1 አካባስ ሳማረ ካታማን ላፑን ታሙ አደ ናይት ደኦሶና። እዩይ ሳማረ ካታማ ሀላቃታስ፥ ጭማታስነ አካባ ኮቻታ ድቸይሳታስ ሀይሳዳ ያግድ ዳብዳበ ፃፍስ። 2 “ህዛ ህንተ ጎዳ ኮቻት፥ ፓራት፥ ፓራ ጋረት፥ ዩሾይ ግምበትዳ ካታማትነ ኦላ ሚሸት ህንተዉ ደእያ ግሾ፥ ሀ ዳብዳበይ ህንተና ጋክዳ መላ፥ 3 ህንተ ጎዳ ናይታፐ ሎኦ ግድዳይሳ ዶርድ፥ እያ አዋ አራታን ኡትስተ፤ ህንተ ጎዳ ኬꬃስ ኦለትተ” ያግስ።

4 ሽን ኤንቲ ዳሮ ያይድ፥ “ሄኮ፥ ናምኡ ካዎት እያ ስንꬃን ኤቃናዉ ዳንዳእቦኮና፥ ሽን ኑኒ ዋንድ ኤቃኔ?” ያግዶሶና። 5 ሄሳ ግሾ፥ ካዎ ጋꬎ አዋተꬃን አይሰይስ፥ ካታማ ሀላቃይ፥ ጭማትነ አካባ ኮቻታ ድቸይሳት፥ እዩኮ ሀይሳዳ ያግድ ኪትዶሶና፤ “ኑኒ ነ አይለታ፤ ኔኒ ግያባ ኡባ ኑኒ ኦꬃና። ኑ ቦላ ኦናካ ካዎዮኮ። ነና ሎእዳባ አይባካ ኦꬃ” ያግድ ኪትዶሶና።

6 እዩይ ኤንታዉ ናምአንꬆ ዳብዳበ ፃፍሸ፥ “ህንተ ታ ባጋ ግድድ፥ ታዉ ኪተታናዉ ጊግዳባ ግድኮ፥ ህንተ ጎዳ ናይታ ቆꬍያ ሙጭተ፤ ኤንታ ጉግያ ኤክድ፥ ዎንቶ ሀኖደ እዝራኤለ ዪተ” ያግስ። ላፑን ታሙ ካዋ ኮቻት ባንታና ድችያ፥ ካታማን ኤረትዳ አሳታራ ደኦሶና። 7 ሄ ካዋ ኮቻታ ድችያ አሳታኮ ዳብዳበይ ጋክዳ ዎደ፥ ላፑን ታሙ ካዋ ኮቻታ ዎꬍዶሶና። ኤንታ ቆꬍያ ሙጭድ፥ ኤንታ ጉግያ ኬሸን ኤክድ፥ እዝራኤላን ደእያ እዩስ የድዶሶና።

8 ኪተትዳ አሳይ፥ “ኤንቲ ካዋ ኮቻታ ጉግያ ኤክድ ይዶሶና” ያግድ እዩስ ኦድዶሶና።

እዩይ፥ “ዎንቶ ዎንታ ጋካናዉ፥ ካታማ ገልያ ፐንግያን ኤንታ ናምኡ በሳን ዶርድ ዎꬅተ” ያግድ ኪትስ።

9 ዎንተꬃ ጋላስ ዎንታ እዩይ ካረ ከይድ፥ አሳ ኡባ ስንꬃን ኤቅድ፥ “ህንተ ፅሎ፤ ሄኮ፥ ታ ጎዳ ቦላ ማቀታዳ ዎꬍዳይ ታና። ሽን ሀይሳታ ኡባ ዎꬍዳይ ኦኔ? 10 ጎዳይ አካባ ኮቻታ ቦላ ኦድዳ ቃላፐ እሶይካ ሳአን ዎꬎናይሳ ህንተ ኤርተ። ጎዳይ ባ አይልያ ኤልያሳ ባጋራ ኦድዳባ ፖልስ” ያግስ። 11 ሄሳ ግሾ፥ እዩይ እዝራኤላን አትዳ አካባ ኮቻታ፥ እያ ግታ አሳታ፥ እያ ላገታነ እያ ካህነታ ኡባ፥ እሶይካ አቶና ዎꬍስ።[a]

