1 ሄ ኡራይ ዛሪድ፥ ታና ፆሳ ኬꬃ ገልያ ፐንግያኮ ኤፍስ። ፆሳ ኬꬃ ገልያ ፐንግያፈ ጋርሳራ ሃꬅ ፑልትድ፥ ፆሳ ኬꬃፈ ዶሎሀ ባጋ ጎጌስ። ፆሳ ኬꬃስ ጋርሳ ባጋራ ዱገ ጎግድ፥ ያርሾ በሳፈ ጋርሳ ባጋራ ካንꬄስ። 2 እ ታና ቆሞ ፐንግያ ባጋራ ከስድ፥ ዶሎሀ ፐንግያኮ ዩሽስ። ሄ ፐንግያፈ ጋርሳ ባጋራ ሃꬅ ጎጌስ።

3 ሄ ኡራይ ዋꬋ ዎዶሮ ባ ኩሸን ኦይክድ፥ ዶሎሀ ባጋ ብድ፥ ጎግያ ሃꬃ ካልድ፥ እስ ሙኩሉ ዋꬍስ። ታና ሃꬃ ግዶራ ካለꬅስ፤ ሃꬃይ ታዉ ሹቁለ ጋክስ። 4 ዛሪድ እስ ሙኩሉ ዋꬍድ፥ ሃꬃ ግዶራ ታና ካለꬅስ። ሃꬃይ ታዉ ጉልባታ ጋክስ። ቃስ እስ ሙኩሉ ዋꬍድ፥ ታና ሃꬃ ግዶራ ካለꬅስ። ሄ ዎደ ሃꬃይ ታዉ ፄሰ ጋክስ። 5 እ ቃስ እስ ሙኩሉ ዋꬍስ። ሽን ሄ ሃꬃይ ዳሮ ጪሞ ግድያ ግሾ፥ ታ ፕናናዉ ዳንዳአብከ፤ እ አስ ዋꬎና ፕናናዉ ዳንዳኦና ሻፋ ግድስ። 6 ሄ ኡራይ ታኮ፥ “አሳ ናአዉ፥ ሀይሳ አኬካዳ በአይ?” ያግስ።

ሄሳፈ ጉየ፥ እ ታና ሻፋ ጋፃ ጉየ ዛርስ። 7 ታ ያ ጋክያ ዎደ ሻፋ ጋፃን ሀ ባጋራነ ያ ባጋራ ዳሮ ምꬅ ደኤይሳ በአስ። 8 እ ታኮ፥ “ሀ ሃꬃይ ዶሎሀ ባጋ ጎግድ፥ አራበ ዛንጋራነ ማፅነ አባን ገሌስ። ሃꬃይ ማፅነ አባ ገልያ ዎደ ማፅነ አባይ ኦራፅድ ፅሎ ሃꬅ ግዴስ። 9 ሻፋይ ጎግድ ብያ በሳን ዱማ ዱማ መተꬃት ደኦሶና። ሄ ሻፋይ ያራ ጎግያ ግሾነ ሄ ሃꬃ ኦራꬅድ ፅልስያ ግሾ ዳሮ ሞሎት ያን ደኦሶና። ሄሳ ግሾ ሃꬃይ ጎግያ በሳን ደእያ መተꬃት ኡባይ ደኦን ዳና። 10 ሞሎ ኦይክያ አሳት አባ ጋፃን ኤቃና፤ ኤንጋዳፐ ብድ ኤን ኤግላይማ ጋካናዉ ደእያ በሳይ ሞሎ ኦይካናዉ ግተ የግያ በሰ ግዳና። መደትራነ አባን ደእያ ሞሎታዳ፥ ያን ዳሮ ዱማ ዱማ ሞሎት ዳና። 11 ሽን አባ ጋፃን ደእያ ኤለይነ ጫፋ ሃꬃይ ማፅነ ግድድ አታናፐ አትሽን፥ ኦራፅድ ፅለና። 12 ሄ ሻፋ ዶናን ሀ ባጋራነ ያ ባጋራ ሜተትያ አይፈ እምያ፥ ዱማ ዱማ ቆሞ ምꬃት ደኦሶና። ኤንታ ሀይꬃይ ቆቆፈተና፤ አይፈ አጎኮና። ፆሳ ኬꬃፈ ከይያ ሃꬃይ ኤንታኮ ጎግያ ግሾ፥ ኤንቲ አጌናን አጌናን ኦራꬃ አይፈ አይፋና። ኤንቲ አይፍያ አይፈይ ካꬅ ግዳና፤ ኤንታ ሀይꬃይ ꬋለ ግዳና” ያጌስ።

