1 ጎዳይ ሙሴሲኔ ኣሮኔስ ሂዝጊዴስ፥ 2 «ሌዌ ናይታ ጊዶፌ ቃኣቴ ዛሬታ ኢስታ ሶ ኣሳን ኣሳን ኢስታ ማታ ዳቦን ዳቦን ቆዳ። 3 ጋይቶቴꬃ ዱንካኔዛን ኦꬃናስ ዳንዳይዛይታ፥ ኢስታ ላይꬂ ሄꬑ ታማፌ ቢዲ ኢቻሹ ታሙ ጋካናስ ዲዛ ኣቱማሳታ ኡባ ማዝጋባ። 4 ኢስቲ ኦꬃና ኦሶይ ጋይቶቴꬃ ዱንካኔዛ ጊዶን ዲዛ ኡባፌ ዱማ ጌሻ ሚሻታ ናጎ ጊዳና። 5 ኣሳይ ባ ዲዛሶፔ ዴንዲ ቢሺን ኣሮኔይኔ ኢዛ ናይቲ ዱንካኔዛን ጌሊዲ ጫቆ ቃላ ታቦታዛ ሲንꬃን ዲዛ ማጋላሻ ዱጌ ዎꬂዲ ጫቆ ቃላ ታቦታዛ ኢዛን ጻጼቶ። 6 ኢዛ ካማናስ ቃጬቲዳ ጋልባ ማጋላሻዛ ቦላራ ዎꬂዲ ሄሳ ቦላ ሙሌራ ሳሎ ሚሳቲዛ ካሬꬃ ማይኦ ኢዛ ቦላ ሚጪዲ ማይዜቶ፤ ሂስቲዲ ቶሆ ሚꬃታ ቃላባቴ ሉኮዛን ጌልꬄቶ።

7 «ጎዳስ ሺቂዛ ዱማ ኡኬꬃ ኢዛ ቦላ ዎꬂዛ ጋባቴዛ ሳሎ ሚሳቲዛ ካሬꬃ ጫርቃን ካሜቶ፤ ጋባቴዛ ቦላ ሼልኤታ፥ ጪልፋታ፥ ጹኣታኔ ዎይኔ ኡሹ ዱቂዛ ሚሻታኔ ኡኬꬅ ኡባ ዎዴ ፓጬይ ባይንዳ ኢዛ ቦላ ዎꬄቶ። 8 ሄሳ ኡባ ዞኦ ጫርቃን ካሚዲ ቦላራ ቃጬቲዳ ጋልባ ማይዜቶ፤ ኢስታን ቶኪዛ ቶሆ ሚꬃታ ቃላባቴ ሉኮዛን ጌልꬄቶ።

9 «ሳሎ ሚሳቲዛ ካሬꬃ ጫርቃዛ ኤኪዲ ጾምፔ ኢዛ ቦላ ዎꬂዛይሳኔ ጾምፔታ፥ ቃጴታኔ ቢዲንꬅ ዎꬂዛ ኮንኣታ፥ ሄሳꬆካ ዛይቴ ዎꬂዛ ሚሻታ ኡባ ኢሲ ቦላ ካሜቶ። 10 ጾምፔዛኔ ጾምፔዛስ ኮሺዛ ሚሻታ ኡባካ ኢዛ ካሚዛ ጋልባን ጻጺዲ ኢዛራ ቶኪዛ ሃላ ቦላ ዎꬄቶ።

11 «ካሌꬂዲ ዎርቃፌ ኦሴቲዳ ያርሾ ያርሺዛይሳ ቦላ ሳሎ ሚሳቲዛ ጫርቃን ካሚዲ ቃጬቲዳ ጋልባ ቦላራ ማይዚዲ ቶሆ ሚꬃታ ኢዛን ጌልꬄቶ። 12 ጋይቶቴꬃ ዱንካኔን ጎኤቲዛ ሚሻታ ኡባ ኤኪዲ ሳሎ ማላ ካሬꬃ ጫርቃን ካሜቶ፤ ቃጬቲዳ ሌኤ ጋልባ ኢዛ ቦላራ ካሚዲ ቶሆ ሚꬃ ቦላ ዎꬄቶ። 13 ቢዲንꬃዛ ያርሾ ያርሺዛሶዛ ቦላፌ ፒቲዲ ያርሾ ያርሺዛሶዛ ኦቻ ቴራ ሚሳቲዛ ጫርቃን ካሜቶ። 14 ያርሾ ያርሺዛሶዛን ኦꬃናስ ጎኤቲዛ ሚሻታ ሄይቲካ ሁላሌታ፥ ሜንጾታ፥ ታማ ካሺዛ ሚሻታኔ ጉቃ ሳኔታ ኢዛ ቦላ ዎꬄቶ፤ ቃጬቲዳ ሌኤ ጋልባ ኢዛ ቦላ ካሚዲ ቶሆ ሚꬃታ ኢዛን ጌልꬄቶ። 15 ኢስቲ ባ ዲዛ ሄራፔ ዴንዲ ቢሺን ኣሮኔይኔ ኢዛ ናይቲ ጌሻ ሚሻታኔ ሄ ሚሻቲ ኢስታን ጎኤቲዛ ሚሻታ ኡባካ ካሚዳፔ ጉዬ ቃኣቴ ናይቲ ዪዲ ቶኬቶ፤ ጊዶ ኣቲን ኢስቲ ሃይቆንታ ማላ ሄ ጌሻ ሚሻታ ኩሼን ቦቻናስ ቤሴና፤ ሄሳ ጊሻስ ጋይቶቴꬃ ዱንካኔዚ ዴንዲዛ ዎዴ ሄሲ ዉሪካ ቃኣቴ ናይታ ኣላፌቴꬃ።

