1 ጎዳይ ሙሴስ ሂዝጊዴስ፥ 2 «ኢንቺራቻ ሃርጌይ ኢዛ ቦላ ዲዛዴ ዎይኮ ኢዛ ቦላፌ ሃꬃ ማላይ ጎጊዛዴ ዎይኮ ኣሃ ቦቺዲ ቱኒዳዴ ኡባ ኢስራኤሌ ኣሳይ ባ ዲዛ ጉታፔ ካሬ ኬሳና ማላ ኣዛዛ። 3 ታኒ ኢስታራ ዲዛ ኢስታ ጉታ ኢስቲ ቱኒሶንታ ማላ ሄይታ ጌዮንታ ኣሳታ ኡባ ኣዴ ጊዲን ማጫ ጊዲን ኢንቴ ጊዶፌ ኬሲ ጎዲቴ።» 4 ጎዳይ ሙሴ ኣዛዚዳ ማላ ኢስራኤሌ ኣሳይ ባ ጉታፔ ኢስታ ኬሲ ጎዲዴስ።

5 ጎዳይ ሙሴስ ሂዝጊዴስ፥ [a] 6 «ኔኒ ኢስራኤሌ ኣሳስ፥ ማጫፌ ጊዲን ኣቱማሳፔ ኣይ ኣሲካ ጎዳስ ኣማኔቶንታዴ ጊዲ ቤቲዲ ኣይ ኣሳ ቦላካ ቆሆ ጋꬂኮ ሄሳዴይ ቆሃንቻ። 7 ኢዚ ባ ናጋራ ፓጾ፤ ባ ቆሆዛ ጊሻስ ቃንጼቲዛ ሚሻ ቦላ ጼታፔ ናምኡ ታሙ ኩሼ ጉጂዲ ቆሄቲዳዴስ ኤሆ። 8 ጊዶ ኣቲን ሄ ቆሄቲዳዴይ ሃይቂዳ ጊዲኮኔ ኤዳ ኤካናስ ኢዛስ ማታ ዳቦይ ባይንዳ ጊዲኮ ሄ ኤዳይ ጎዳሳ፤ ሄ ኤዳቲዛ ኤዳይ ቆሂዳዴ ናጋራ ዉርሳና ሺቂዛ ያርሾስ ኢሚዛ ꬋርሾዛራ ኢሲፌ ቄሴዛስ ኢሜቶ። 9 ሄሳ ማላን ኢስራኤሌ ኣሳይ ጎዳስ ኢሚዛ ዱማ ኢሞታይ ዉሪካ ሄ ኢሞታ ኤኪዛ ቄሴዛስ ጊዶ። 10 ኢሲ ኢሲ ኣሲ ጎዳስ ኢሚዛ ዱማ ኢሞታይ ሄ ኢሞታ ኢሚዳዴሳ፤ ጊዶ ኣቲን ኢዚ ቄሴዛስ ኢሚዛ ጊዲኮ ሄ ሚሻይ ቄሴዛሳ።»

11 ሄሳፌ ጉዬ ጎዳይ ሙሴስ ሂዝጊዴስ፥ 12 «ኢስራኤሌ ኣሳፔ ኢሳዴ ማቻ ባ ኣዚናስ ኣማኔቶንታ ኣጋዳ ካሬ ካሬ ጊኮ፥ 13 ሃራ ኣዴራ ዚንኢኮ፥ ቃሴካ ኢዛ ኦꬂዳ ቱና ኦሶይ ቆንጮንታ ኣዚናፔ ጌሚዳ ጊዲኮ፥ ኢዚ ቦላ ማርካቲዛ ኣሲ ቤቶንታ ኣጊን ኢዚ ቱናቴꬃይ ቆንጮንታ ኣጊኮ፥ 14 ኢዛ ቱኒዳ ጊሻስ ኢዚ ኣዚናይ ኢዞ ሲꬋናስ ዳንዳዬስ፤ ዎይኮ ኢዛ ቱኖንታ ዲሺን ኢዚ ቃናቴን ኩሚዳ ጊሻስ ባ ማቾ ሲꬋና ዳንዳዬስ። 15 ሄሳዴይ ባ ማቺዮ ቄሴኮ ኤኪ ኤሆ፤ ሄ ማጫሳይ ጊሻስ ኮዬቲዛ ኢሲ ኪሎ ባንጋ ꬊሌ ያርሾስ ኤኪ ዮ፤ ሃይሲ ቃናቴስ ሺቂዛ ካꬃ ያርሾይ ቆሆ ቆፍሲዛዝ ጊዲዛ ጊሻስ ዛይቴ ኢዛ ቦላ ጉሶፎ፤ ኤጻኔካ ኢዛ ቦላ ዎꬆፎ።

