1 He uray tana doloha bagga pengiyako ehis. 2 Taani Isra7eele Xoossaa bonchoy doloha baggafe yeysa be7as. Iya yuussaa girsay kixa haatha guntha mela; biittay iya bonchuwan poo7is. 3 Ta be7ida qoncethay kase Goday Yerusalaame katamaa dhaysanaw yida wode be7ida qoncethaa daanees. Koboora shaafa matan taani be7ida qoncethaa daanees. He wode ta som7uwa sa7a gathada gufannas. 4 Godaa bonchoy doloha pengiyara Xoossaa keethaa giddo gelis. 5 He wode Godaa Ayyaanay tana denthidi, giddo dabaaba gelsin, Heko, Godaa bonchoy Xoossa keethaa kumis.

6 Yan he uray ta matan eqidashin, Xoossa keetha giddofe Goday taw odishin si7as. 7 I taako, “Asa na7aw, haysi ta araatay uttiyanne ta tohoy yedhiya besse. Ta Isra7eele asaa giddon merinaw daana. Hizape guye Isra7eele asaa gidin, enta kawota gidin, eeqa goyinnidi woyko banta kawota hawulte goyinnishe ta geeshsha sunthaa tunisokona. 8 Issi godaa xalaali tananne enta shaakin, banta pengiya ta pengiya matan, banta penge zizgiya ta penge mithaa matan essidosona. Banta ixetida oosuwan ta geeshsha suntha tunisidosona. Hessa gisho, taani ta hanquwan enta dhaysas. 9 Hiza eeqa goyinno aggo; banta kawota hawulte ta matape diggo. Yaatiko, ta enta giddon merinaw daana.”

10 Zaaridi Goday taako, “Asa na7aw, ta nena bessida Xoossa keethaa oosuwa Isra7eele asaas oda; enti banta oothida nagaran yeellatana mela iya medhuwaba entaw oda. 11 Enti banta oothidaban yeellatiyaba gidiko, Xoossaa keethaa mallaa, I keexetida hanota, keyiya dethata, geliya pengetanne iya kumetha misiliya entaw qoncisa. Hessadaka, iya wogaa, iya higgiya ubbaa enta erisa. He keetha hanota kaallana mela iya higgiyanne woga naagana mela enti xeellishin xaafa. 12 Xoossa keetha higgey haysa, zumaa huuphen, Xoossa keethaa yuushuwan de7iya bessa ubbay Ubbaafe Geeshshi gidana.”

13 Yarsho bessay kase Xoossa keethaa wadhidaysada, issi wadhanne oyddu biradhe gujidi wadhetis. Yarsho bessaa baasuwa yuushon issi wadha ziqanne issi wadha dalgiya olli de7ees; he ollay kare baggara issi takadho dhoqees; hessi yarsho bessa dhoqatethaa. 14 Baasuwape bidi, koyro dethaa gakanaw dhoqatethay nam7u wadha; gompay issi wadha. Guutha dethaafe bidi gita dethaa gakanaw dhoqatethay oyddu wadha; qassi gompay issi wadha. 15 Yarshoy xuussa coocey de7iya wursetha dethay oyddu wadha dhoqa. I oyddu maazane gididi, oyddu maazaniya bolla issi issi kacey de7ees; 16 Tamay eexiya coocey oyddu maazane gididi, adussatethaynne dalgatethay tammanne nam7u wadha. 17 Nam7antho dethay hessa mela oyddu maazane gididi, adussatethaynne dalgatethay tammanne oyddu wadha. He dethaa kare bagga gaxay issi takadho dhoqees; yuushon issi wadha olli de7ees. Yarsho bessaa pude efiya dethati doloha baggan de7oosona.

18 Ubbaa Haariya Goday taako, “Asa na7aw, xuussa yarsho yarshanawunne suuthu wurxanaw, yarsho bessa gimbidi wursiya gallas oosetana wogay haysa. 19 Ta sinthan eqidi oothiya Saadoqa yaraape yeletida Leewe koche gidida kahinetas nagara yarsho oothada issi wofaano imma” yaagees Ubbaa Haariya Goday. 20 Neeni he suuthaafe ekada, oyddu kaceta, nam7antho dethaa oyddu maazanetanne he dethaa gaxaa tiya. Hessada oothada, yarsho bessa geeshsha. 21 Nagara yarshos imetida kormaa ekada, Xoossaa keethaas teqetida geeshsha bessaafe kare baggara iyaw giigida bessan xuugga.

22 Wontetha gallas borey bayna issi kole ekada, nagara yarsho oothada yarsha. Kase korma suuthan geeshshidaysada he koliya suuthan yarsho bessa geeshsha. 23 Geeshsha simmada borey bayna issi wofaanonne issi maraze ekada, 24 nam7aaka Godaa sinthe shiisha. Kahineti enta bolla maxine laallidi, Godaas xuussa yarsho oothidi yarsho.

25 “Laapun gallas kumethi, issi issi gallas, issi kole, issi wofaanonne issi maraze nagara yarsho oothada yarsha. 26 Kahineti laapun gallas kumethi yarsho bessa geeshshidi Godaas dummayo. 27 Ha gallasati wuriya wode, hospuntho gallasaape doomidi, kahineti xuussa yarshonne issifetetha yarsho shiisho. He wode ta hintenan ufaytana” yaagees Ubbaa Haariya Goday.

<- Hizqeela Maxaafa 42Hizqeela Maxaafa 44 ->