16 «ቄሴዛ ኣሮኔ ና ኤልኤዜሬይ ጾምፔዛ ዛይቴ ሎኦ ሳዎ ሳዊዛ ኤጻኔ፥ ኡባ ዎዴ ሺቂዛ ካꬃ ያርሾዛኒኔ ቲዬቲዛ ዛይቴዛ ቦላ ኢዛስ ኣላፌቴꬂ ዴኦ፤ ሄሳꬆካ ጋይቶቴꬃ ዱንካኔዛኔ ኢዛ ጊዶንካ ዲዛ ጌሻ ሚሻታ ኡባ ናጎ።»

17 ጎዳይ ሙሴኔ ኣሮኔ ሂዝጊዴስ፥ 18 «ቃኣቴ ናይቲ ሌዌ ቆሞታ ጊዶፌ ꬋያና ማላ ኦꬆፍቴ። 19 ጌዴ ኡባፌ ዱማ ጌሻ ሚሻታኮ ሺቂዲ ኢስቲ ሃይቆንታ ማላ ኢስታ ኣሮኔይኔ ኢዛ ናይቲ ጋይቶቴꬃ ዱንካኔን ጌሊዲ ኣሳስ ኢሳስ ኢሳስ ኦሶኔ ኢዛዴ ቶሆ ሻኪ ኢሜቶ። 20 ጊዶ ኣቲን ኢስቲ ሃይቆንታ ማላ ቃኣቴ ናይቲ ዱንካኔዛ ጊዶ ጌሊዲ ቤያናስ ጉꬃ ዎዴስካ ጼሎፔቶ።»

21 ጎዳይ ሙሴስ ሂዝጊዴስ፥ 22 «ሌዌ ዛርኬታ ጋርሳፌ ጌርሾኔ ናይታ ኢስታ ዳቦን ዳቦኒኔ ኢስታ ዬሌታን ዬሌታን ቆዳ። 23 ጋይቶቴꬃ ዱንካኔዛን ኦꬃናስ ዳንዳይዛይታ ሄꬑ ታሙ ላይꬃፌ ቢዲ ኢቻሹ ታሙ ላይꬅ ጋካናስ ዲዛ ኣቱማሳታ ኡባ ቆዳ።

24 «ዱማ ዱማ ሚሻታ ቶካና ኣላፌቴꬂ ኢስታስ ዴስ። 25 ጋይቶቴꬃ ዱንካኔዛ ሶ ባጋራኔ ካሬ ባጋራ ካሚዛ ቦላራካ ኢዛ ቦላ ካሚዛ ቃጬቲዳ ሌኤ ጋልባኔ ጌሎሶ ፔንጌዛካ ቶኬቶ። 26 ሄሳꬆካ ዱንካኔዛኔ ያርሾ ያርሾሶሆ ጊቤዛ ዩዪ ኣꬊዳ ማጋላሻታ፥ ቶሌ ዎዶሮታ፥ ጊቤ ጌሊዛሶ ፔንጌ ማጋላሻታኔ ሄይታንታ ኦꬃናስ ጊጌቲዳ ሚሻታካ ኢስቲ ቶኬቶ፤ ሄይታ ሄ ሚሻታስ ጊዲዛ ኣይ ኦሶካ ኢስቲ ፖሌቶ። 27 ጌርሾኔ ናይቲ ኦꬂዛ ኦሶ ጊዲን ዎይኮ ቶሆ ጊዲን ኣሮኔይኔ ኢዛ ናይቲ ኢስታ ኣዛዚዳ ማላ ኦꬄቶ፤ ኢስቲ ቶካናስ ቤሲዛ ሚሻ ኩሜꬅ ኔ ኢስታስ ጊሻ ኢማ። 28 ጋይቶቴꬃ ዱንካኔዛ ጊዶን ጌርሾኔ ናይታ ኦሶይ ሄሳ፤ ኢስታ ኦሶ ቄሴ ኣሮኔ ና ኢታማሬይ ጼሊ ኦሲሶ።

