ታይቦ ማፃፋ 7

ጌሻ ዱንካንያ አንጅሶ እሞታታ

1 ሙሰይ ጌሻ ዱንካንያ ቶክድ ኦንግዳ ዎደ ሄ ዱንካንያነ እያ ሚሽያ፥ ያርሾ በሳነ እያ ሚሽያ ኡባ ዛይተን ትይድ ጌሽስ። 2 ሄሳፈ ጉየ፥ እስራኤለ አሳ ኮቻን ኮቻን ታይብድ ካለꬅያ ዎደ ሀላቃ ግድዳ ኡባይ፥ 3 ጎዳስ እሞታ ሺሽዶሶና። ኤንቲ እምዳ እሞታይ ናምኡ ሀላቃ ሱንꬃን እስ ፓራ ጋረ፥ ቃስ እስ እስ ሀላቃ ሱንꬃን እስ እስ ቦሩ ኦꬅድ፥ ኡሱፑን ጋረታነ ታማነ ናምኡ ቦራታ ጌሻ ዱንካንያ ኤህዶሶና።

4 ጎዳይ ሙሰኮ፥ 5 “ጌሻ ዱንካንያ ኦሱዋስ ጎአና መላ ኔኒ ሄ እሞታ ኤንታፈ ኤካዳ፥ ኤንታ ኦሱዋስ ኦሱዋስ ኮሸይሳዳ ሻካዳ ሌወታስ እማ” ያግስ። 6 ሄሳ ግሾ፥ ሙሰይ ጋረታነ ቦራታ ኤክድ ሌወታስ እሚስ። 7 ገድሶና ኮቻስ ኮሸይሳዳ ሻክድ ኤንታ ኦሱዋስ ናምኡ ጋረታነ ኦይዱ ቦራታ እሚስ። 8 መራራ ኮቻስ ኮሸይሳዳ ሻክድ፥ ኤንታ ኦሱዋስ ኡይዱ ጋረታነ ሆስፑን ቦራታ እሚስ። ኤንታ ኦሱዋ አዋተꬃን ካለይ ካህንያ አሮና ናኣ እታማራ። 9 ሽን ቃሃታ ኮቻ ኦሶይ ዱንካንያ ጌሻ ሚሸታ ሀሸን ቶሆ ግድያ ግሾ ሙሰይ ኤንታዉ ፓራ ጋረነ ቦሩ እምቤና።

10 ሙሰይ ያርሾ በሲ ጎዳስ ዱማይዳ ጋላስ ሀላቃት ያርሾ በሳ ስን ባንታ እሞታ ኤህዶሶና። 11 ጎዳይ ሙሰኮ፥ “እስ እስ ጋላስ እስ እስ ሀላቃይ ያርሾ በሲ ጎዳስ ዱማያናዉ ባ እሞታ እሞ” ያግስ።

12 ኮይሮ ጋላስ ባ እሞታ ኤህዳይ ይሁዳ ኮቻፈ አምናዳበ ናኣ ናአሶና።

13 ናአሶን ኤህዳ እሞታይ ጌሻ ዱንካነን ኤረትዳ ምዛነን 1,500 ግራመ ብራፐ ኦሰትዳ ፕጫ ሳነ፥ 800 ግራመ ብራፐ ኦሰትዳ ኦላትያ ሳነ፥ ናምኣካ ካꬃ ያርሾ ያርሻናዉ ዛይተራ ዋላከትዳ ሎኦ ꬊለ ኩምዳይሳ፤ 14 ቃስ 110 ግራመ ዎርቃፈ ኦሰትዳ እፃነይ ኩምዳ ሻተ፤ 15 ፁሳ ያርሾስ፥ እስ ዎፋኖ፥ እስ ማራዘ፥ እስ ላይꬃ ኡርገ ዶርስ፤ 16 ናጋራ ያርሾስ እስ ኮለ፤ 17 እስፈተꬃ ያርሾስ ናምኡ ቦራታ፥ እቻሹ ማራዘታ፥ እቻሹ ኮለታነ እቻሹ ኡርገ ዶርሳታ ኤህስ።

