1 “ቢታ ሻካናዉ ማዝጋበትዳ ኮቻታ ሱንꬃይ ሀይሳ፦ ፑደሀ ባጋራ እስ ሳም ዳነ ኮቻስ እመቶ። ሄስካ ሄትሎናፐ ሀማታ ኤፍያ ኦግያ ካልድ፥ ያፐ ዳማስቆ ቢታን ደእያ ሀፃር-ኤናና ካታማ ጋኬስ። ሄስ ዶሎሀፐ ብድ ዉሎሀ ጋካናዉ ደእያ በሳስ ፑደሀ ባጋ ዛዋ ግዳና። 2 ዳነ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ አሴራ ኮቻስ እመቶ። 3 አሴራ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ንፍታለመ ኮቻስ እመቶ። 4 ንፍታለመ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ምናሰ ኮቻስ እመቶ። 5 ምናሰ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ኤፍሬማ ኮቻስ እመቶ። 6 ኤፍሬማ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ሮቤላ ኮቻስ እመቶ። 7 ሮቤላ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ይሁዳ ኮቻስ እመቶ።

8 “ይሁዳ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማ ዱማያ ዎꬃ። እያ ጎምፓይ ታማነ ናምኡ ክሎ ምትረነ ባጋ ግዶ። ዶሎሀፐ ዉሎሀ ጋካናዉ ደእያ አዱሳተꬃይ እስ ኮቻ ሻክን ጋክያ ሳማራ ግና። እያዉ ግዶ ግናን ፆሳ ኬꬃ ደኤስ።

9 “ሄ በሳፈ ኔኒ ጎዳስ ዱማያዳ ዎꬅያ በሳይ ታማነ ናምኡ ክሎ ምትረነ ባጋ አዱሰነ ታሙ ክሎ ምትረ ዳልጋ ግዶ። 10 ሄ በሳፈ ባጋይ ካህነታስ ዱማትዳ በሰ ግዶ፤ እ ፑደሀ ባጋራ ታማነ ናምኡ ክሎ ምትረነ ባጋ አዱሰ፤ ዉሎሀ ባጋራነ ዶሎሀ ባጋራ እቻሹ ክሎ ምትረ ዳልጋ ግዶ። ፆሳ ኬꬃይ እያዉ ግዶ ግናን ደኤስ። 11 ሀ ዱማትዳ በሳይ እስራኤለ አሳይ ታ ኦግያፐ ካረ ካረ ከይዳ ዎደ ኤንታራ ካረ ከይዳ ሌወታዳ ግዶና፥ አማነትድ ታዉ ኦꬅሸ ጋምእዳ፥ ጌሻ ካህነታስ፥ ሳዶቃ ያራታስ እመቶ። 12 ሄስ ጎዳስ ዱማትዳ ቢታፈ ኤንታዉ ዱማ ግሾ፤ እ ኡባፈ ጌሻ በሲ። ኤንታ ዛዋይ ሌወታስ ሳማን እመቶ።

13 “ካህነታ ዛዋራ ኦይከትድ፥ ሌወታስ አዱሳተꬃይ ታማነ ናምኡ ክሎ ምትረ ባጋ፥ ዳልጋተꬃይ እቻሹ ክሎ ምትረ ግድዳ እስ ሳም እመቶ። 14 ኤንቲ ሄ ቢታፈ ባይዛናዉ ዎይኮ ላማናዉ ኮሸና። ሄ ቢታይ ሎኦ ቢታ ግድያ ግሾ፥ ሀራ አሳ ኩሸን ገላናዉ በሰና፤ ጎዳስ እ ጌሻ በሰ።

15 “አትዳ ናምኡ ክሎ ምትረነ ባጋ ዳልጋነ ታማነ ናምኡ ክሎ ምትረነ ባጋ አዱሳ በሳይ ካታማ አሳ ኡባይ ኬꬃስነ መሄ ሄምያ በሰ ግዶ፤ ካታማይ ሄ ቢታ ግዶ ግናን ደኦ። 16 ሄ ካታማይ ኦይዱ ማዛነራ ደኤስ። ፑደሀ ባጋይ ኦይዱ ሙኩሉነ እቻሹ ፄቱ ዋꬋ፤ ዱገሀ ባጋይ ኦይዱ ሙኩሉነ እቻሹ ፄቱ ዋꬋ፤ ዶሎሀ ባጋይ ኦይዱ ሙኩሉነ እቻሹ ፄቱ ዋꬋ፤ ዉሎሀ ባጋይ ኦይዱ ሙኩሉነ እቻሹ ፄቱ ዋꬋ። 17 ካታማስ ሄንꬃ ጋደይ ደኦ፤ ሄ ጋደይ ፑደሀ ባጋራ፥ ዱገሀ ባጋራ፥ ዶሎሀ ባጋራነ ዉሎሀ ባጋራ ናምኡ ፄታነ እሻታሙ ዋꬋ ዳልጋ ግዶ። 18 ፆሳ ኬꬃይ ኬፀትድ ስምን፥ ጌሻ በሳን አትዳ በሳይ ዶሎሀ ባጋራ አዱሳተꬃይ እቻሹ ክሎ ምትረ፤ ዉሎሀ ባጋራ አዱሳተꬃይ እቻሹ ክሎ ምትረ ግዶ። አትዳ ቢታይ ሄ ካታማን ደእያ አሳስ ጎሻ ቢታ ግዳና። 19 ሄ ካታማን ደእያ እስራኤለ ዛረ ግድዳ ኦንካ ሄ ቢታ ጎ ያናዉ ዳንዳኤስ። 20 ህንተ ዱማያ በሳ ኦይዱ ማዛነይ ታማነ ናምኡ ክሎ ምትረነ ባጋ አዱቆ። ሄ በሳይ ካታማይ ኬፀትዳ በሳነ ጌሻ በሳ ጉጄስ።

