1 Hessafe guye, he uray tana pudeha bagga pengiyara kare dabaabako kaalethidi Xoossa keethaa giddo dabaaba gimbiyara oyketida keethaako tana ehis. 2 He keethaa wulay pudeha bagga simmis. Ha keethay xeetu wadha adussenne ishatamu wadha dalga. 3 Gido dabaabape laatamu wadha haakidi, qassi sintha baggara kare dabaaban de7iya hiixetida shuchafe sintha baggara woliko simmida heedzu dethi de7iya pooqey de7ees. 4 He kifileta pengeti pude xeelloosona. Entafe sintha baggara tammu wadha dalganne xeetu wadha adusse gidida giddora aathiya ogey de7ees. 5 He keethas bolla heedzantho pooqey nam7antho pooqiyape xuummees; nam7anthoy koyruwape xuummees. Hessi haniday enti issoy issuwafe guye shiiqidi gimbetida gishosa. 6 He pooqiyas bolla bagga kifileti gido kifiletapenne garsa bagga kifiletape xuummiya gisho, kare dabaaban de7iya hara keethatada entaw tuussi baawa. 7 He kifiletape sintha baggara ishatamu wadha aduqiya kare dabaaba baggara de7iya issi gimbey de7ees. 8 Kare dabaaba baggara de7iya kifileta adussatethay ishatamu wadha gidishin, Xoossa keethaa sinthan de7iya kifileta adussatethay xeetu wadha. 9 Kare dabaabape gathi geliya wode doloha baggara garsa kifileta geliya pengey de7ees.

10 Dugeha baggara kare dabaaba kaallidi Xoossa keethaa dabaabara oyketidi keexetida kare dabaabako simmida kifiley de7ees. 11 He keethaa kifileta sinthan ogey de7ees. He keethay qommo baggan de7iya keethara issi gina; adussatethay, dalgatethay, kifiletinne pengeti ubbay issi gina. 12 Dirsa gimbey wuriya doloha bagga gaxa doomidi gimbiyas dugeha baggara de7iya kifileta geliya pengey de7ees.

13 He uray taako, “Xoossa keethaa dabaaba sinthan, pudeha bagganinne dugeha baggan de7iya kifileti kahinetassa. He kifileta giddon Godaa sinthan oothiya kahineti ubbaafe geeshsha kathaa maana. He kifileti geeshshi gidiya gisho, ubbaafe geeshsha imota, hessika katha yarsho, nagara yarshonne naaqo yarsho enti yan wothana. 14 Kahineti issi toho Ubbaafe Geeshsha Bessaa gelidaape guye, Xoossaas oothiya wode ma77iya ma7oti geeshshi gidiya gisho, banta ooso ma7uwa laammonnashin kare dabaaba keyanaw danda7okona. Enti asaako kare keyishe kase ma7iya hara ma7ota ma7idi keyanaw koshshees” yaagis.

15 He uray Xoossaa keetha gaatha baggaa wadhidi wursidaape guye doloha bagga dirsa pengiyara tana kare kessidi, Xoossa keethaa kare baggaa yuushuwa ubba wadhis. 16 Wadha xam7a ekidi, doloha baggaa wadhin, ichashu xeetu wadha gidis. 17 Pudeha baggaa he xam7an wadhin, ichashu xeetu wadha gidis. 18 Dugeha baggaa wadhin, ichashu xeetu wadha gidis. 19 Wuloha baggaa wadhin, ichashu xeetu wadha gidis. 20 Hessada oothidi, I oyddu baggaa ubbaa wadhis. Iya yuushuwan ichashu xeetu wadha aduqiya, qassi ichashu xeetu wadha dalgiya dirsa gimbey de7ees. He gimbey geeshsha bessanne coo bessaa shaakanaasa.

<- Hizqeela Maxaafa 41Hizqeela Maxaafa 43 ->