11 ያትን፥ ሳሎይ ዶየትን፥ ያን ቦꬃ ፓር ደኤይሳ በአስ። ሄ ፓራ ቶግዳይስ አማነትዳይሳነ ቱማንቾ ጌተቴስ። እ ፅሎተꬃን ፕርደስነ ኦለቴስ። [f] 12 እያ አይፈይ ታማ ላጮ ዳኔስ፤ እያ ሁጰን ዳሮ ካላች ደኤስ። እያ ቦላ እ አትሽን፥ ሀር ኦንካ ኤሮና ፃፈትዳ ሱንꬅ ደኤስ። [g] 13 እ ሱꬃን ሙከትዳ ማኦ ማእስ፤ እያ ሱንꬃይካ ፆሳ ቃላ። 14 ጶልያነ ጌሽ ግድዳ ሊኖ ማእዳ ሳሎ ኦላንቾት ቦꬃ ፓራታ ቶግድ እያ ጌዶ ካሎሶና። 15 ካዎተꬃታ ቃንፅያ ቃራ ማሻይ እያ ዶናፐ ከዬስ። እ ብራታ ፃምአን አሳ ሃራና። ኡባፈ ዎልቃማ ፆሳ ሀንቆ ዎይነ ኡሻ ጉምእያ በሳ እ የꬋና።[h] 16 እያ ማኡዋ ቦላነ እያ ዎድርያ ቦላ፥ “ካዎታ ካዋነ ጎዳታ ጎዳ” ግያ ሱንꬃይ ፃፈትስ።

17 ሄሳፈ ጉየ፥ እስ ኪታንቾይ አዋ ቦላ ኤቅዳይሳ በአስ። ሄ ኪታንቾይ ሳሎራ ፕራꬍያ ካፎ ኡባስ ባ ቃላ ꬎቁ ኦꬅድ፥ “ሃ ዪተ! ፆሳ ግብራ ማናዉ እስ በሲ ሺቅተ። [i] 18 ይድ ካዎታ አሹዋ፥ ሻላቃታ አሹዋ፥ ዎታዳረታ አሹዋ፥ ፓራታ አሹዋ፥ ፓራታ ቶገይሳታ አሹዋ፥ አሳ ኡባ አሹዋ፥ አይለታ አሹዋ፥ ዎማኖታ አሹዋ፥ ግታታነ ጉꬃታ አሹዋ ሚተ” ያግስ።

19 ዶአይ፥ ፓራ ቶግዳይሳራነ እያ ኦላንቾታራ ኦለታናዉ ሳአ ካዎትነ ኤንታ ኦላንቾት እስ በሲ ሺቅዳሽን በአስ። 20 ሽን ሄ ዶአይነ እያ ሱንꬃን ማላታታ ኦꬅዳ ዎርዶ ናበይ እያራ እስፈ ኦይከትስ። ሄ ማላታታን ዶኣ ማላይ ደኤይሳታነ እያ ምስልያ ጎይነይሳታ እ ባለꬅስ። ዶአይነ ዎርዶ ናበይ ናምአይካ ዲነን ኤፅያ ታማ አባን ፓፃ የገትዶሶና። [j] 21 አትዳይሳት ፓራ ቶግዳይሳ ዶናፐ ከይያ ማሻን ሀይቅዶሶና። ካፎት ኡባይ ኤንታ አሹዋ ምድ ካልዶሶና።

<- ዮሃንሳ ቆንጨꬅ 18ዮሃንሳ ቆንጨꬅ 20 ->