1 ናበይ ኤልስ ናበታ ጩጋፐ እስ አስ ፄግድ፥ “ነ ማኡዋ ማአዳ፥ ፃሮ ዛይትያ ነ ኩሸን ኦይካዳ፥ ጋላዳን ደእያ ራሞታ ባ። 2 ያ ጋካዳ፥ እዮሳፈፃ ናኣ፥ ናምሳ ናኣ ናኣ እዩ ኮያ። እያ ደማዳ፥ እያ ላገታፐ እያ ሻካዳ ቆልአ ገልሳ። 3 ሄሳፈ ጉየ፥ ፃሮ ዛይትያ ኤካዳ፥ እያ ሁጵያን ትጋዳ፥ ‘ነና እስራኤለ ቦላ ካዎ ኦꬃ ትያና መላ ጎዳይ ታና ኪትስ’ ያጋ። ያታዳ ፐንግያ ዶያዳ፥ ኤለሳዳ ባቃታ” ያግስ።

4 ሄሳ ግሾ፥ ፓንꬃ ናበይ ጋላዳን ደእያ ራሞታ ብስ። 5 እ ያ ጋክዳ ዎደ ቶራ ሞጮናይ እስፈ ዞረትሽን ደምድ፥ “ጎዳዉ፥ ታኒ ነዉ ኦድያባይ ደኤስ” ያግስ።

እዩይ፥ “ኑ ግዶፈ ኦደስ ኦዳኔ?” ያግድ ኦይችስ።

ናበይ፥ “ጎዳዉ፥ ነዉ ኦዳና” ያግድ ዛርስ። 6 እዩይ ደንድድ ሶ ገልን፥ ናበይ እያ ሁጰን ዛይተ ትግድ፥ “ጎዳይ እስራኤለ ፆሳይ፥ ነና ሀይሳዳ ያጌስ፥ ‘ኔኒ ጎዳ ደርያ፥ እስራኤለ ቦላ ካዎታና መላ ታኒ ነና ትያስ። 7 ኔኒ ነ ጎዳ አካባ ኮቻ ꬋይሳና። ታኒ ኤልዛቤላ ጉስዳ ናበታ፥ ታ አይለታ ሱꬃነ ታ ሀራ አይለታ ሱꬃ ሃሉዋ ከሳና። 8 አካባ ኮቻ ኡባይ ꬋያና፤ ታኒ እስራኤለን አካባ ኮቻፈ አይለ ግድን፥ ዎማኖ ግድን፥ አደ ኡባ ꬋይሳና። 9 አካባ ኮቻ ናባፃ ናኣ እዮርባማ ኮቻዳነ አክያ ናኣ ባኦሳ ኮቻዳ ኦꬃና። 10 ኤልዛቤሎ፥ እዝራኤላ ጎሻን ካናት ማና፤ ኦንካ እዮ ሞገና’ ” ያግስ። ሄሳ ኦድዳፐ ጉየ፥ ፐንግያ ዶይድ ባቃትስ።

11 እዩይ ባ ላገ ግድዳ ቶራ ሞጮናታኮ ብዳ ዎደ፥ ኤንቲ፥ “ሳእ ሳሮ? ሀ ጎሻይ ኔኮ አይስ ይዴ?” ያግድ ኦይችስ።

እዩይ፥ “ሀ አድያባነ እያ ኦዳ ህንተ ኤሬታ” ያግስ።

12 ኤንቲ፥ “ሀይስ ዎርዶ። አነ ኔኒ ኑስ ኦዳ” ያግዶሶና።

እዩይ፥ “ኔኒ እስራኤለ ቦላ ካዎ ግዳና መላ ታኒ ነና ትያናዳ ጎዳይ ታና ኪትስ” ያግስ።

13 ሄ ዎደ ኤንቲ ባንታ ማኡዋ ቃርድ፥ እዩይ የꬍድ ከይያ ደꬃን ሂፅድ፥ ሞይዘ ፑንዶሶና። ባንታ ቃላ ꬎቁ ኦꬅድ፥ “እዩይ ካዎትስ” ያግዶሶና።

