2
ኤፈሶና ዎሳ ኬꬅ
1 “ኤፈሶና ዎሳ ኬꬃ ኪታንቹዋስ ሀይሳዳ ያጋዳ ፃፋ።
ባ ኡሻቻ ኩሸን ላፑን ፆልንቶታ ኦይክዳይስነ ላፑን ዎርቃ ኮጫታ ግዶራ ሄመተይስ ሀይሳዳ ያጌስ፦ 2 ታኒ ነ ኦሱዋ፥ ነ ዳቡራነ ነ ገንጫ ኤራይስ። ኔኒ ኢታ አሳታባ ገንጫናዉ ዳንዳአቦናይሳ ኤራይስ። ቃስ ሀዋረ ግዶናሽን ባንታና፥ ሀዋረ ገይሳታ ፕልጋ ኤራዳ ኤንቲ ዎርዳንቾ ግደይሳ ደምዳይሳ ታ ኤራይስ። 3 ኔኒ ገንጫዳሳ፤ ታ ሱንꬃ ግሾ መቶ ዳንዳአዳሳ፤ ፆነታባካ። 4 ግዶሽን፥ ሀእ ታ ነና ቦርያባይ ደኤስ፤ ሄስካ ኔኒ፥ ነ ኮይሮ ሲቁዋ አጋዳሳ። 5 ህዛ፥ ነ አይ መላ ꬎቃ በሳፈ ኩንድዳኮ አኬካ! ነ ናጋራፐ ስማ፤ ኔኒ ካሰ ኦꬅያ ኦሱዋ ኦꬃ። ኔኒ ነ ናጋራፐ ስሞና እፅኮ፥ ነ ፆምፐ ዎꬅያ ኮጫ እያ በሳፈ ኤካና። 6 ሀእ ታ ነና ናሽያ እስባይ ደኤስ፤ ታ እፅያ ንቆላዌታ ኦሱዋ ነካ እፃዳሳ።
7 ጌሻ አያናይ ዎሳ ኬꬃታስ ግያባ ስአናዉ ሀይꬅ ደእያ ኦንካ ስኦ። ፆንያ ኦንካ ፆሳ ጋናትያን ደእያ ደኦ ምꬄ አይፈፐ ማና መላ ማታ እማና።”[a]
ሳምርኔሳ ዎሳ ኬꬅ
8 ሳምርኔሳ ዎሳ ኬꬃ ኪታንቹዋስ ሀይሳዳ ያጋዳ ፃፋ።
“ኮይሮይነ ዉርሰꬃይ፥ ሀይቅዳይስነ ሀይቆፐ ደንድዳይስ ሀይሳዳ ያጌስ፦ [b]
9 ታኒ ነ ዋያነ ነ ማንቆተꬃ ኤራይስ፤ ግዶሽን ኔኒ ዱረ። አይሁደ ግዶናሽን ባንታና አይሁደ ገይሳት ጫይያ ጫሻ ታ ኤራይስ፥ ሽን ኤንቲ ፃላሄ ማባራን ደኦሶና። 10 ኔኒ ኤካናዉ ደእያ ዋይያ ባቦፋ። ፃላሄይ ህንተፈ እሶታ እሶታ ፓጫናዉ ቃሾ ኬꬃን የጋና፤ ታሙ ጋላስ ጋካናዉ ህንተ ዋየታና። ሀይቃና ጋካናዉ አማነትዳይሳ ግዳ፤ ታ ነዉ ደኦ ካላቻ እማና።”
11 “ጌሻ አያናይ ዎሳ ኬꬃታስ ግያባ ስአናዉ ሀይꬅ ደእያ ኦንካ ስኦ። ፆንያ ኦንካ ናምአንꬆ ሀይቁዋን ቆሄተና።”[c]
ጳርጋሞና ዎሳ ኬꬅ
12 “ጳርጋሞና ዎሳ ኬꬃ ኪታንቹዋስ ሀይሳዳ ያጋዳ ፃፋ።
ናምኡ ባጋራ ቃራትዳ ማሻይ ደኤይስ ሀይሳዳ ያጌስ፦ 13 ታኒ ነ ደእያ በሳ ኤራይስ፤ ኔኒ ፃላሄ አራታይ ደእያ በሳን ደኣሳ፤ ታ ሱንꬃ ምንꬃ ናጋዳሳ። ሀር አቶሽን፥ ፃላሄይ ደእያ ህንተ ካታማን ሀይቅዳ ታ አማነትዳ ማርካይ፥ አንትጳስ፥ ደእያ ዎደካ አማኑዋ አጋባካ።
