ላፑን ፆሳ አያናታነ ላፑን ፆልንቶታ ኦይክዳይስ ሀይሳዳ ያጌስ፦ ታኒ ነ ኦሱዋ ኤራይስ፤ አስ ነና ፓፃ ደኤስ ጊኮካ፥ ነ ሀይቃዳሳ። 2 ባርካ፤ አትዳ ጉꬃባነ ሀይቃናዉ ማትዳባ ምንꬃ። ነ ኦሶይ ፆሳ ስንꬃን ፖሎ ግዶናይሳ ደማስ። 3 ህዛ፥ ነ ኤክዳባነ ስእዳባ አኬካ፤ ናጋ፤ ነ ናጋራፐ ስማ። ኔኒ ባርኮና እፅኮ ታ ካይሶዳ ያና፤ ታ አይ ዎደ ያነኮ ነ ኤራካ። [a]

4 ሽን ባንታ ማኡዋ ቅታዮና ጉꬃ አሳት ሳርዴሳን ደኦሶና። ኤንታዉ በሲያባ ግድያ ግሾ ቦꬃ ማኦ ማእድ ኤንቲ ታራ ሄመታና። 5 ፆንያ ኦንካ ኤንታይሳዳ ቦꬃ ማኦ ማአና። ታኒ እያ ሱንꬃ ደኦ ማፃፋፐ ቁችከ። ታኒ ታ አዋ ስንꬃንነ እያ ኪታንቾታ ስንꬃን እ ታባ ግደይሳ ማርካታና። [b] 6 ጌሻ አያናይ ዎሳ ኬꬃታስ ግያባ ስእያ ሀይꬅ ደእያ ኦንካ ስኦ።

ጌሻይነ ቱማንቾይ፥ ዳዊታ ቁልፕያ ባ ኩሸን ኦይክዳይስ፥ ሀይሳዳ ያጌስ፦ እ ጎርድን ኦንካ ዶያናዉ ዳንዳኤና፤ ቃስ እ ዶይን ኦንካ ጎርዳናዉ ዳንዳኤና። [c] 8 ታኒ ነ ኦሱዋ ኤራስ፤ ሄኮ ታ ነ ስንꬃን ኦንካ ጎርዳናዉ ዳንዳኦና ዶያ ፐንገ ዎꬃስ። ነ ዎልቃይ ጉꬃ ግድኮካ፥ ታ ቃላ ናጋዳሳ፤ ታና ካዳባካ። 9 አይሁደ ግዶናሽን፥ ባንታና አይሁደ ግያ ዎርዶታነ ፃላሄ ባጋታ ኔኮ ኤሀናነ ነ ስንꬃን ጉልባትሳና። ታ ነና ዶሰይሳ ኤንታና ኤርሳና። [d] 10 ኔኒ፥ ‘ገንጫ’ ጋዳ ታ ኪትዳ ኪታ ናግዳ ግሾ፥ ኩመꬃ አላምያ ፓጫናዉ ያ ዋየ ዎድያፐ ታኒ ነና ናጋና።

11 ታኒ ኤለሳዳ ያና፤ ኦንካ ነ ካላቻ ኤኮና መላ ነዉ ደእያባ ምንꬃዳ ኦይካ። 12 ፆንዳይሳ ታ ፆሳ ኬꬃን ቱሱ ኦꬃና፤ እ ያን መርናዉ ዳና። ታኒ ታ ፆሳ ሱንꬃነ ታ ፆሳ ካታማ ሱንꬃ እያ ቦላ ፃፋና፤ እያካ ታ ፆሳ ማታፐ ዎꬍያ ኦራꬃ የሩሳላመ። ቃስ ታኒ ታ ኦራꬃ ሱንꬃካ እ ቦላ ፃፋና። [e] 13 ጌሻ አያናይ ዎሳ ኬꬃታስ ግያባ ስእያ ሀይꬅ ደእያ ኦንካ ስኦ።

አምንእ ግድዳ አማነትዳ ቱማ ማርካይ፥ ፆሳ መተꬃ ሃረይስ ሀይሳዳ ያጌስ፦ [f] 15 ታኒ ነ ኦሱዋ ኡባ ኤራይስ፤ ኔኒ እርፃ ዎይኮ ምሻ ግዳካ፤ ኔኒ ናምኣፈ እሱዋ ግድኮ ሎኦ! 16 ኔኒ እርፃ ዎይኮ ምሻ ግዶናሽን፥ ቦልኦ ግድያ ግሾ ታ ነና ታ ዶናፐ ጩታና ሀናይስ። 17 ህዛ፥ ኔኒ፥ ‘ታኒ ዱረ፥ ሻሎራ ደአይስ፥ ታዉ አይብባይካ ፓጭቤና’ ያጋሳ። ሽን ኔኒ መቶታንቾ፥ ማንቆ፥ ቆቀነ ካሎትዳ አስ ግደይሳ ኤራካ። 18 ሄሳ ግሾ፥ ነ ዱረታናዉ ታማን ጌይዳ ዎርቃ፥ ነ ዬላ ካሉዋ ካማናዉ ቦꬃ ማኦነ ሎይꬃ ፄላናዉ ዳንዳእስያ አይፈ ꬋለ ታፐ ሻማና መላ ነና ታ ዞራይስ።

19 ታ ዶሰይሳ ሴራይስነ ሀንቃይስ፤ ህዛ ምና፤ ነ ናጋራፐ ስማ። [g] 20 ሄኮ፥ ታ ካረን ኤቃዳ ፄጋይስ። ኦንካ ታ ፄሳ ስእድ፥ ዉላ ዶይኮ፥ እያኮ ገላና፤ እያራ እስፈ ካꬅ ማና፤ እካ ታራ እስፈ ማና።

21 ታ ፆናዳ ታ አዋራ እያ አራታን ኡትዳይሳዳ ፆንዳይ ታራ ታ አራታን ኡታና መላ ማታ እማና። 22 ጌሻ አያናይ ዎሳ ኬꬃታስ ግያባ ስእያ ሀይꬅ ደኤይ ኦንካ ስኦ” ያግስ።

<- ዮሃንሳ ቆንጨꬅ 2ዮሃንሳ ቆንጨꬅ 4 ->