21 “ጌሻ በሳፈነ ካታማ በሳፈ አትዳ ቢታይ ሀላቃ ግሾ ግዶ። ሄስካ ታማነ ናምኡ ክሎ ምትረነ ባጋ ግድዳ ጌሻ በሳፈ ብድ ዶሎሀ ባጋ ዛዋ ጋኬስ። ዉሎሀ ባጋን ደእያ ታማነ ናምኡ ክሎ ምትረ ግድዳ ካታማ ቢታይ ዉሎሀ ባጋ ዛዋ ጋኬስ። ሄሳዳ ሀንድ ጌሻ በሳይነ ፆሳይ ኬꬃይ ግዶን ግዳና። 22 ሄሳ ግሾ፥ ሌወታ ቢታይነ ካታማ ቢታይ ሀላቃስ እመትዳ ቢታፈ ግዶን ግዳና። ሄ ሀላቃ ቢታይ ፑደሀ ባጋራ ይሁዳ ላታን፥ ጋርሳ ባጋራ ብንያመ ላታን ዛዋቴስ።

23 “አትዳ ኮቻታስ ቢታይ ሀይሳዳ ሀንድ ሻከትስ። ዶሎሀፐ ዉሎሀ ጋካናዉ ደእያ እስ ሳማይ ብንያመ ኮቻስ እመቶ። 24 ብንያመ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ስሞና ኮቻስ እመቶ። 25 ስሞና ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ይሳኮራ ኮቻስ እመቶ። 26 ይሳኮራ ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ዛብሎና ኮቻስ እመቶ። 27 ዛብሎና ዛዋራ ኦይከትድ፥ ዶሎሀፐ ዉሎሀ ጋካናዉ ደእያ እስ ሳማይ ጋደ ኮቻስ እመቶ። 28 ጋደ ዱገሀ ዛዋይ ታማራ ካታማፐ ደንድድ፥ ማርባ ቃደሳን ደእያ ፑልቷ ጋክድ፥ ግብፀ ሻፋ ካልድ፥ መደትራነ አባ ጋኬስ።

29 “ህንተ እስራኤለ አሳስ ሻካና ቢታይ ሀይሳ፤ ሄስ ኤንታ ግሹዋ” ያግድ ኡባ ሃርያ ጎዳይ ኦድስ።

30 ካታማፐ ከይያ ፐንገት ሀይሳታ። ፑደሀ ባጋራ ደእያ ኦይዱ ሙኩሉነ እቻሹ ፄቱ አዱቅያ ፐንግያፈ ዶምድ፥ 31 ካታማ ፐንገት እስራኤለ ኮቻታ ሱንꬃን ፄገታና። ፑደሀ ባጋራ ደእያ ሄꬑ ፐንገት ሮቤላ ፐንገ፥ ይሁዳ ፐንገነ ሌወ ፐንገ ግዳና። 32 ዶሎሀ ባጋራ ኦይዱ ሙኩሉነ እቻሹ ፄቱ ዋꬋ አዱቅያ ሄꬑ ፐንገት፥ ዮሰፋ ፐንገ፥ ብንያመ ፐንገነ ዳነ ፐንገ ግዳና። 33 ዱገሀ ባጋራ ኦይዱ ሙኩሉነ እቻሹ ፄቱ አዱቅያ ሄꬑ ፐንገት፥ ስሞና ፐንገ፥ ይሳኮራ ፐንገነ ዛብሎና ፐንገ ግዳና። 34 ዉሎሀ ባጋራ ኦይዱ ሙኩሉነ እቻሹ ፄቱ ዋꬋ አዱቅያ ሄꬑ ፐንገት፥ ጋደ ፐንገ፥ አሴራ ፐንገነ ንፍታለመ ፐንገ ግዳና።

35 “ካታማ ዩሾይ ኩመꬅ ዋꬍን፥ ታማነ ሆስፑን ሙኩሉ ዋꬋ ግዳና። ሄ ዎደፐ ዶምድ ሄ ካታማይ፥ ‘ጎዳይ ያን ደኤስ’ ጌተትድ ፄገታና” ያጌስ።

<- ህዝቄላ ማፃፋ 47