1 እስ ዎደ ሀይሳዳ ሀንስ። ዳዊታ ናኣ አበሰሎመስ ትማሮ ጌተትያ እስ ማላ ሎኦ ምቻ ደአዉሱ። ዳዊታ ናአይ አምኖን ትማሮ ዶስስ። 2 አምኖን ባ ምችዉ ትማሮ ዶስዳ ግሾ እዮ ቆፕሸ ዳሮ ግልቅስ። እያ ጌላኦ ግድዳ ግሾ እዮ አይኮካ ኦꬃናዉ ዳንዳኤቶናባ እያዉ ዳንስ።

3 ሽን አምኖናስ ዳዊታ እሻ ሳማ ናኣ እዮናዳባ ጌተትያ ላገይ ደኤስ፤ እዮናዳብ ዳሮ ኤጫ አስ። 4 እዮናዳብ፥ “ኔኒ ካዎ ናአ ግዳሸ ዎንታ ዎንታ አይስ ግልቃይ? ኔኒ ታዉ አይስ ኦድኪ?” ያግድ አምኖና ኦይችስ።

አምኖን፥ “ታ እሻ አበሰሎመ ምችዉ ትማሮ ታኒ ዶሳስ” ያግስ።

5 እዮናዳብ፥ “ሀርገትያ አሳዳ ሀናዳ ሂፃን ዝንአ። ነ አዋይ ነና በአናዉ ያ ዎደ፥ ‘ታ ምችያ ትማራ ያዳ ታዉ ምያባ እሞ፤ ታኒ እዮ በእሽን ታ ስንꬃን ካꬃዳ ታና ባርሶ’ ያጋዳ ኦይቻ” ያግስ።

6 አምኖን ሀርገትዳ አሳዳ ሀንድ ሂፃን ዝንእስ። ካዎይ እያ በአናዉ ያ ዎደ አምኖን፥ “ታ ምችያ ትማራ ያዳ፥ ታ በእሽን ታ ስንꬃን ኡይꬅ ኡካዳ ታና ባ ኩሸራ ባርሶ” ያግስ።

7 ዳዊቲ፥ ካዎ ጋꬎን ደእያ ትማርኮ ኪትድ፥ “ነ እሻ አምኖና ሶ ባዳ እያዉ ካꬅ ካꬃ” ያግስ። 8 ትማራ ባ እሻ አምኖና ሶ ባሱ፤ ሄ ዎደ እ ሂፃን ዝንእስ። ትማራ ጉꬃ ꬊለ ሙኑቃዳ አምኖን በእሽን ኡይꬅ ኡካሱ። 9 ትማራ ኡይꬃ ባሸፐ ከሳዳ እያዉ አꬃሱ፤ ሽን እ ሞና እፅስ።

አምኖን፥ “አሳ ኡባ ካረ ከስተ” ያግን፥ አሳ ኡባይ እያ ማታፐ ከይስ። 10 ሄሳፈ ጉየ አምኖን፥ “ታኒ ነ ኩሸፐ ማና መላ ካꬃ ሃ ቆልአ ኤካዳ ያ” ያግስ። ትማራ ባ ኡክዳ ኡይꬃ ኤካዳ፥ ባ እሻ አምኖና ስን ሺሻሱ። 11 ትማራ ካꬃ እያኮ ሺሽያ ዎደ እዮ ኦይክድ፥ “ታ ምቸ፥ ሃያ! ታራ ዝንአ” ያግስ።

12 እያ፥ “ታ እሻዉ፥ አካይ ሀነና! ታና ዎልቃንꬆፋ! ሀይሳ መላባይ እስራኤለን ሀን ኤረና፤ ሀይሳ መላ ቦርሶባ ኦꬆፋ። 13 ታ ፖኩዋ ታኒ ዋታዳ ገንꬃናዉ ዳንዳእያና? ቃስ ነካ እስራኤለ ግዶን ካዉሻ አስ ግዳና። ሀያና ካዋ ኦይቻ፤ ታኒ ነና ገላናይሳ እ ድገና” ያጋሱ። 14 ሽን እ እዮ ስኦና እፅስ። እ ዎልቃማ ግድያ ግሾ፥ እዮ ዎልቃን ኦይክድ ኢስስ።

15 ሄሳፈ ጉየ፥ አምኖን እዮ ዳሮ እፅስ፤ ካሰ እዮ ዶስዳይሳፈ አꬅድ እፅስ። አምኖን፥ ደንዳ፥ “ከያ! ከያዳ ባ!” ያግስ።

16 እያ፥ “ኔኒ ታና ከያዳ ባ ገይስ ካሰ ነ ታ ቦላ ኦꬅዳ ኢታፐ አꬌስ” ያጋሱ።

ሽን እ እዮ ስኦና እፅስ። 17 አምኖን ባ አይልያ ፄግድ፥ “ሀ ማጫስዉ ታ ስንꬃፈ ከሳ፤ እዮ ካረ ከሳዳ ዉላ ጎርዳ” ያግስ። 18 አይለይ እዮ ካረ ከስድ ዉላ ጎርድስ።

ጌላኦ ግድዳ ካዎ ማጫ ናይት ማእያ አሌቆ ማኦ ማአሱ። 19 ትማራ ብዶ ባ ሁጰን ቆላዳ፥ ባ ማእዳ አሌቆ ማኡዋ ዳካዳ፤ ባ ሁጵያ ኦይካዳ፥ ዋሶ ጎቻሸ ባሱ።