13 ኡባ ሃርያ ጎዳይ ሀይሳዳ ያጌስ፦ “ታማነ ናምኡ እስራኤለ ዘረꬃስ ላታ ቢታ ኦꬃዳ፥ ነ ሻካና ዛዋይ ሀይሳ። ዮሰፋ ኮቻስ ናምኡ ሳም እመቶ። 14 ታኒ ካሰ ህንተ ማይዛታ ሀ ቢታ ላትሳናዉ ጫቃስ፤ ሀእ ህንተ ኡባይ ሻክድ ላትተ።

15 “ፑደሀ ባጋ ቢታ ዛዋይ ሀይሳ፦ መደትራነ አባፈ ደንድድ፥ ሄትሎናነ ሀማታ ካንꬅድ፥ ፀዳዳ ጋኬስ። 16 ዳማስቆፈነ ሀማታፐ ግዶን ደእያ በሮታነ ስብራይማ ካታማታ ካንꬅድ፥ ሀዉራና ዛዋን ደእያ ትኮና ካታማ ጋኬስ። 17 እስራኤለ ቢታ ፑደሀ ባጋ ዛዋይ ሀማታ ቢታ ፑደሀ ባጋን አግድ፥ መደትራነ አባፈ ዶሎሀ ባጋ ብድ፥ ዳማስቆ ዛዋን ደእያ ሀፃር-ኤናና ካታማ ጋኬስ።

18 “ዶሎሀ ባጋ ዛዋይ ሀፃር-ኤናናፐ ደንድድ፥ ዳማስቆፈነ ሀዉራናፐ ግዱዋራ ካንꬄስ። እስራኤለፐነ ጋላዳፐ ግዶን ደእያ ዮርዳኖሰ ሻፋን ዛዋትድ ማፅነ አባ ካንꬅድ ታማረ ካታማ ጋኬስ።

19 “ዱገሀ ባጋ ዛዋይ ታማራፐ ደንድድ፥ ማርባ ቃደሳን ደእያ ሃꬃ ጋኬስ። ያፐ ግብፀ ሻፋፐ ብድ መደትራነ አባ ጋኬስ። ሄስ ዱገሀ ዛዋ።

20 “ዉሎሀ ባጋ ዛዋይ መደትራነ አባ ግድድ፥ ፑደሀ ባጋራ ሀማታ ስንꬃራ ካንꬅድ ዉሎሀ ባጋ ጋኬስ።

21 “ሀ ቢታ እስራኤለ ዛረት ሻክድ ኤክተ። 22 ህንተነ ህንተ ግዶን ናአ የልድ ደእያ በተ አሳስ ላታ ቢታ ኦꬅድ ሻክተ። ኤንታ ህንተ፥ ህንተ ቢታን የለትዳ እስራኤለ አሳዳ ፄልተ። ኤንቲ እስራኤለ ኮቻታራ ታይበትድ ቢታ ሳማን ሻከትድ ኤኮ። 23 በተ አስ እስራኤለን ኮቻራ አዉንካ ደእኮ፥ ሄ እ ደእያ ኮቻ ግዶን እያዉ ላታ ቢታ እምተ” ያጌስ ኡባ ሃርያ ጎዳይ።

<- ህዝቄላ ማፃፋ 46ህዝቄላ ማፃፋ 48 ->