8 ሽን ታ ሲቆ እሻቶ፥ ሀ እስባ ዶጎፕተ። ጎዳ ማታን እስ ጋላስ ሙኩሉ ላይꬃ መላ ግደይሳነ ሙኩሉ ላይꬅ እስ ጋላሳ መላ ግደይሳ ዶጎፕተ። [d] 9 እሶት እሶት ጋምእስ ግድ ቆፐይሳዳ፥ ጎዳይ ባ ኡፋይሳ ቃላ ግሾ ጋምኤና። ሽን ኦንካ ꬋዮና መላ ኮይድ፥ ኡባይ ባንታ ናጋራፐ ስማና መላ ህንተ ግሾ ግድ ገንጬስ።
10 ሽን ጎዳ ጋላሳይ ካይሶዳ ያና። ሄ ጋላሳን ሳሎት ዎልቃማ ጉንꬃን ꬋያና፤ ሳሎ መተꬃት ታማን ፁገታና፤ ሳእነ እያ ቦላ ደእያ ኡባይ ꬋያና።[e] 11 ህዛ፥ ኡባባይ ሄሳዳ ሀንዳ ꬋይያባ ግድኮ ህንተ አይ መላ አስ ግዳናዉ በሲ? ህንተ ጌሽነ ፆሳ ዳንያ ደኦ ዳናዉ በሴስ። 12 ህንተ ስንꬃራ ያ ፆሳ ጋላሳ ናግሸ ህንተዉ ዳንዳኤትያባ ኡባ ኦꬅድ ሄ ጋላሳ ኤሶይተ። ሄ ጋላስ ሳሎትነ እያን ደእያባይ ታማን ፁገታና፤ ዎልቃማ ሱላን ትልአና። 13 ሽን ኑኒ ፅሎተꬅ ሃርያ ኦራꬃ ሳሎነ ኦራꬃ ሳአ ፆሳ ኡፋይሳ ቃላዳ ናጎስ። [f]
14 ሄሳ ግሾ፥ ታ ሲቆ እሻቶ፥ ኑ ሄ ጋላሳ ናግያ ግሾ ፖኮይነ ቦረይ ባይናይሳታ ግድድ፥ ጎዳራ ሳሮን ዳናዉ ምንተ። 15 አስ ኡባይ አታና መላ ኮይድ ጎዳይ ዳንዳኤይሳ ዶጎፕተ። ቃስ ኑ ሲቆ እሻይ፥ ጳዉሎስ፥ ፆሳይ እያዉ እምዳ ጭንጫተꬃን ሄሳዳ ህንተዉ ፃፍስ። 16 እ ባ ዳብዳበታ ኡባን ሄሳታባ ፃፍስ። እያ ዳብዳበታ ግዶን አኬካናዉ ዋይስያ ቆፋት ደኦሶና። ታማርቦናነ ምንቦና አሳት ሀራ ፆሳ ቃላ ምርቀይሳዳ ሀ ኪታታካ ꬋያናዉ ማችድ ምርቆሶና።
17 ሄሳ ግሾ፥ ታ ሲቆ እሻቶ፥ ህንተ ሄሳ ኤርያ ግሾ ማካላታ ባላን ጭመትድ፥ ꬋዮና መላነ ምንድ ደእያ በሳፈ ኩንዶና መላ ናገትተ። 18 ሽን ህንተ ኑና አሽያ ኑ ጎዳ፥ የሱስ ክርስቶሳ አꬎ ኬሀተꬃንነ ኤራተꬃን ድጭተ። እያዉ ሀእካ መርናዉካ ቦንቾይ ግዶ። አምንእ።
<- 2 ጰፅሮሳ ኪታ 2