1 Taani taako, “Haaya, ta nena ufaysi aybeko erisanaw lo7oba bessaana” yaagas; shin hessika hada. 2 Miichi eeyatethi gideysa, qassi miikoynne ufaysi aykoka go77onnaysa akeekas. 3 Ha7ika ta wozanay cincatethan tana kaalethishin, tana woyne ushshan ufaysanaw, eeyaka gidanaw paacas. Asi ba qantha woden salope garsan de7iyaba bolla ay oothiko go77aneko eranaw koyas.

4 Issi gitaba oothas; ta daana keethata keexas; woyne tokas. 5 Dumma dumma atakiltiyanne ayfe ayfiya mithata tokas; asi shempiya bessaa giigisas. He bessan dumma dumma ayfe ayfiya mithata tokas. 6 He mithata ushshanaw, haathe dagaaya bessi zeerada giigisas. 7 Addenne macca aylleta shammas; qassi ta son yeletida hara aylletika taw de7oosona. Taape kase Yerusalaamen de7ida asaape aadhiya mehe, deeshenne dorse haaras. 8 Ta haariya dumma dumma biittatapenne kawotape bonchetida buqura ehisada, daro worqanne bira taw dagayaas. Qassi, tana sabbidi yexiya addenne macca shiishas; hessa bolla, asas ufaysi immiya daro maccasata shiishas.

9 Taani kase Yerusalaamen de7ida oodefeka aadhada gita asi gidas. Ta cincatethayka taara wursethi gakanaw de7is. 10 Ta ayfey xeellidabaanne ta wozanay amotidaba ubbaa demmas; ta asatethay koyiya ufaysi ubbaa diggabike. Taani oothida ooso ubban ufaytas; ta daabura wodhey hessa. 11 Gidoshin, hessa ubbaa ootha simmada taani akeekiya wode, daro taani iyaw daaburida ubbay hada gideysa be7as. Salope garsan go77iyabay aykoy baawa; ubbay carko oykanaw yedethiya mela.

12 Hessafe guye, taani cincatethi, eeyatethinne gooshshatethi ayibeko paacada eranaw qofaa doomas. Awude gidinka kawoy oothanaw danda7ey iyape kase kawotida kawoy oothidaysafe harabay aybi de7ii? 13 Poo7oy dhumape, cincatethi eeyatethafe lo77o gideysa taani be7as. 14 Cinca asa ayfeti iya huuphiya giddon de7oosona; shin eeyati dhuman hemetoosona. Gidoshin, enta nam7aa wursethay issino gideysa akeekas.

15 Taani taako, “Eeya gakeya qaaday tanaka gakees; yaatin, taani cinca gideysi tana ay maaddii?” yaagada qopas. Qassi taani ta wozanan, “Haysika hada” yaagas. 16 Eeya gidin cinca, hayqope guye, iya hassayey baawa; sinthafe yaa laythan nuuni ubbay dogetidi attana. Eeyay hayqeysada, cincayka hayqees.

17 Metope attishin, go77iyabay bayna gisho, ha de7oy tana shaattis. Hessika hada; carko oykanaw yedethiya mela. 18 Salope garsan taani daro daaburada demmida ta shaluwa ubbaa taape guyera yaa uraas aggada biya gisho, taani daaburida ubbay tana shaattis. 19 Taape guyera yaa addey cinceko eeyeko ooni erii? Shin I oona gidinka, taani daro daaburidabaanne ta cincatethan demmidaba ubbaa baw ekidi, godaa gidana; hessika hada.

20 Hessa gisho, salope garsan ta daaburidaba bolla ta wozanay ufaysi qanxis. 21 Asi ba de7ida laythan baw de7ida cincatethan, eraninne hiillan daaburidi demmidaba ubbaa aykoka daaburonaysas yeggidi bees. Hessika hadanne gita qoho. 22 Yaatin, salope garsan asi daro daaburidi oothidaba ubbaafe ay go77a demmii? 23 I ba de7o laythan daaburiya daaburi ubbay azzanopenne muudethafe attishin, hari aybika iyaw gujenna; hari attoshin qammaka iya huuphey qofape shempenna; he ubbayka hada.

24 Hiza asas go77a gidiyabay aybe giiko, asi midi uyidi ba daaburan ufaytanaysa. He ufaysay qassi Xoossaa kushiyape imetidaba gideysa taani akeekas.[a] 25 Iya shene gidonna, min uyin asas ufaysi awun de7ii? 26 Xoossaa ufaysiya uraas Xoossay cincatethi, eratethinne ufaysi immees; nagaranchuwas I daaburidi shiishana mela, daabura immees. Shin I shiishidaysa Xoossay ekidi, baw yayiya haras immees. Hessa gisho, ha ubbay hadanne carko oykanaw yedetho mela.[b]

<- Erata Maxaafa 1Erata Maxaafa 3 ->