14 ግዶሽን፥ ታ ነና ቦርያ ጉꬃባት ደኦሶና። ሄስካ እስራኤለ አሳይ ኤቃስ ያርሸትዳ ካꬃ ምድ ቱናና መላነ ላይማተꬃ ናጋራ ኦꬃና መላ ባላቃ ታማርስዳ ባላማ ትምርትያ ኤክዳ እስ እስ አሳት ኔራ ደኦሶና። [d] 15 ሄሳዳካ፥ ንቆላዌታ ትምርትያ ታማርያ አሳት ኔራ ደኦሶና። 16 ሄሳ ግሾ፥ ኔኒ ነ ናጋራፐ ስማ። ሄስ ሀኖና እፅኮ፥ ታ ኔኮ ኤለሳ ያዳ ሄ አሳታ ታ ዶናፐ ከይያ ማሻን ኦላና።”
17 ጌሻ አያናይ ዎሳ ኬꬃታስ ግያባ ስአናዉ ሀይꬅ ደእያ ኦንካ ስኦ። ፆንያ ኦደስካ ቆሰትድ ደእያ ማናፈ [e] እማና። ቃስ ኤክያ ኡራፐ አትሽን፥ ሀራ አስ ኤሮና ኦራꬃ ሱንꬃይ ፃፈትዳ ቦꬃ ሹቹ ታኒ እያዉ እማና። [f]
ትያትሮና ዎሳ ኬꬅ
18 “ትያትሮና ዎሳ ኬꬃ ኪታንቹዋስ ሀይሳዳ ያጋዳ ፃፋ።
ታማ ላጮ ዳንያ አይፈይ ደኤይስ፥ ቃስ ታማን ሴርዳ ናሰ ብራታ ዳንያ ቶሆይ ደኤይስ፥ ፆሳ ናአይ፥ ሀይሳዳ ያጌስ፦ 19 ታኒ ነ ኦሱዋ፥ ነ ሲቁዋ፥ ነ አማኑዋ፥ ነ ኦሱዋነ ነ ገንጫ ኤራይስ። ኔኒ ኮይሮ ኦይሳፈ ሀእ አꬃዳ ኦይሳካ ኤራይስ።
20 ግዶሽን፥ ታ ነና ቦርያ እስባይ ደኤስ፤ ባና ናበ ግያ ማጫስዉ፥ ኤልዛቤሎ፥ አይኮካ ጋባካ። ሄ ማጫስያ ኤቃስ ያርሸትዳ ካꬃ ምድ ቱናናዳነ ላይማታናዳ ኦꬃዳ ታ አይለታ ባለꬃሱ።[g] 21 እያ ባ ናጋራፐ ስማና መላ ታ እዉ ዎደ እማስ፥ ሽን እያ ስማናዉ ኮያቡኩ። 22 ኤንቲ እ ባላ ኦግያፐ ስሞና እፅኮ፥ ታ እዮ ኢታ ሀርገን የጋና፤ ኢራ ላይማተይሳትካ ኢታ ዋየ ዋየታና። 23 ታኒ እ ናይታ ዎꬋና፤ ቃስ ዎሳ ኬꬃ ኡባይ ታ አሳ ቆፋነ አሳ ዎዛና ኤረይሳ ግደይሳ ኤራና። ታ እሱዋስ እሱዋስ ህንተ ኦሱዋዳ ኦሱዋዳ እማና።”[h] 24 ሽን ትያትሮናን ደእያ ሀራታ፥ ሄ ኢታ ትምርትያ ኤክቦናይሳታነ፥ “ፃላሄ ግታ ፁራ” ጌተትያ ሀ ትምርትያ ታማርቦና ህንተና ሀራ ዴፆ ቶሆ ቶስከ። 25 ግዶሽን፥ ታ ያና ጋካናዉ ህንተዉ ደእያባ ምንꬅ ናግተ።
26 ፆነይሳስነ ዉርሰꬅ ጋካናዉ ታዉ ኪተትያ ኦደስካ ካዎተꬃታ ሃራና መላ ማታ እማና። [i]
27 “እ ኤንታ ብራታ ፃምአን ሃራና፤
መቃ ሚሸዳካ መንረꬃና።”
ሄ ማታይ ታኒ ታ አዋፐ ኤክዳ ማታ መላ። 28 ቃስ ታ እያዉ ባካላ ፆልንቶ እማና። 29 ጌሻ አያናይ ዎሳ ኬꬃታስ ግያባ ስእያ ሀይꬅ ደእያ ኦንካ ስኦ።
<- ዮሃንሳ ቆንጨꬅ 1ዮሃንሳ ቆንጨꬅ 3 ->