12 ሄሳፈ ጉየ፥ እዩይ ደንድድ፥ ሳማረ ብድ ሄንꬃንቾታ ሞꬁ ጋክድ፥ 13 ይሁዳ ካዋ አካዝያሳ ዳቦታራ ጋሄትድ፥ “ህንተ ኦኔ?” ያግድ ኦይችስ።

ኤንቲ፥ “ኑኒ አካዝያሳ ዳቦታ፤ ካዋ ኮቻታነ ካወ ኤልዛቤል ናይታ ሳሮꬃናዉ ቦስ” ያግዶሶና።

14 እዩይ ባ አሳታ፥ “ኤንታ ፓፃ ኦይክተ” ያግድ ኪትን፥ ኤንታ ፓፃ ኦይክድ፥ ሄንꬃንቾታ ሞꬃን ደእያ ሃꬃ ኦላ ማታን ኤንታ ኦይታማነ ናምአታ ዎꬍዶሶና፤ እ ኤንታፈ እሱዋካ አሽቤና።

15 እዩይ ሄ በሳፈ ደንድድ፥ ራካባ ናኣ እዮናዳባራ ጋሄትድ፥ እያ ሳሮꬅድ፥ “ታ ቆፋይነ ነ ቆፋይ እስኖ። ኔኒ ታ ባጋ ግዳኔ?” ያግስ።

እዮናዳብ፥ “ኤ ግዳና” ያግድ ዛርስ።

እ “አነ ታ ኩሽያ ኦይካ” ያግስ። እያ ኩሽያ ኦይክን ፑደ ጋርያ ቦላ ከስስ። 16 “ታራ የꬋ፤ ታኒ ጎዳስ ዋናዳ ምሸትያኮ በአ” ያግስ፤ እያ ባ ጋርያ ቦላ ኡትስስ። 17 እዩይ ሳማረ ይዳ ዎደ፥ አካባ ኮቻፈ አትዳ ኡባ ዎꬍስ፤ ጎዳይ ኤልያሳስ ኦድዳ ቃላዳ ኤንታ ꬋይስስ።

18 ሄሳፈ ጉየ፥ እዩይ አሳ ኡባ እስፈ ሺሽድ፥ “አካብ ባኣለ ኤቃ ጉꬃራ ጎይንስ፤ ሽን ታኒ እያፐ ዳሮ ጎይናና። 19 ሀእ ባኣለ ናበታ፥ እያ ጎይነይሳታ፥ እያ ካህነታ ኡባ ፄግድ ሺሽተ። ኤንታፈ እስ አስካ ፓጮናዳ ናግተ። ታኒ ባኣለ ኤቃስ ዳሮ ያርሾ ያርሻና ሀናይስ። ሄ በሳ ዮና አስ ፓፃ አተና” ያግስ። ሽን እዩይ ባኣለ ኤቃ ጎይነይሳታ ጭምድ ꬋይሳናዉ ሄሳ ኦꬅስ።

20 እዩይ፥ “ባኣለ ኤቃ ጎይናና ጋላሳ አዋጅተ” ያግን፥ ኤንቲ አዋጅዶሶና። 21 ሄሳፈ ጉየ፥ እዩይ እስራኤለ ቢታ ኡባ ኪትን፥ ባኣለ ኤቃ ጎይነይሳታፐ እስ አስካ አቶና ኡባይ ይዶሶና። ኡባይ ባኣለ ኤቃ ኬꬃ ጋፃፐ ጋፃ ጋካናዉ ቅልፅ ግድ ኩምስ።

22 እዩይ፥ ማኦ ኬꬃ ናግያ አድያኮ፥ “ባኣለ ጎይነይሳታ ኡባስ ማኦ ከሳ” ያግስ። አደይ ኤንታዉ ማኦ ኤህስ።

23 ሄሳፈ ጉየ፥ “እዩይነ ራካባ ናአይ እዮናዳብ ባኣለ ኤቃ ኬꬃ ገልዶሶና። እዩይ፥ ባኣለ ኤቃ ጎይነይሳታፐ አትሽን፥ ጎዳ አይለታፐ እስ አስካ ህንተ ግዶን ዶናዳ ፄልተ” ያግስ። 24 ሄሳፈ ጉየ፥ ኤንቲ ፁሳ ያርሾታነ ሀራ ያርሾታ ያርሻናዉ ግዶ ገልዶሶና።