ካልያ ሀንኮ ሀላቃትካ አምናዳበ ናአይ ናአሶን እምዳይሳዳ ባንታ እሞታ ኤህዶሶና።

18-23 ናምአንꬆ ጋላሳን ይሳኮራ ኮቻፈ ዙአራ ናአይ ናትናኤል ባ እሞታ ኤህስ።

24-29 ሄꬓንꬆ ጋላሳን ዛብሎና ኮቻፈ ሄሎና ናአይ ኤልኣብ ባ እሞታ ኤህስ።

30-35 ኦይዳንꬆ ጋላሳን ሮቤላ፥ ኮቻፈ ሻደኡራ ናአይ ኤልዙር ባ እሞታ ኤህስ።

36-40 እቻሻንꬆ ጋላሳን ስሞና ኮቻፈ ዙርሻዳያ ናአይ ሳሉምኤል ባ እሞታ ኤህስ።

41-47 ኡሱፑንꬆ ጋላሳን ጋደ ኮቻፈ ራጉኤላ ናአይ ኤልያሳፍ ባ እሞታ ኤህስ።

48-53 ላፑንꬃ ጋላሳን ኤፍሬማ ኮቻፈ አምሁዳ ናአይ ኤልሻማእ ባ እሞታ ኤህስ።

54-59 ሆስፑንꬃ ጋላሳን ምናሰ ኮቻፈ ፓዳዙራ ናአይ ጋማልኤል ባ እሞታ ኤህስ።

60-65 ኡዱፉንꬆ ጋላሳን ብንያመ ኮቻፈ ግዳኦና ናአይ አብዳን ባ እሞታ ኤህስ።

66-71 ታማንꬆ ጋላሳን ዳነ ኮቻፈ አምሳዳያ ናአይ አክኤዘር ባ እሞታ ኤህስ።

72-77 ታማነ እስንꬆ ጋላሳን አሴራ ኮቻፈ ኦክራና ናአይ ፓግኤል ባ እሞታ ኤህስ።

78-83 ታማነ ናምአንꬆ ጋላሳን ንፍታለመ ኮቻፈ ኤናና ናአይ አክራ ባ እሞታ ኤህስ።

84 ያርሾ በሳይ ትየትያ ዎደ ጎዳስ ዱማያናዉ እስራኤለ ሀላቃት ኤህዳ እሞታይ ሀይሳፈ ካልድ ደኤይሳ።

ብራፐ ኦሰትዳ ታማነ ናምኡ ፕጫ ሳነታነ ኦላትያ ሳነታ፤ ዎርቃፈ ኦሰትዳ ታማነ ናምኡ እፃነይ ኩምዳ ሻተታ ኤህዶሶና። 85 እሶይ እሶይ 1,500 ግራመ ብራፐ ኦሰትዳ ፕጫ ሳነ፤ ቃስ እሶይ እሶይ 800 ግራመ ብራፐ ኦሰትዳ ኦላትያ ሳነ፥ ጌሻ ዱንካነን ኤረትዳ ምዛነን ሄ ኡባ 28 ክሎ ግራመ ኤህዶሶና። 86 እፃነይ ኩምዳ ታማነ ናምኡ ዎርቃ ሻተታ 1.4 ክሎ ግራመ ጌሻ ዱንካነን ኤረትዳ ምዛነን ሺሽዶሶና። 87 ፁሳ ያርሾስ ሺቅዳ መሄይ ካꬃ ያርሹዋራ ዎላ ታማነ ናምኡ ዎፋኖታ፥ ታማነ ናምኡ ማራዘ፥ ታማነ ናምኡ እስ ላይꬃ ኡርገ ዶርስነ፥ ታማነ ናምኡ ኮለታ ናጋራ ያርሾስ ሺሽዶሶና። 88 እስፈተꬃ ያርሾስ ላታማነ ኦይዱ ቦራት፥ ኡሱፑን ታሙ ማራዘታ፥ ኡሱፑን ታሙ ኮለታ፥ ኡሱፑን ታሙ እስ ላይꬃ ኡርገ ዶርሳታ ሺሽዶሶና። ጌሻ ዱንካንያ ዱማያናዉ ትያ ዎደ ሺቅዳ ያርሾት ሀይሳታ።

89 ሙሰይ ጎዳራ ኦደታናዉ ጌሻ ዱንካንያ ገልያ ዎደ ጫቆ ታቦትያ ካማ ቦላ ደእያ ናምኡ ክሩበታፐ ግዶን ግድድ ጎዳይ ኦድሽን ስእስ።

<- ታይቦ ማፃፋ 6 ታይቦ ማፃፋ 8 ->