1 ጎዳይ ባ ኦድዳይሳዳ ሳሮ አንጅስ፤ ባ ገልዳ ቃላካ ፖልስ። 2 ሳራ ቃንꬃታዳ ፆሳይ ግዳ ዎደይ ጋክን ጭምዳ አብራሃመስ አደ ናአ የላሱ። 3 አብራሃመይ ሳራ የልዳ ናአ ሱንꬃ ይሳቃ ግድ ሱንꬅስ። 4 አብራሃመይ ባ ናአ ይሳቃ ፆሳይ ኪትዳይሳዳ የለትዳ ሆስፑንꬆ ጋላሳን ቃፃርስ። 5 እያ ናአ ይሳቅ የለትያ ዎደ፥ አብራሃመስ ላይꬅ ፄታ። 6 ሳራ፥ “ፆሳይ ታዉ ሚቸ እሚስ፤ ቃስ ሀይሳ ስእያ ኡባይ ታራ ሚጫና” ያጋሱ። 7 ቃስካ ሳራ፥ “ሳራ አብራሃመስ ናአ የላዳ ꬋንꬃና ግዳይ ኦኔ? ግድኮካ ታኒ ሀእ እያዉ እ ጭምዳ ዎደ ናአ የላስ” ያጋሱ። [a]

8 ጉꬃ ናአይ ድጭድ፤ ꬋንꬅ ዱꬅስ፤ አብራሃመይ ይሳቅ ꬋንꬅ ዱꬅዳ ጋላስ ዎልቃማ ግብራ ጊግስስ። 9 ሽን ግብፀፈ ይዳ አጋራ አብራሃመስ የልዳ ናአይ ይሳቃ ቶችሽን ሳራ በአሱ። 10 ሳራ አብራሃመኮ፥ “ሀ አይለ ናአይ ታ ናአ ይሳቃራ ኡባካ ላቶና ግሾ፥ ጋꬍንድዉነ እ ናኣ ከሳዳ ጎዳ” ያጋሱ።

11 ሄ ኦዳይ ባ ናአ ቦችያ ግሾ፥ አብራሃመይ ዳሮ መቶትስ። 12 ሽን ፆሳይ አብራሃመ፥ “ነ ኮቻይ ይሳቃ ባጋራ ፄገታና ግሾ ነ ናኣስነ ነ አይሌስ ዳሮ መቶቶፓ፤ ሳራ ነዉ ኦድያባ ኡባ ስአ። 13 ቃስ እካ ነ ኮቸ ግድያ ግሾ አይለ ናአ ታኒ ግታ ደረ ኦꬃና” ያግስ።

14 ዎንታ ጉራ አብራሃመይ ደንድድ ጉꬃ ካነ ኮዳን ሃ ኩንꬅድ፥ አጋሮ ቶስድ፥ እ ናአ እዮ እድንꬅድ ከስ ጎድስ። እያ ባዳ፥ በርሳበ መላ ቢታን ዳቡራሱ። 15-16 ሃꬃይ ኮዳፈ ዉርዳ ዎደ እያ፥ “ናአይ ሀይቅሽን፥ ኡታዳ በእከ” ጋዳ፥ ናአ እስ ቡረ ጋርሳን የጋዳ፥ ናምኡ ፄቱ ዋꬋ ግደይሳ መላ ባዳ ኡታ አጋሱ። ያን ኡታዳ፥ ባ ቃላ ꬎቁ ኦꬃዳ ዬካሱ።

17 ፆሳይ ናአ ዋሱዋ ስእስ። ፆሳ ኪታንቾይ አጋሮ ሳሎፐ ፄግድ፥ “አጋረ፥ ዋናዲ? ፆሳይ ናአ ዬሁዋ ስእዳ ግሾ ባቦፋ፤ 18 ዳንዳ ኤቃዳ፥ ናአ ደንꬃዳ ነ ኩሽያን ኦይካ፤ ታኒ እያ ግታ ደረ ኦꬃና” ያግስ። 19 ፆሳይ እዮ ሃꬃ ኦላ በስን፥ ባዳ ኮዳን ሃ ኩንꬃዳ ናኣ ኡሻሱ። 20 ናአይ ድጭያ ዎደ ኡባን ፆሳይ እያራ ግድስ። እ መላ ቢታን ደእድ፥ ዶንገን ዱክያ አሰ ግድስ። 21 እ ፓራና መላ ቢታን ደእሽን፥ እያ አይያ ግብፀፈ እያዉ ማቾ እማሱ።

22 ሄ ዎደ፥ አብመለከይ፥ ባ ቶራ ሞጮና ፍኮላራ አብራሃመኮ ብድ፥ “ኔኒ ኦꬅያባ ኡባን ፆሳይ ኔራ ደኤስ። 23 ኔኒ ታ ቦላ ዎይኮ ታ ናይታ ቦላ ዎይኮ ታ ዘረꬃ ቦላ ጭማዳ ገነ ኦꬆና መላ፥ ሀእ ሀይሳን፥ ፆሳ ስንꬃን ታዉ ጫቃ። ታኒ ነዉ ኬህዳይሳዳ፥ ኔንካ ታስነ ኔኒ በተተꬃን ደእዳ ሀ ቢቴስ ኬሀ” ያግስ።

24 አብራሃመይ፥ “ታኒ ጫቃይስ” ያግስ።

25 ሄ ዎደ፥ አብራሃመይ፥ አብመለከ አይለት ኤክዳ ሃꬃ ኦላባ አብመለከስ ማጋንስ። 26 ሽን አብመለከይ፥ “ሄሳ ኦን ኦꬅዳኮ ታኒ ኤርከ። ኔንካ ቃስ ታዉ ኦዳባካ፤ ታኒ ሀች ጋካናዉ ሄሳ ስአብከ” ያግስ።

27 ሄሳፈ ጉየ፥ አብራሃመይ ዶርሳታነ ሚዛታ ኤህድ፥ አብመለከስ እምን፥ ኤንቲ ናምአይ ጫቅዶሶና። 28 አብራሃመይ ላፑን ኡዞ ዶርሳታ ዉድያፐ ሻክስ፤ 29 አብመለከይ አብራሃመ፥ “ሀ ኔኒ ዱማ ሻካ ዎꬅዳ ላፑን ኡዞ ዶርሳታ አይስ ሻካዲ?” ያግድ ኦይችስ።

30 አብራሃመይ፥ “ታኒ ሀ ሃꬃ ኦላ ቦክዳይሳስ ማርካ ግዳና መላ፥ ሀ ላፑን ኡዞ ዶርሳታ ታፐ ኤካ” ያግስ።

31 ሄሳን ሄ ናምኡ አሳት ጫቅዳ ግሾ፥ ሄ በሳይ ባርሳበ (ጫቆ ሃꬃ ኦላ ዎይኮ ላፑን ሃꬃ ኦላ)።

32 በርሳበን ጫቁዋ ጫቅዳፐ ጉየ፥ አብመለከይነ እያ ቶራ ሞጮናይ ፍኮል ደንድድ፥ ፍልስፄመ ቢታ ስምዶሶና። 33 አብራሃመይ ባርሳበን ታማርሲክ ጌተትያ ምꬅ ቶክስ። ሄሳን ጎዳ፥ መርና ፆሳ ፄግድ እያዉ ጎይንስ። 34 አብራሃመይ ፍልስፄመ ቢታን ዳሮ ዎደ ደእስ።

<- መተꬃ ማፃፋ 20መተꬃ ማፃፋ 22 ->