እዩይ ባኣለ ኤቃ ኬꬃፈ ካረራ ሆስፑን ታሙ አሳታ ጊግስድ ዎꬅስ። ኤንታኮ፥ “ህንተፈ እስ አደይ ታኒ ህንተ ኩሸን እምያ አሳፐ እሱዋ የድኮ፥ እያ ሸምፖይ ሄ አድያ ሸምፑዋ በሳን ገላና” ያግስ።

25 እዩይ ፁሳ ያርሹዋ ፖልዳፐ ጉየ፥ ናገይሳታነ ሀላቃታ፥ “ግዶ ገልድ፥ ኤንታ ዎꬍተ። ኤንታፈ እስ አስካ ከስ ኤኮና መላ” ያግድ ኪትን፥ ኤንታ ማሻን ዉርስዶሶና። ኤንታ አሀ ካረ ጎችድ ከስዶሶና፤ ባኣለ ኤቃ ኬꬃ ቆልአ ገልዶሶና። 26 ባኣለ ኤቃ ኬꬃፈ ኤቃ ቱሳታ ከስድ ፁግዶሶና። 27 ባኣለ ኤቃ ሹቻታ ትንቸረꬅዶሶና፤ ባኣለ ኤቃ ኬꬃካ ላልዶሶና። ሄ በሳ ሼሻ ኬꬅ ከስዶሶና፤ ሀች ጋካናዉ ሄ በሳይ ሼሻ ኬꬅ ግድድ አትስ።

28 ሄሳዳ ኦꬅድ፥ እዩይ ባኣለ ኤቃ እስራኤለፐ ꬋይስስ። 29 ግዶሽን፥ ናባፃ ናአይ እዮርባም እስራኤለ አሳ ኦስስዳ ናጋራ ኦሶ አግቤና። ቤተለንነ ዳነን እዮርባም ኤስዳ ዎርቃ ማራ ምስለታ ጎይንስ። [b]

30 ጎዳይ እዩኮ፥ “ኔኒ ታ ስንꬃን ሱረባ ኦꬅዳ ግሾነ ታ ቆፋን ደእያባ ኡባ ኔኒ አካባ ኮቻታ ቦላ ፖልዳ ግሾ፥ ነ ኮቻት ኦይዳንꬆ የለታ ጋካናዉ፥ እስራኤለ አራታን ኡታና” ያግስ። 31 እዩይ ጎዳ እስራኤለ ፆሳ ህግያ ባ ኩመꬃ ዎዛናፐ ምንꬅድ ናግቤና፤ ቃስ እስራኤለ አሳ ናጋራ ኦስስዳ እዮርባማ ናጋራፐ ሃክቤና።

32 ሄ ዎደ ጎዳይ እስራኤለ ቢታፈ ባጋ ሻኮ ዶምስ። አራመ ካዎይ አዛሄል እስራኤለ ቢታፈ ዳሮ በሳታ ፆንድ ኦይክስ። 33 ዮርዳኖሰ ሻፋፐ ዶሎሀ ባጋራ ደእያ ጋላዳነ ባሳነ ቢታ ኡባ ኦይክስ። ሄ ቢታይ አርኖና ሻፋ ማታን ደእያ አሮኤራ ካታማፐ ዶምድ፥ ሮቤላ ቢታ፥ ጋደ ቢታነ ምናሰ ቢታ ጋኬስ።

34 እዩይ ሀንዳ ሀራባይ፥ ኦꬅዳባ ኡባይነ እያ ምኖተꬃይ ኡባይ እስራኤለ ካዎታ ታርከ ማፃፋን ፃፈትስ። 35 ሄሳፈ ጉየ፥ እዩይ ሀይቅድ፥ ባ ማይዛታን ጋሄትስ፤ እ ሳማረን ሞገትስ። እያ በሳን እያ ናአይ እዮአካዝ ካዎትስ። 36 እዩይ ሳማረን ኡትድ እስራኤለ ቦላ ላታማነ ሆስፑን ላይꬅ ካዎትስ።

<- 2 ካዎታ ማፃፋ 92 ካዎታ ማፃፋ 11 ->