1 ጎዳይ ናብያ ናታና ዳዊታኮ ኪትን፥ ናታን እያኮ ይድ፥ “እስ ካታማን ናምኡ አሳት ደኦሶና፤ ኤንታፈ እሶይ ዱረ፤ ቃስ ሀንኮይ ማንቆ። 2 ዱረ አድያስ ዳሮ ዶርስነ መሄይ ደኤስ። 3 ሽን ማንቆ አድያስ ሻምድ ሄምያ እስ ዶርሳ ማሬፐ አትሽን፥ ሀር ባዋ። ሄ ዶርስያ እያ ሶን እያ ናይታራ እስፈ ድጫሱ። እ ባ ምያ ካꬃፈ ሙዜስ፤ ባ ኡያ ኡሻፈ ኡሼስ፤ እያ እያ ክኦነ ዝንአዉሱ። ሄ ዶርስያ እያዉ ማጫ ናአ መላ።

4 “እስ ጋላስ እስ እማꬅ ዱርያ ሶ ይስ። ዱረይ ባ ዶርሳፈ ዎይኮ ባ መሄፐ ሹክድ፥ እማ ሞካናዉ ኮይቤና። ሽን እ ሄ ማንቆ አድያ ዶርስዉ ኤክድ፥ ሄ እማꬃስ ምያባ ጊግስስ” ያግስ።

5 ዳዊቲ ሄ ዱረ አድያ ቦላ ሸነ ኤፅድ፥ “ደኦ ጎዳይ ኤርያ መላ፥ ሀይሳ ኦꬅዳ አደይ ሀይቃናዉ በሴስ። 6 ቃስ ቃይ ባይና እ ሄሳ ኦꬅዳ ግሾ፥ ሄ ዶርሳ ማረ ግሾ ኦይዱ ኩሸ ዛራናዉ ኮሼስ” ያግስ።

7 ናታን ዳዊታኮ፥ “ሄ አደይ ነና! ጎዳይ እስራኤለ ፆሳይ ሀይሳዳ ያጌስ፤ ‘ታኒ ነና እስራኤለ ቦላ ትያዳ ካዎꬃስ፤ ሳኦላ ኩሽያፐ ነና አሻስ። 8 ታኒ ነ ጎዳ፥ ሳኦላ ኬꬃ ነዉ እማስ፤ ነ ጎዳ ማቸታ ነ ክኦን የጋስ። እስራኤለ አሳነ ይሁዳ አሳ ታኒ ነዉ እማስ። ሀ ኡባይ ጉፅስ ጊኮ፥ ታኒ ነዉ ሀራ ጉጃ እማናሽን። 9 ሀይሳ መላ ኢታባ ጎዳ ስንꬃን ኦꬃዳ፥ አይስ ጎዳ ቃላ ካꬋዲ? ህተ አድያ ኦርዮና ማሻን ዎꬋዳሳ፤ እያ ማችዉ ነው ኤካዳሳ። አሞነ አሳታ ማሻን እያ ዎꬋዳሳ። 10 ኔኒ ታና ካꬋዳ፥ ህተ አድያ ኦርዮና ማችዉ ኤክዳ ግሾ ነ ሶ አሳፐ ማሽ ሻከተና’ ” ያጌስ።

11 ጎዳይ ሀይሳዳ ያጌስ፤ “ታኒ ነ ሶ አሳ ግዶፈ ነ ቦላ ኢታ ኤሀና፤ ነ ማቸታ ኔኒ ፄልሽን ደንꬃዳ፥ ነዉ ማትያ አድያስ እማና፤ ሴታ ጋላስ ሄ አደይ ነ ማቸታራ ዝንአና። 12 ኔኒ ሄሳ ጌማን ኦꬃዳሳ፤ ሽን ታኒ ሴታ ጋላስ እስራኤለ አሳ ኡባ ስንꬃን ኦꬃና” ያግስ።

13 ያትን፥ ዳዊቲ፥ “ታኒ ጎዳ ቦላ ናጋራ ኦꬃስ” ያግስ።

ናታን፥ “ጎዳይ ነ ናጋራ አቶ ግስ፤ ኔኒ ሀይቃካ። 14 ሽን ነ ሀይሳ ኦꬃዳ፥ ጎዳ ሞርከት እያ ካꬋና መላ ኦꬅዳ ግሾ የለትዳ ናአይ ቱማ ሀይቃና” ያግስ።

15 ናታን ባ ሶ ብዳፐ ጉየ፥ ኦርዮና ማችያ ዳዊታስ የልዳ ናኣ ጎዳይ ሾጭን እ ሀርግስ። 16 ዳዊቲ ባ ናኣ ግሾ ፆሳ ዎስስ፤ ዳዊቲ ፆምስ፤ ባ ክፍልያ ገልድ ቃማ ቃማ ሳአን ዝንእ አቄስ። 17 እያ ሶ ጭማት እያ ሳአፐ ደንዳና መላ እያ ማታን ኤቅድ ዎስዶሶና፤ ሽን እ ደንዶና እፅስ፤ እ ኤንታራ ካꬅ ምቤና።