29 «ሌዌ ዛርኬፌ ጊዲዳ ሜራሬ ናይታ ኢስታ ዛርኬን ዛርኬኒኔ ኢስታ ዬሌታን ዬሌታን ቆዳ። 30 ጋይቶቴꬃ ዱንካኔ ጊዶን ኦꬃናስ ዳንዳይዛይታ ኢስታስ ላይꬃይ 30 ላይꬃፌ ቢዲ 50 ላይꬅ ጋካናስ ዲዛ ኣቱማሳታ ኡባ ቆዳ። 31 ኢስቲ ቶካናስ ቤሲዛይ ዱንካኔዛ ቶሌታኔ ቶሌታ ጊዶራ ጌሊዛይታ፥ ቱሳታ፤ ዱንካኔዚ ኢዛን ቶሌቲዛ ሚሻታ። 32 ሄሳꬆካ ዱንካኔዛ ዩሾን ዲዛ ዴምባን ኤቂዛ ቱሳታ ቶሆታ፤ ቶሌታ ዎዶሮታኔ ሄይታ ኡባታስ ኮሺዛ ሚሻታ፤ ኢሲ ኢሲ ኣሲ ቶካናስ ቤሲዛ ሚሻይ ኢዛ ሱንꬃን ሱንꬃን ኢዛስ ኡቶ። 33 ቄሴ ኣሮኔ ና ኢታማሬይ ኦሶዛ ናጌቲ ኦሲሳናስ ጋይቶቴꬃ ዱንካኔ ጊዶን ሜራሬ ናይታ ሶ ኣሳ ኦሶይ ሃይሳ።»

34 ሙሴይ፥ ኣሮኔይኔ ዴሬዛ ሃላቃቲ ቃኣቴ ዜሬꬃታ ኢስታ ዛርኬን ዛርኬኒኔ ኢስታ ዳቦን ዳቦን ቆዲዳ። 35 ጋይቶቴꬃ ዱንካኔዛ ጊዶን ኦꬃናስ ኦሶን ጌሊዳይታ ኩሜꬅ 30 ላይꬃፌ ቢዲ 50 ላይꬅ ጊዲዳይታ ቆዲዳ። 36 ቆዴቲዳ ኣሳይ 2,750 ጊዲዴስ። 37 ጎዳይ ካሴ ሙሴ ኣዛዚዳ ማላ ጋይቶቴꬃ ዱንካኔዛን ኦꬂዳይቲ ሙሴይኔ ኣሮኔይ ቆዲዳ ቃኣቴ ሶ ኣሳይ ሃይታንታ።

38 ባ ዛርኬን ዛርኬኒኔ ባ ዳቦን ዳቦን ቆዴቲዳ ጌርሾኔ ናይቲ፥ 39 ጋይቶቴꬃ ዱንካኔዛን ኦꬃና ጌላናስ ዳንዳይዛይታስ ላይꬃይ ሄꬑ ታማፌ ቢዲ ኢቻሹ ታሙ ላይꬅ ጋካናስ ዲዛይቲ ዉሪካ፥ 40 ናምኡ ሺያኔ ኡሱፑን ጼታኔ ሄꬑ ታማ። 41 ጎዳይ ሙሴ ኣዛዚዳ ማላ ጋይቶቴꬃ ዱንካኔዛን ኦꬂዳይቲኔ ሙሴይኔ ኣሮኔይ ቆዲዳ ጌርሾኔ ናይቲ ሃይታንታ።

42 ባ ዛርኬን ዛርኬኒኔ ባ ዳቦን ዳቦን ቆዴቲዳ ሜራሬ ናይቲ፥ 43 ጋይቶቴꬃ ዱንካኔዛን ኦꬃና ጌላናስ ዳንዳይዛይታስ ላይꬃይ ሄꬑ ታማፌ ቢዲ ኢቻሹ ታሙ ላይꬅ ጋካናስ ዲዛይቲ ዉሪካ፥ 44 ሄꬑ ሺያኔ ናምኡ ጼታ። 45 ጎዳይ ሙሴ ኣዛዚዳ ማላ ጋይቶቴꬃ ዱንካኔዛን ሃጋዚዛ ሙሴይኔ ኣሮኔይ ቆዲዳ ሜራሬ ናይቲ ሃይታንታ። 46 ሙሴይ፥ ኣሮኔይኔ ኢስራኤሌ ሃላቃቲ ኢስታ ቆሞን ቆሞኒኔ ኢስታ ዛርኬን ዛርኬን ቆዲዳ ሌዌ ናይቲ፥ 47 ሄꬑ ታሙ ላይꬃፌ ዶሚዲ 50 ላይꬅ ጋካናስ ዲዛይቲ ጋይቶቴꬃ ዱንካኔዛ ጊዶን ኦሶዛ ኦꬃናስ ኦꬂዛ ሚሻታ ቶካናስ ጌሊዳይቲ፥ 48 ሙሌራ ኢስታ ቆዳይ 8,580። 49 ሄሳ ማላን ኢሲ ኢሲ ኣሲ ጎዳይ ሙሴ ኣዛዚዳ ማላ ቆዴቲዴስ፤ ሄሳꬆካ ጎዳይ ሙሴስ ኢሚዳ ኣዛዞ ማላ ኢሲ ኢሲ ኣሲ ቶካናስ ኣላፌቴꬅ ኤኪዴስ።

<- ታይቦ 3ታይቦ 5 ->