1 አብራሃመይ ማምረፐ ደንድድ ነገበ መላ ቢታ ሄራ ብድ ቃደሳፐነ ሹራ ቢታታስ ግዱዋን ደእስ። ገራራንካ ጉꬃ ዎደ ጋምእስ። 2 ያን ደእሸ አብራሃመይ ባ ማችዉ ሳሮ፥ “እያ ታ ምችዉ” ያግዳ ግሾ፥ ገራራ ካዎይ አብመለከይ ኪትድ ሳሮ ባኮ ኤፍስ። 3 ሽን ፆሳይ እስ ቃማ አሙሆን አብመለከኮ ይድ፥ “ኔኒ ኤህዳ ማጫሰ ጋሶን ሀይቃሳ፥ እያ አዝናራ ደአዉሱ” ያግስ።

4 ሀኖሽን፥ አብመለከይ እዮ ቦችቤና። እ፥ “ጎዳዉ፥ ኔኒ ታናነ ታ ደረይ ቆሆና ደእሽን ጮ ꬋይሳነዬ? 5 እ፥ ‘እያ፥ ታ ምቾ’ ግቤኔ? ቃስ እያካ፥ ‘እ፥ ታ እሻ’ ጋብኬ? ታኒ ታ ዎዛና ፅሎተꬃንነ ታ ኩሸ ጌሻተꬃን ሀይሳ ኦꬃስ” ያግስ።

6 ፆሳይ አሙሆን እያኮ፥ “ኤ፥ ኔኒ ነ ዎዛና ፅሎተꬃን ኦꬅዳይሳ ታ ኤራይስ። ሄሳ ግሾ፥ ኔኒ እዮ ቦቾናዳነ ታ ስንꬃን ናጋራ ኦꬆናዳ ነና ታኒ ተቃስ። 7 ሀእ ሀ አድያ ማችዉ ዛራ። እ ናበ ግድያ ግሾ፥ ነዉ ፆሳ ዎስኮ ነ አታና። ሽን እዮ ዛሮና እፅኮ፥ ኔንነ ነዉ ደእያባ ኡባይ ሀይቃናይሳ ኤራ” ያግስ።

8 አብመለከይ ዎንተꬃ ጋላስ ዳሮ ጉራ ባ ሞርናታ ባኮ ፄግስ። ሄ ሀንዳባ ኡባ ኤንታዉ ኦድን ኤንቲ ዳሮ ባብዶሶና። 9 ያትን አብመለከይ አብራሃመ ፄግድ፥ “ኔኒ አይብባ ኑ ቦላ ኦꬃዲ? ነ ታ ቦላነ ታ ካዎተꬃ ቦላ ሀይሳ መላ ቆሆ ኤሀናዉ ታ ነዉ አይ ኢታባ ኦꬃድና? ኔኒ ታ ቦላ ኦሰታናዉ በሶናባ ኦꬃዳሳ” ያግስ። 10 ቃስ አብመለከይ አብራሃመ፥ “ኔኒ ሀይሳ አይስ ኦꬃዲ?” ያግድ ኦይችስ።

11 አብራሃመይ ዛሪድ፥ “ ‘ሀ በሳን ፆሳስ ያሸትያ አስ ባይና ግሾነ ቃስ ታ ማቸ ጋሶን ኤንቲ ታና ዎꬋና’ ጋዳ ቆፕዳ ግሾሳ። 12 ሄሳ ቦላ እያ ቱማካ ታ ምቾ፤ እያ ታ አዋ ናአፐ አትሽን ታ አየ ናአ ግዱኩ፥ ያንያ ግሾ፥ እያ ታ ማቾ ግዳሱ። 13 ፆሳይ ታና ታ አዋ ኬꬃፈ ከስዳ ዎደ ታኒ ኢኮ፥ ‘ኔኒ ብዳ ቢታ ኡባን ነ ታዉ ኦꬃና ኬሀተꬃይ ሀይሳ፤ “እ ታ እሻ” ጋዳ’ ኦዳ ያጋስ” ያግስ።

14 ሄሳፈ ጉየ፥ አብመለከይ ዶርሰ፥ መሄ፥ ማጫ አይለታነ አደ አይለታ ከስድ አብራሃመስ እሚስ፤ እያ ማችዉ ሳሮ እያዉ ዛርስ። 15 አብመለከይ አብራሃመኮ፥ “ሄኮ፥ ታ ቢታይ ሀይስሽ ነና ሎኦሶን ደአ” ያግስ።

16 ሳርኮ፥ “ታኒ ነ እሻስ እስ ሙኩሉ ብራ ሳንትመ [a] እማይስ። ሄስ ኔራ ደእያ ኡባ ስንꬃን ኔኒ ፅሎ ግደይሳነ አይብ ኢታባካ ኦꬆናይሳ ኤርሰይሳ ግዶ” ያግስ። 17-18 ጎዳይ አብራሃመ ማቸ ሳር ጋሶን አብመለከ ኬꬃ ኡባ ማይንስዳ ግሾ አብራሃመይ ፆሳ ዎስን፥ አብመለከይ፥ እያ ማችያነ እያ ማጫ አይለት ናአ የላና መላ ፆሳይ ኤንታ ፓꬅስ።

<- መተꬃ ማፃፋ 19መተꬃ ማፃፋ 21 ->