1 ጎዳይ ሙሰኮ፥ 2 “አሮን ላፑን ፆምፐታ ኮጫ ቦላ ዎꬅያ ዎደ ፖኦይ ስንꬃ ባጋራ ደእያ ሄራ ፖእሳና መላ ኦꬅድ ዎꬆ ጋዳ ኦዳ” ያግስ።

3 ጎዳይ ሙሰ ኪትዳይሳዳ፥ አሮን ፆምፐታ ኮጫ ቦላ ዎꬅድ ስንꬃ ባጋራ ደእያ ሄራ ፖእሳና መላ ኦꬅስ። 4 ፆምፐ ዎꬅያ ኮጫይ፥ ጎዳይ ሙሰ በስዳይሳዳ ቶማፐ ብድ ቦላ ጪሻ ጋካናዉ ቆፀትዳ ዎርቃፈ ኦሰትስ።

5 ጎዳይ ሙሰኮ፥ 6 “እስራኤለ አሳ ግዶፈ ሌወታ ሻካዳ ዎጋዳ ኤንታ ጌሻ። 7 ኔኒ ኤንታ ጌሻናዉ ሀይሳዳ ኦꬃ፤ ጌሽያ ሃꬃ ኤካዳ ኤንታ ቦላ ዉርፃ፤ ኤንቲ ባንታ አሳተꬃ ኡባ ሜደቶ፤ ባንታ ማኡዋ ሜጮ፤ ያንድ ኤንቲ ዎጋዳ ጌሽ ግዳና። 8 ካልድ ኤንቲ እስ ዎፋኖነ ካꬃ ያርሾስ ግድያ ዛይተራ ዋላሄትዳ ሎኦ ꬊለ ኤኮ፤ ቃስ ኔኒ ናጋራ ያርሾስ ሀራ እስ ዎፋኖ ኤካ። 9 ሄሳፈ ጉየ እስራኤለ አሳ ኡባ ሺሻዳ፥ ሌወታ ጌሻ ዱንካንያ ስን ኤሀዳ ኤሳ። 10 እስራኤለ አሳይ ኤንታ ሁጵያ ቦላ ባንታ ኩሽያ ዎꬆ። 11 ሌወት እስራኤለ አሳ ግዶፈ ታዉ ዱማትድ ኦꬃና መላ ዩሾ ያርሾ ኦꬅድ አሮን ታ ስን ሺሾ። 12 ሌወት ባንታ ኩሽያ ናምኡ ዎፋኖታ ሁጰን ዎꬆ። ሌወታ ናጋራ አቶተꬃስ እሱዋ ናጋራ ያርሾ፥ ቃስ ሀንኩዋ ፁሳ ያርሾ ኦꬃዳ ጎዳስ ያርሻ።

13 “ሌወታ ሻካዳ ታዉ ዱማያ፤ አሮናነ እያ አደ ናይታ ኤንታ ቦላ ሹማ። 14 ሄሳዳ ኦꬃዳ ሌወታ እስራኤለ አሳፐ ታዉ ዱማያ፤ ኤንቲ ታባ ግዳና።

15 “ኔኒ ኤንታ ጌሽዳፐነ ዱማይዳፐ ጉየ ሌወት ጌሻ ዱንካንያን ባንታ ኦሱዋ ኦꬃናዉ ዮ። 16 እስራኤለ አሳ ግዶፈ ኩመꬅ ኤንቲ ታዉ እመትዶሶና፤ እስራኤለን ባይራ የለትዳ አደ ናይታ በሳን ሌወታ ታዉ ኤካስ። 17 እስራኤለ አሳ ግዶን ባይራ የለትዳ አሰ ግድን መሄ ግድን ኡባይ ታባ። ታኒ ግብፀ ቢታን ባይራ ኡባ ዎꬍዳ ዎደ ኤንታ ታዉ ዱማያስ። 18 እስራኤለን ባይራ የለትዳ አደ ናይታ በሳን ታዉ ሌወታ ኤካስ። 19 እስራኤለ አሳ ግዶፈ ሌወታ አሮናስነ እያ አደ ናይታስ እማስ። እስራኤለ አሳይ ጌሻ ዱንካንያኮ ሺቅድ ቆሄቶና መላ ሌወት እስራኤለ አሳ ግሾ ጌሻ ዱንካንያን ኦꬃናዉነ ናጋራ አቶተꬅ ኤሀናዉ ዶረትዶሶና” ያግስ።

20 ጎዳይ ሙሰ ኪትዳይሳዳ፥ ሙሰይ፥ አሮንነ እስራኤለ አሳ ኡባይ ሌወታ ዱማይዶሶና። 21 ሌወት ባንታና ጌሽዶሶና፤ ባንታ ማኡዋ ሜጭዶሶና። አሮን ኤንታ ጎዳስ ዱማ እሞ ኦꬅድ ሺሽስ፤ ኤንታዉ ናጋራ አቶተꬃስ ያርሽድ ኤንታ ጌሽስ። 22 ሄሳፈ ጉየ፥ ሌወት አሮናነ እያ አደ ናይታ አዋተꬃ ጋርሳን ግድድ ጌሻ ዱንካንያ ግዶን ባንታ ኦሱዋ ኦꬃናዉ ይዶሶና። ጎዳይ ሙሰ ሌወታ ዱማያናዉ ኪትዳይሳዳ ኤንቲ ኦꬅዶሶና።

23 ጎዳይ ሙሰኮ፥ 24 “ሀይስ ሌወት ኦꬃና ዎጋ፤ ላይꬅ ላታማነ እቻሻነ እያፐ ቦላ ግድዳ ሌወ አደ ኡባይ ጌሻ ዱንካንያን ኦꬃናዉ ዮ። 25 ሽን ላይꬅ እሻታሙ ግድያ ዎደ ባንታ ኦሱዋፐ ሸምፖ፤ ዛር ኦꬆፎ። 26 ኤንቲ ጌሻ ዱንካንያን ኦꬅያ ባንታ እሻታ ኦꬅ ማዳናዉ ዳንዳኦሶና። ሽን ኤንቲ ባንታዉ አይ ኦሶካ ኦꬆፎ። ህዛ ኔኒ ሌወታ ሀይሳዳ ኦስሳ” ያግስ።

<- ታይቦ ማፃፋ 7ታይቦ ማፃፋ 9 ->