kawotethata ubbaas,

Xoossaa ogiya qoncisiya poo7o,

ne asaa Isra7eeleska boncho”

yaagidi Xoossaa galatis.[c]

33 Yoosefaranne Mayraamira iyaw odetidaban malaaletidosona. 34 Simooni enta anjis. Aaye Mayraamiko, “Heko daro asaa wozanaa qofay qoncana mela, Isra7eelen de7iya darotas enta kundethaasinne denduwas Xoossan dooretis. 35 Qassi eqeteysatas malla gidana. Ne shempuwaraka qassi mashshi aadhana” yaagis. 36 Qassi Aseera yaraape gidida Faanu7ela na7iya Haanna geetetiya nabey de7awusu. Iya daro cimasu; iya ba koyro azinaara laapun laythi de7asu. 37 I azinay hayqin hospun tammanne oyddu laythi gidana gakanaw qammanne gallas pacey bayna woosaninne xooman xoossa keethan haggaazasu. 38 Iya he saatiyan bada Xoossaa galatasu; Yerusalaame wozetetha naagiya ubbaas yooga na7aba markatasu. 39 Yoosefaranne Mayraamira Godaa higgiyan kiitetida woga ubbaa polidaape guye Galila biittan de7iya banta katama Naazirete simmidosona.[d] 40 Na7ay diccishenne minnishe bis. Cincatethan kumis; Xoossaa aadho keehatethay iya bolla de7ees.

Yesuusi Xoossa Keethan

41 Yoosefaranne Mayraamira Paasika Ba7aale bonchanaw laythan laythan Yerusalaame boosona.[e] 42 Yesuusas tammanne nam7u laythi gidiya wode kase meezetidaysada ba7aale bonchanaw bidosona. 43 Baaliya bonchidaape guye soo simmiya wode na7ay Yesuusi Yerusalaamen attis. Shin Yoosefaranne Mayraamira I Yerusalaamen attoysa eribookona. 44 I soo simmiya asaara wolla de7iya daanin enti issi gallasa oge bidosona. I baynaysa eridaape guye banta dabbotanne laggeta matan koydosona. 45 I yan dhayin koyishe guye Yerusalaame gakanaw bidosona.

46 Heedzu gallasape guye xoossa keethan astamaareta giddon uttidi entaba si7ishenne enta oychishe de7ishin demmidosona. 47 Iya si7iya ubbay iya akeekaninne zaaruwan malaaletidosona.

48 Soo asay iya demmida wode malaaletidosona. Iya aayaka, “Ta na7aw, ayis nuna haysada oothadii? Ne aawaranne taara nena koyishe un7etida” yaagasu.

49 Yesuusi entako, “Tana ayis koyeetii? Ta, ta aawa keethan daanaw besseysa ereketi” yaagis. 50 Shin I entako gidaba enti akeekibokona.

51 Hessafe guye, entara issife Naazirete katama bis. Entaw kiitetishe de7is. Iya aayiya he ubbaa ba wozanan wothada naagasu. 52 Yesuusi, cincatethan, geesaninne teeman Xoossaa sinthaninne asa sinthan diccis.[f]

<- Luqaasa Wongela 1 Luqaasa Wongela 3 ->