16 «ቄሴዚ ማጫሳዮ ኤፊዲ ጎዳ ሲንꬃን ኤሶ። 17 ጌሻ ሃꬅ ጻሮን ዱቂ ኤኮ፤ ጋይቶቴꬃ ዱንካኔ ዉይጌፔ ጉꬃ ቢታ ኤኪዲ ሄ ሃꬃን ጉጆ። 18 ቄሴዚ ማጫሳዮ ጎዳ ሲንꬃን ኤሶ፤ ኢዚ ጎሴ ቢርሾ፤ ቃናቴስ ሺቂዛ ካꬃ ያርሾዛ ኢዚ ኩሼን ዎꬆ፤ ቃሴ ሄ ቄሴዚ ቃንጌꬅ ኤሂዛ ጫሞ ሃꬅ ጻሮራ ባ ኩሼን ኦይኮ። 19 ቄሴዚ ኢዞ ሂዝጊ ጫቄꬆ፤ ኔኒ ኔ ኣዚናራ ዲሺን ሃራ ኣዴይ ኔናራ ኣቆንታ ጊዲኮኔ ኔኒ ኔና ቱኒሶንታ ጊዲኮ ቃንጌꬅ ኤሂዛ ሃይሲ ጫሞ ሃꬃይ ኔስ ጎሜቶፖ። 20 ጊዶ ኣቲን ኔኒ ኔ ኣዚናፔ ሃራ ኣዴራ ዚንኣዳ ቱኒዳ ጊዲኮ፥ 21 ‹ጎዳይ ኔስ ዬላ ኡሎ ሜሊሶኔ ኔ ኡሎ ፑሪሶ! ኔ ዴሬዛ ጋርሳን ኔና ጫቆሲኔ ቃንጌꬃስ ኬሶ። 22 ሃይሲ ሃꬃዚ ጌዴ ኔ ቦላ ጊዶ ጌሊዲ ኔ ኡሎዛ ፑሪሶ! ኔስ ዬላ ኡሎዛ ጉንዲሶ!› ማጫሳያካ፥ ‹ኣሚን! ጎዳይ ታ ቦላ ሄሳꬆ ኦꬆ› ጋ ዛሩ።

23 «ሄሳፌ ጉዬ ቄሴዚ ሄሳ ሄ ቃንጌꬃ ቃላ ጻꬃ ማጻፋን ጻፎ፤ ሄ ጻፎይሳካ ጫሞ ሃꬃዚ ዲዛ ጻሮዛን ዬጊ ሜጮ። 24 ኢዚ ማጫሳዮ ኢታ ሳኮ ኦይꬂዛ ጫሞ ሃꬃ ኢዞ ኡሻናፔ ሲንꬃን፥ 25 ቄሴዚ ማጫሳይፌ ያርሾ ꬊሌዛ ኤኪዲ ጎዳስ ያኔ ሃ ቃሴꬂ ሺሺዛ ዱማ ያርሾ ጊዳና ማላ ያርሾ ያርሺዛሶዛ ቦላ ሺሾ። 26 ሄሳፌ ጉዬ ካꬃ ያርሾ ኢሲ ዞላ ꬊሌ ኤኪዲ ቆፊሶ ያርሾ ጊዳና ማላ ያርሾ ያርሺዛሶዛ ቦላ ጹጎ፤ ዉርሴꬃን ሄ ማጫሳዮ ሄ ሃꬃ ኡሾ። 27 ማጫሳያ ባና ቱኒሳዳ ባ ኣዚናስ ዲዛ ኣማኔቴꬃ ፓጪንቺዳ ጊዲኮ ቃንጌꬅ ኤሂዛ ሃꬃ ኢዛ ኡዪዛ ዎዴ ኢዚ ቦላ ጊዶን ዎልቃማ ሳኮ ኤሃና፤ ሄሲካ ኢዚ ኡሎይ ፑራና፤ ኢዚስ ዬላ ኡሎይ ጉንዳና፤ ኢዚ ሱንꬂ ኢዚ ዴሬዛ ጊዶን ቃንጌቲዳዝ ጊዲ ኣታና። 28 ጊዶ ኣቲን ኢዛ ኣይኮ ሞሮካ ኦꬆንታ ጊዲኮ ኢዚ ቦላ ኣይኮ ቆሆይካ ጋኬና፤ ኢዛ ናይታካ ዬላና።

29 «ኢሳዴይ ባ ማቾ ላይማቴꬃን ሲꬊዛ ዎዴ ኦꬃና ዎጋይ ሃይሳፌ ካሊዛይሳ፤ ኢዛ ካሬ ካሬ ጋዳ ሃራ ኣዴራ ዚንኣዳ ቱኒዳ ጊዲኮ፥ 30 ዎይኮ ኢሲ ኣሲ ባ ማቾ ጮ ሜላ ሲꬊዛ ጊዲኮ ኢዛ ጎዳ ሲንꬃን ኤቃና ማላ ኦꬆ። 31 ኢዚ ኣዚናዚካ ቆሆፔ ጌሽ ጊዳና፤ ማጫሳያ ላይማታ ቤቲዳ ጊዲኮ ቃሴ ኢዛ ባ ቆሆዛ ጋሶን ባ ቦላ ጋኪዛ ፒርዳ ኤካና።»

<- ታይቦ 4ታይቦ 6 ->