1 Amalahilä, selesaia fii bi amea melo biguli amo fuuse amo gaalu, na beahamelebe, gasumilï afädë mudaiala nagadaia besela digai dibe melï. Gasumilï amoma sege uli nafade mia made dibe amoïe idi gai dogelo gii ïasio. 2 Amalahilä, gasumilï amea sege uli nafade mia made dibe amoïe idi gai doga negese amo gaalu, höba bugu edefade uli amogila nulo edefade wisalea, höba bugu edefade fedalo amo gadola, höba bugusio. Sege uli dibea amila höba fedai amea esoge muge usulasebegi, yo dilo amo usisio. 3 Amalahilä, galiawa gadoi yafie höba bugu amogila nagadaia digafusio. Nagadaia hamabuluïe geloi amo gadoi galiawa amolima ïasio. 4 Galiawa amolima säla ïahalea, Dilia giisige, iige, nelebo odoa nagadaia bäui amolige, neala nafademabio. Udia dolöïe odagia Godeïe magi maade amolimu neala nafademalola säsio. 5 Ili nufudala baagomäia geloi made ïala, aube biagi sësa namiäia së edefade ïmolöïe geloi ïasio. Së amoda, hamabuluea dolö mihi sëlo amo gadoi. 6 Segeyo amoligi, udia dolö amolia baagomolöïe idi hogomolö gaso, dofä made beagolemolömelë. Ilia ili baagomolö edefademalä helësëmolö gaso, baagoeada, ili neebea amila fisäla moholömelë.

7 Na beahaleamelebe, galiawa gadoi amoli sugua hosia nudumolöïe daiala aligilo amo gadola neebeo. Ilile busagia nudula salolelo habuga goloea hamoi gälo amo gadola gälahilä, ilile odagida, dolöïe odagi gadoi gabio. 8 Ilile busa hilïda, udia busa hilï gadoi, amase, ilile bese amoda, ilua ügülo elaeonoïe bese gadoi gabio. 9 Ilia nudusalea, bidagia salugalo gadoi aeanea hamoi amo gälahilä, ili hagila awähalea, augia goba amoda, sugua hosi yafiea nudumolöïe galo gadoi dusugala gaula awähalea goba aulo amo gadoi gabio. 10 Ilile gobeda, hamabulu gobe gadoi gabio, amase, mihiloda, hamabuluea mihilo amo gadoi neebeo. Udia dolö aube biagi sësa namiäiaïe geloida, gobegi gaula neebeo. 11 Sege uli nafade mia made dibe amoïe beaha aligilo mugabeda, ilile beaha aligilo gini nea. Hibulu adoea ïe ëida, Abadono, Giligi adoeada, Abolionola sälo.[a]

12 Yöi edefade age amoda, hä, wagai. Gaso, nabuö! Amo baagia bu hobeala yöi edefade äudä, aso, moholömelë.

13 Amaimo, selesaia fii gafe amea melo biguli amo fuuse amo gaalu, Godeïe odagia odala ïlo auli goloea hamoi fäfü biyidia amoïe bese biyidia dibea amila ado afädë säse nabelebe, 14 selesaia fii gafe melo biguli gaula neebe amoma sähalea, Selesaia fii biyidia ödä edefade Yubeledisi dibea ami nafodola negei difolalo amoli fisigämola säsio. 15 Amala säsebegi, udia dolö ohodoala mogelahilä, osoda amo sulubadela selesaia fii biyidia amolia nufudaha maademäia, ea ili fisigäsio. Aoa amogige, segeyo amogige, aube amogige, gäheo i amogige hamoi amo hamomolöïe, ilia, hä, daiala beaha neebeo. 16 Sugua hosidaia fila aulo ami dolö amolile näbada, milienemu hädali äudä neebeo. Näbada amala neala afädëa säsio.[b]

17 Na sosoäla awäla beahaleamelebe, sugua hosige, sugua hosidaia fila aulo amolige, gowe gadoi gabio. Ilia nudusalea, bidagia salugalo gadoi gäi amoïe galada, nulo söa heale uii gadoige, mu giwi yabui gadoige, igi abüai ëi saloba gadoige, gäi nefolalebeo. Sugua hosi amolile busada, ilua ügülo elaeonoïe busa gadoi gabio. Amase, nulo söage, höbage, igi gadoi ëi salobage, sugua hosi amoïe nafiadila doadidigila awäha neebeo. 18 Neala nafadelasilo geloi ohodoa amea, nulo söage, höbage, amase, igi gadoi ëi salobage, sugua hosi amolile nafiadila besela galala, udia dolö ohodoala mogelahilä, osoda amo sulubadela baagomäia nufudaha maadesio. 19 Sugua hosi amolile geloida, nafigige, hobegige dibeo. Ilile hobe amoda, nuba gadoi hamolahilä, oböla, nuba busa hamoi gabio. Hosi amolile hobe ameada, udia dolö afisila nufidelo gabio.

20 Udia dolö odoa neala nafadelasilo geloi amolia made nufi nefolalo amoliada, hilile naaboea hamoi amoli fisila, asigi besula made nelo. Ilia mugabe amolile ëige, wäfalï gode goloeage, silibaeage, igi aeane ëi bolonosiage, igifalïage, iiage, elö elöla hamoi amolile ëige, gauia adalo amo made fisila neebeo. Wäfalï gode amolile siia made melëloge, gëhea made nabeloge, emoea made naweloge hamola negei dibeo. 21 Aso, ilia udia dolö baagomäia nufideloge, golë hamologe, udia dolö susugu hamologe, nelebo fa neloge, amoli hamolo amoda, asigi besula made neebeo.

<- Ulufai 8Ulufai 10 ->