1 ሽን ዎርዶ ናበት ካሰ አሳ ግዶን ደኤይሳ መላ ሀእካ ዎርዶ አስታማረት ህንተ ግዶን ደንዳና። ኤንቲ ባንታና ዎዝዳ፥ ጎዳ ካድድ፥ ꬋይስያ ዎርዶ ትምርትያ ኤሀና። ሄሳን ኤንቲ ባንታ ቦላ ኤለስድ ꬋዮ ኤሆሶና። 2 ዳሮ አሳይ ዬላይያ ኤንታ ኢታ ኦግያ ካላና፤ ኤንታ ጋሶን ቱማ ኦገይ ጫየታና። 3 ዎርዶ አስታማረት ሚሸ ያርድ ባንታዉ መꬍ ከስዳ ሀይሰን ህንተና ቦንቃና። በንፐ ዶምድ ኤንታ ፕርዳይ ጊግድ ኡትስ፤ ኤንታ ꬋዮይካ ኤንታና ናግድ ኡትስ።

4 ናጋራ ኦꬅዳ ኪታንቾታስ ፆሳይ ቃቶና፥ ፕርዳ ጋላስ ጋካናዉ ጋናመ ꬉማ ኦላን ኤንታ ቃች የግስ። 5 ሄሳዳካ፥ ፆሳይ ፅሎተꬃባ ኦድያ ኖሄነ ሀራ ላፑን አሳታ አሽድ፥ ፆሳ ጎይኖና አሳይ ደእያ በን አላምያ ቃቶና ꬋዮ ሃꬃን ꬋይስስ።[a] 6 ጌላታስ ሌምሶ ግዳና መላ ፆሳይ ሶዶመነ ጋሞራ ካታማታ ብዶ ኦꬅድ ፁግድ ꬋይስስ።[b] 7 ህገስ ኪተቶና ላይማትያ አሳታ ግዶን ዋየትሸ ደእዳ ፅሎ ሎፀ ፆሳይ አሽስ። [c] 8 ሄ ፅሎ አደይ ኤንታ ግዶን ደእሸ፥ ኤንቲ ኦꬅያ ኢታ ኦሱዋ ጋላስ ጋላስ በእዳ ዎደነ ስእዳ ዎደ እያ ሎኦ ዎዛናይ ኡንኤቴስ። 9 ሄሳ ግድኮ፥ ጎዳይ፥ ባና ጎይንያ አሳታ ፓጨፐ ዋት አሻነኮ፥ ቃስ ናጋራንቾታ ፕርዳ ጋላሳስ ጋካናዉ ዋትድ ሴርሸ ናግሳኔኮ ኤሬስ። 10 ኡባፈ አꬅድ ቱና አሞን አሾ ቆፋ ካለይሳታነ ማታ አዋታ ካይሳታ፥ ፕርዳ ጋላስ ጋካናዉ ጎዳይ ናግስስ።

ሄ አሳት ጋንጀ ምኖነ ኦቶራንቾ ግድያ ግሾ፥ ሳሎ መተꬃታ ጫይሸ ያዮኮና። 11 ሽን ኪታንቾት ዎርዶ አስታማረታፐ ዎልቃንነ ምኖተꬃን ዳሮ አꬎሶናሽን ጎዳ ስንꬃን ሳሎ መተꬃታ ጫዮኮና። 12 ሽን ሄ አሳት ባንታ ኤሮናባን ገልድ ጫዮሶና። ኤንቲ ኦይከታናዉነ ሀይቃናዉ የለትዳ፥ ዎዛን ባይና ዶአ መላ ሀኖሶና፤ ኤንትካ ዎራ ዶአዳ ጮ ꬋያና።

13 ኤንቲ ጋꬅዳ መቱዋዳ ዛር መቶታና። ሴታ ጋላስ የፅሸ ጉፐይሳ ኡፋይስያባ ግድ ቆፖሶና። ኤንቲ ካዉሻታነ ቱናታ ግድ ደእሸ ህንተራ ሻከትያ ሲቆ እማቱዋን ኡፋይቶሶና። 14 ላይማትያ ማጫስ ፄልድ አጎና አይፈይ ኤንታዉ ደኤስ፤ ቃስ ናጋራ ኦይሳ አጎኮና። አማኖን ምንቦና አሳ ጭሞሶና። ኤንታዉ ኡባ ዎደ አሞትያ ዎዛን ደኤስ፤ ኤንቲ ባደትዳይሳታ። 15 ኤንቲ ሱረ ኦገ አግድ፥ ማካላ ሚሸ ሲቅድ ባልዳ፥ ብኦራ ናኣ ባላማ ኦግያ ካልዶሶና። [d] 16 እ ባ ናጋራ ጋሶን ሀንቀትስ፤ ዶን ባይና ሀረይ አሳዳ ሃሳይድ ናብያ ጎሻተꬃ ተቅስ።

17 ሄ አሳት መልዳ ፑልቶታ መላነ ጫርኮይ ቶክድ ኤፍያ ሻራ መላ፤ ኤንታ ናገይ ሳካና ꬉማ። 18 ኤንቲ ሀዳነ ኦቶሮ ኦዳ ኦደትሸ ባላን ደእያ አሳ ግዶፈ ከስ ኤክድ ቡሮ ምንቦና አሳታ ላይማተꬃ አሾ አሞን ጭምድ ባለꬆሶና። 19 ኤንቲ ባንታዉ ꬋዮ አይለተꬃን ደእሸ ሀራታኮ፥ “ህንተ አይለተꬃፈ ከያና” ያጎሶና። አይስ ጊኮ፥ አስ ባ ፆነትዳባ ኡባስ አይለ። 20 ኤንቲ አሽያ ኑ ጎዳ የሱስ ክርስቶሳ ኤርድ ሀ አላምያ ቱናተꬃፈ ከስ ኤክዳፐ ጉየ፥ ዛር ቃፀትድ ፆነትኮ ካሰ ደእያ ደኡዋፐ ጉየይስ ኤንታዉ ኢታ ግዳና። 21 ኤንቲ ፅሎተꬃ ኦግያ ኤር ስሚድ አገይሳፈ ኮይሮትድ ጌሻ ኪታ ኤሮናኮ ኤንታዉ ሎኦሽን። 22 “ካን ባ ጮሻኮ ጉየ ስሜስ” ቃስ፥ “ሜጨትዳ ጉዱንꬆይ ጉየ ስሚድ ኡርቃን ጎንዶረቴስ” ግያ ሌምሶይ ቱማ ግደይስ ኤንታ ቦላ ኦꬄስ።[e]

<- 2 ጰፅሮሳ ኪታ 12 ጰፅሮሳ ኪታ 3 ->