14 እዮሳፈፃ ናአይ፥ ናምሳ ናኣ ናአይ እዩይ፥ እዮራማ ቦላ ማቀትስ። ሄስ ሀንያ ዎደ፥ እስራኤለ አሳ ኡባይ አራመ ካዋ አዛሄላ ጋላዳን ደእያ ራሞታን ናጋናዉ ብዶሶና። 15 ሽን ኤንታፈ ካዎይ እዮራም ሶረ ካዋ አዛሄላራ ኦለትዳ ዎደ፥ አራመ ቢታ አሳይ እያ ጫድዳ ጫቻስ እዝራኤለ ይስ።

እዩይ ሀላቃታ፥ “ህንተ ቆፋይ ሄሳ ግድኮ፥ ሀ ካታማፐ እስ አስካ ከይድ፥ እዝራኤለ ካታማን ሀ ኦዳ ኦዶናዳ ተቅተ” ያግስ። 16 ሄሳፈ ጉየ፥ እዩይ ፓራ ጋርያን ከይድ፥ እዝራኤለ ብስ። እዮራም ፓፅቦናይስ ያን ሸምፔስ። ቃስ ይሁዳ ካዎይ አካዝያስ እያ ኦይቻናዉ ያ ዱገ ብስ።

17 እዝራኤላ ግምብያ ቦላ ኤቅድ ዎቸይሳ ፄግድ፥ “እስ ጩጋ የይሳ ታዉ በንቴስ” ያግስ።

እዮራም፥ “ኤንታራ ጋሄታናዳ እስ ፓራ የዳ። ፓራዋይ ብድ፥ ‘ሳእ ሳሮ?’ ያጎ” ያግስ።

18 ፓራዋይ እዩራ ጋሄታናዉ ብድ፥ “ካዎይ ነና፥ ‘ሳአይ ሳሮ?’ ያጌስ” ያግስ።

እዩይ፥ “ሳሮባን ነና ጋꬅያባይ ባዋ። ታ ጉየ አꬋዳ ታና ካላ” ያግድ ዛርስ።

ዎቸይስ ካዋ፥ “ኪተትዳይስ ኤንታኮ፥ ጋክስ፤ ሽን ጉየ ስምቤና” ያግድ ኦድስ።

19 ሄሳ ግሾ፥ ካዎይ ናምአንꬆ ፓራዋ ኤንታኮ ኪትስ። እ ኤንታኮ ይድ፥ “ካዎይ ህንተና፥ ‘ሳእ ሳሮ?’ ያጌስ” ያግስ።

እዩይ፥ “ነዉ ሳሮራ አይ ጋሄተꬅ ደኢ? ታ ጉየ አꬋዳ ታና ካላ” ያግስ።

20 ዎቸይስ፥ “ናምአንꬆ ፓራዋይ ኤንታኮ ጋክስ፤ ሽን ጉየ ስሚድ ይቤና። ቃስ ጋርያ ላጎይ ናምሳ ናኣ ናኣ እዩ ላጉዋ መላ፤ እ ጎያ አሳዳ ላጌስ” ያግድ ኦድስ።

21 ካዎይ እዮራም፥ “ታዉ ፓራ ጋረ ጊግስተ” ያግድ ኪትስ። ኤንቲ ፓራ ጋረ ጊግስዶሶና፤ እስራኤለ ካዎይ እዮራም ይሁዳ ካዎይ አካዝያስ ባንታ ጋርያን ጋርያን ኡትድ፥ እዩራ ጋሄታናዉ ብድ፥ እዝራኤለ ናቡተ ጋደን እያ ደምዶሶና። 22 እዮራም እዩ በእዳ ዎደ፥ “እዩ፥ ሳእ ሳሮ?” ያግድ ኦይችስ።