18 ላፑንꬃ ጋላስ ናአይ ሀይቅስ። ዳዊታ አይለት ናኣ ሀይቁዋ ኦዳናዉ ያይድ፥ “ናአይ ፓፃ ደእሽን ኑኒ ዳዊታስ ኦድን፥ ስኦና እፅስ። ያትን፥ ናአይ ሀይቅዳይሳ ኑኒ ዋትድ እያዉ ኦዳኔ? ኦን ኤር፥ እ ባና ቆሀነኮሺ?” ያግዶሶና።

19 ባ አይለት እሶይ እሱዋራ ካልካሸይሳ ዳዊቲ ስእዳ ዎደ ናአይ ሀይቅዳይሳ ኤርስ። ዳዊቲ፥ “ናአይ ሀይቅዴ?” ያግድ ኦይችስ።

ኤንቲ፥ “ኤ ሀይቅስ” ያግዶሶና።

20 ያትን፥ ዳዊቲ ሳአፐ ደንድድ ሜጨትስ፤ ቅባተ ትየትስ፤ ባ ማኡዋ ላምድ፥ ጎዳ ኬꬅ ገልድ ጎይንስ። ሄሳፈ ጉየ ባ ሶ ብድ፥ ካꬅ ኦይችን፥ ኤንቲ እያ ስን አꬅን ምስ።

21 እያ አይለት፥ “ኔኒ ሀይሳዳ አይስ ሀናዲ? ናአይ ፓፃ ደእሽን ፆማዳሳነ ዬካዳሳ፤ ሽን ናአይ ሀይቅን ደንዳዳ፥ ካꬅ ማዳሳ” ያግዶሶና።

22 ዳዊቲ፥ “ናአይ ፓፃ ደእሽን ታኒ ፆማስነ ዬካስ፤ ጎዳይ ታና ማርን፥ ናአይ ፓፃነኮነ” ጋዳ ቆፓስ። 23 ሽን፥ “ናአይ ሀይቅን፥ ታኒ አይስ ፆሞ? ታኒ ናኣ ጉየ ዛራናዉ ዳንዳእያና? ታኒ እያኮ ባናፐ አትን፥ እ ታኮ ዬና” ያግስ።

24 ሄሳፈ ጉየ፥ ዳዊቲ ባ ማችዉ በርሳቦ ምንꬅስ። ዳዊቲ ኢኮ ገልድ ኢራ አቅስ፤ እያ እያዉ አደ ናአ የላሱ። ናኣ ሶሎሞነ ግድ ሱንꬅስ፤ ጎዳይ ሄ ናኣ ዶስስ። 25 ጎዳይ ናኣ ዶስዳ ግሾ፥ እያ ሱንꬃ “ይድድያ” ግድ ሱንꬃና መላ ናብያ ናታና ኪትስ።

26 ሄ ዎደ እዮኣብ አሞነታ ካታማ ራባ ኦልድ ካዎ ሚፃ ኦይክስ። 27 እዮኣብ ዳዊታኮ፥ “ታኒ ራባ ካታማ ኦላዳ፥ ሃ ዱቅያ በሳ ኦይካስ። 28 ሀእ አትዳ ኦላንቾታ ሺሻዳ ካታማ ኦላዳ ኦይካ። ሄስ ሀኖና እፅኮ፥ ታኒ ካታማ ኦይካዳ ታ ሱንꬃን ፄገታና መላ ኦꬃና” ያግስ።

29 ዳዊቲ ባ ኦላንቾታ ኡባ ሺሽድ፥ ራባ ካታማ ብድ፥ ኦልድ ኦይክስ። 30 ኤንታ ካዋ ካላቻ እያ ሁጰፐ ኤክስ። ሄ ዎርቃ ካላቻይ ሀስታማነ እቻሹ ክሎ ግራመ ዴፄስ። እያ ግዶን እንቆ ጌተትያ አልኦ ሹች ደኤስ። ሄ ካላቻ ዳዊቲ ባ ሁጰን ዎꬅስ። ዳዊቲ ካታማፐ ዳሮ ድኦ ድእስ። 31 ሄ ካታማን ደእያ አሳ ከስድ፥ ማጋዘን፥ ብራታ ኮንተንነ ብራታ ካልታን ኦꬃና መላ ኦꬅስ። ቃስ ኤንቲ ፁበ መꬋና መላ ኦꬅስ። አሞነ ካታማ ኡባን ደእያ አሳ እ ሀይሳዳ ኦꬅስ። ሄሳፈ ጉየ፥ ዳዊቲነ እያ ኦላንቾት የሩሳላመ ስምዶሶና።

<- 2 ሳሜላ ማፃፋ 112 ሳሜላ ማፃፋ 13 ->