20 እ እሻ አበሰሎመይ እዮ በእዳ ዎደ፥ “ነ እሻይ አምኖን ነና ኢስዴ? ታ ምቸ፥ ኔኒ ሀእ ስእ ጋ። እ ነ እሻ፤ ሀ ኦዳ ነ ኡሎን ኦይኮፋ” ያግስ። ያትን፥ ትማራ አዛናሸ፥ አሳን ከዮና ባ እሻ አበሰሎመ ሶን ደአሱ።

21 ካዎይ ዳዊቲ ሀ ኦዳ ስእዳ ዎደ ዳሮ ይሎትስ። 22 አበሰሎመይ አምኖናኮ ጫማ ማልአ ፖግቤና። ባ ምችዉ ትማሮ ኢስዳ ግሾ አምኖና ሞርክስ።

23 ናምኡ ላይꬃፈ ጉየ፥ ኤፍሬማ ዛዋ ማታን ሀፆራ ጌተትያ በሳነ አበሰሎመይ ዶርሳ እክሰ ሜዴስ። ካዋ አደ ናይት ኡባይ ሄ በሳ ያና መላ አበሰሎመ ኤንታ ፄግስ። 24 አበሰሎመይ ካዋኮ ብድ፥ “ታኒ ነ አይለይ ታ ዶርሳታ እክስያ ሜድሳይስ፤ ነነ ነ ሞርናት ኑራ የርከቲ?” ያግስ።

25 ካዎይ፥ “አካይ፥ ታ ናአዉ! ኑ ኡባይ ቢኮ፥ ነዉ ቶሆ ግዳና” ያግስ። አበሰሎመይ ካዋ ዳሮ ሾቢንካ ካዎይ ቦና እፅስ፤ ሽን አበሰሎመ አንጅስ።

26 አበሰሎመይ፥ “ኔኒ ቦና እፅኮ፥ ታ እሻ አምኖን ኑራ ቦ” ያግስ።

ካዎይ፥ “እ ኔራ አይስ ቢ?” ያግስ። 27 ሽን አበሰሎመይ ሾቢድ አጎና እፅን፥ ዳዊቲ አምኖናነ ባ አደ ናይታ እያራ የድስ።

28 አበሰሎመይ ባ አይለታኮ፥ “አምኖን ዎይነ ኡይድ ማꬆትያ ዎደ ታኒ ህንተና፥ ‘አምኖና ሾጭተ’ ያጋዳ ኪትያ ዎደ እያ ዎꬍተ። ያዮፍተ! ህንተና ኪተይ ታና። ምንተ! ፃልተ!” ያግድ ኪትስ። 29 አበሰሎመ አይለት እ ኪትዳይሳዳ አምኖና ዎꬍዶሶና። ሄሳፈ ጉየ፥ ካዋ አደ ናይት ኡባይ ደንድድ፥ ባንታ ባቁሉዋ ባቁሉዋ ቶግድ ባቃትዶሶና።

30 ኤንቲ ቡሮ ኦገ ቦላ ደእሽን፥ “አበሰሎመየ ካዋ ናይታ ኡባ ዉርስስ፤ ኤንታፈ እሶይካ አትቤና” ጌተትያ ዎረይ ዳዊታ ጋክስ። 31 ካዎይ ደንድ ኤቅድ፥ አዛንድ፥ ባ ማኡዋ ዳክድ ቢታን ዝንእስ። እያ አይለት ኡባይ ባንታ ማኡዋ ዳክድ፥ እያ ማታን ኤቅዶሶና።

32 ዳዊታ እሻ ሳማ ናአይ እዮናዳብ፥ “ታ ጎዳዉ፥ ካዎ ናይት ኡባይ ሀይቅዶሶና ጋዳ ቆፖፋ፤ አምኖና ፃላል ሀይቅስ። አምኖን ባ ምችዉ ትማሮ ኢስዳ ጋላሳፐ ዶምን፥ አበሰሎመይ እያ ቦላ ኦꬃናዉ ቆፕዳባይ ሀንስ። 33 ህዛ ሀይቅዳይ አምኖና ፃላላ ግድያ ግሾ፥ ‘ካዋ አደ ናይት ኡባይ ሀይቅዶሶና’ ግያ ዎርያ ካዎይ ቱማ ጎፖ” ያግስ።

34 ሄ ዎደ አበሰሎመይ ባቃትስ።

ናግያ አደይ ꬎቁ ግድ ፄልያ ዎደ ዉሎሀ ባጋራ ደእያ ኦግያራ ደረ ላንቅያ ኦይክድ ዳሮ አሳይ የይሳ በእድ ካዋስ ኦድስ። 35 ሄ ዎደ እዮናዳብ፥ “ሄኮ፥ ታኒ ነ አይለይ ኦድዳይሳዳ ካዋ አደ ናይት ይዶሶና” ያግስ።

36 እ ኦድ ዉርስያ ዎደ ካዋ አደ ናይት ገልድ ባንታ ቃላ ꬎቁ ኦꬅድ ዋስዶሶና። ቃስ ካዎይነ እያ ሞርናት ኡባይ ይባታ ዬሆ ዬክዶሶና።

37 አበሰሎመይ ባቃትድ፥ ገሹራ ካዎ ግድዳ አምሁዳ ናኣ ታልማያኮ ብስ። ሽን ካዎይ ዳዊቲ ባ ናኣስ ዳሮ ጋላስ ዬክስ።

38 አበሰሎመይ ባቃትድ ገሹራ ቢታ ብዳፐ ጉየ ያን ሄꬑ ላይꬅ ደእስ። 39 ካዎይ ዳዊቲ አምኖና ሀይቁዋን ጋክዳ አዛንያፐ ምንዳ ግሾ፥ አበሰሎመ በአናዉ ላሞትስ።

<- 2 ሳሜላ ማፃፋ 122 ሳሜላ ማፃፋ 14 ->