እዩይ፥ “ነ አየ ኤልዛቤል ላይማተꬃይነ ብታይ ደእሽን፥ ሳሮይ አዉን ደኢ?” ያግድ ዛርስ።

23 እዮራም ባ ፓራ ጋርያ ጉየ ዛሪድ ባቃትድ፥ አካዝያሳ ፄግድ፥ “አካዝያሳ፥ ሀይስ ማካላ” ያግስ። 24 እዩይ፥ ባ ዶንግያ ባ ኩመꬃ ዎልቃን ዳፍድ፥ እዮራማ ናምኡ ካትሶታፐ ግዶን ዱክስ። ዶንገ ቶራይ እያ ዎዛናራ ካንꬅድ ከይን፥ ባ ጋርያ ግዶን ኩንድስ። 25 እዩይ ቶራ ሞጮና ብድቃራኮ፥ “እዮራማ ደንꬃዳ፥ ናቡተ ጋደን ኦላ። ኔራ ታራ እስፈ እዮራማ አዋ አካባ ካልድ ቶግድ ብሽን፥ ጎዳይ እያ ቦላ ትንብተ ኦድዳይስ አኬካ። 26 ሄ ዎደ ጎዳይ፥ ‘ናቡተ ሱꬃነ እያ አደ ናይታ ሱꬃ ታኒ ዝነ በአስ፤ ሄሳ አጩዋ ታኒ ነና ቱማ ሀ ጋደን ቃንፅሳና’ ያግስ። ሀእ ስሚድ ጎዳይ ግዳይሳዳ፥ እዮራማ ደንꬃዳ፥ ሀ ጋደን ሆላ” ያግስ።

27 ይሁዳ ካዎይ አካዝያስ ሄሳ በእዳ ዎደ፥ ቤት-ሀጋና ባቃትስ። እዩይ እያ ካልድ የደꬅድ፥ “እያካ ዎꬍተ” ያግስ። ኤንቲ እያ ካልድ፥ ይብላማ ማታን ደእያ ጉራ ፑደꬃን እያ ጋርያ ቦላ ጫድዶሶና። እ ማግዶ ባቃትድ፥ ያን ሀይቅስ። 28 እያ አይለት ጋርያን እያ ኤክድ፥ የሩሳላመ ኤፍዶሶና፤ እያ ማይዛታ ማታን ዳዊታ ካታማን ሞግዶሶና።

29 አካባ ናአይ እዮራም ካዎትዳ ታማነ እስንꬆ ላይꬃን አካዝያስ ይሁዳን ካዎትስ።

30 ሄሳፈ ጉየ፥ እዩይ እዝራኤላ ብስ። ኤልዛቤላ ሄሳ ስእዳ ዎደ፥ ባ አይፍያ ትያዳ፥ ባ ሁጵያ ፕፃዳ፥ ማስኮትያራ ዱገ ኦግያ ፄላሱ። 31 እዩይ ፐንገራ ገልሽን፥ “ላ ነ ጎዳ ዎꬍዳ ዘምራ ሀይሳ ሳሮ ያዲ?” ያጋሱ።

32 እዩይ ፑደ ማስኮትያኮ ፄልድ፥ “ታ ባጋ ግዳናይ ኦኔ? ኦኔ?” ያግስ። ናምኡ ዎይኮ ሄꬑ ሹፋት እያ ፄልዶሶና። 33 እዩይ፥ “እዮ ዱገ ሆልተ” ያግስ። ኤንቲ እዮ ዱገ ሆልዶሶና። እ ሱꬃይ ጎዳ ቦላነ ፓራታ ቦላ ꬋርጨትስ፤ ፓራት ባንታ ቶሁዋን እዮ የꬍዶሶና።

34 እዩይ ካዋ ኬꬅ ገልድ፥ ምስነ ኡይስ። እ፥ “ሀ ባደትዳ ማጫስዉ ኤፍድ ሞግተ፤ አይ ግድኮካ እያ ካዎ ናአ” ያግስ። 35 ሽን ኤንቲ እዮ ሞጋናዉ ብድ፥ እ ጉግያፈ፥ ቶሆታፐነ ኩሸታፐ አትሽን፥ ሀራባ ደምቦኮና።

36 ኤንቲ ስሚድ፥ እያዉ ኦድዶሶና፤ እ፥ “ጎዳይ ባ አይልያ ትስባ ኤልያሳ ባጋራ፥ ‘እዝራኤለ ጋደን ኤልዛቤል አሹዋ ካናት ማና። 37 አትዳይስ እዝራኤላን ፕቶ መላ የገታና። ሄሳ ግሾ ኦንካ፥ “ሀና ኤልዛቤሎ” ጋናዉ ዳንዳኤና’ ያግድ ኦድዳ ቃላይ ሀይሳ” ያግስ።

<- 2 ካዎታ ማፃፋ 82 ካዎታ ማፃፋ 10 ->