Erata Maxaafa 3

Ubbabaas Wodey De7ees

1 Ubbabaas wodey de7ees; salope garsan oosetiyaba ubbaas

wodeynne qammi de7ees.

2 Yeletanaw wodey de7ees;

hayqanaw wodey de7ees.

Tokanaw wodey de7ees;

Shoddanaw wodey de7ees.

3 Wodhanaw wodey de7ees;

pathanaw wodey de7ees.

Laallanaw wodey de7ees;

keexanaw wodey de7ees.

4 Yeekanaw wodey de7ees;

miiccanaw wodey de7ees.

Kayotanaw wodey de7ees;

yexanaw wodey de7ees.

5 Shuchu laallanaw wodey de7ees;

shuchu shiishanaw wodey de7ees.

Qoometanaw wodey de7ees;

duuxanaw wodey de7ees.

6 Koyanaw wodey de7ees;

koshshi agganaw wodey de7ees.

Shiishi oykanaw wodey de7ees;

laallanaw wodey de7ees.

7 Peedhanaw wodey de7ees;

sikanaw wodey de7ees.

Si77i gaanaw wodey de7ees;

odetanaw wodey de7ees.

8 Dosanaw wodey de7ees;

ixanaw wodey de7ees.

Olas wodey de7ees;

saro daanaw wodey de7ees.

9 Yaatin, oosanchoy ba daaburida daaburaape ay wodhe demmii? 10 Taani qassi, asa na7i daaburidi oothana mela, Xoossay immida toohoy daro deexo gideysa be7as. 11 Xoossay ubbaba iya wodiyan wodiyan loythidi oothis. Xoossay asa wozanan merinatethi wothis; gidikoka, Xoossay oothidaba ubbaa koyrope wursethi gakanaw, asi kumethi eranaw danda7enna. 12 Asi ba de7ida laythan lo77iyaba ootheysafenne, ufayteysafe aadhiyabay aybika baynaysa taani akeekas. 13 Qassi, asas oothi daaburidi demmiya daaburas gatey, midinne uyidi ufayteysi Xoossaafe iyaw imetida imota.

14 Xoossay oothidaba ubbay merinaw de7eysa taani eras; I oothidaba bolla gujanaw woyko iyape denthanaw oodesika danda7etenna. Xoossi hessa oothey, asi iya yayyidi bonchana melasa. 15 Ha77i hanishe de7iyabay woyko sinthafe hananaw de7iyaba ubbay kase hanidaba; Xoossay kase hanidabay zaari hananaada koyees.

Pirda Geellatethi

16 Qassi taani, salope garsan xillo pirda bessan iitatethi, xillotetha bessan geney de7eysa be7as. 17 Ta wozanan, “Xoossay xilluwanne worduwa nam7aaka pirdas shiishana; Xoossay hanidaba ubbaasinne ooso ubbaas wode qanxi wothis” yaagada qopas.

18 Taani taako, “Asi do7ape duumatonaysa enti akeekana mela Xoossay enta paacees” yaagas. 19 Ase gidin, do7a gidin, enta qaaday issino; issoy hayqeysada, hankoyka hayqees. Nam7ay issi carko shempoosona; hessa gisho, asi do7ape dummatenna; hessika hada. 20 Enti nam7ay issi bessi boosona; nam7ay biittafe medhetida gisho, biitta simmoosona. 21 Yaatin, asa shempoy salo pude keyeysanne do7a shempoy biitta duge wodheysa shaakidi erey oonee? 22 Asi ba oothida ooson ufayteysafe lo77iya harabay iyaw baynaysa be7as. Iyaw de7iya lo77o qaaday hessa xalaala. Asi hayqi simmin iyape guye haniyaba bessanaw, iya guye ehanaw danda7ey oonee?

<- Erata Maxaafa 2 Erata Maxaafa 4 ->