1 Amase, na beahaleamelebe, selesaia fii geloi elö selesaia mosöala digaha neebeo. Mu baidilia e salugalahilä, soläiloea ïe busagia amalela negei neebeo. Ïe odagi yo digai amoda, eso neë gadoige, ïe emo äudä amo helegela igaugi nulo söa aligi gadoige neebeo. 2 Ea beba holöfalï afädë gaula neebeo. Beba amoda, ïe naabodaia hogala negei dibeo. Ïe emo dafädida, duhuludaia emesala, amase, fefeädida, nagadaia emesalala nea, 3 ea gelola uuai amoda, ilua ügülo gadoi elaeonoea halalo amo gadola gelola uuasio. Ea uuaia gai amole, sege hahalä gifalädalïala dagabola, hili sälo amo gadola säsio. 4 Hahalä gifalädalïala dagaboi amole, ado ilia säi amo na dëdëdelä hamolebeda, Hebenila ado afädëa säia idogosalea, Hahalä gifalädalïala dagaboi amolia ado säi amoda, dïe asigigi musügä negemalo, dëdëmabiola säsio.

5 Selesaia fii duhuludaia emesala nagadaia emesalala neebe na melï amea, ïe naabo dafädi amo selesaia mosöa gauia adogola nea, 6 afädë namolöi namolö neebe ameada, muge, naga föige, ödä duhuluge, amase, nelebo sulubadela amoligi dibe neebe sebe amolige, hamosa maadei amoïe ëi säla migalïa diigila, ado gelola säla negesalea sähalea, Segeyo beaha namolö elöda, maademelë. 7 Selesaia fii gifalädalü amoïe melo biguli goba moholö amoïe segeyogi, ea fuudelä hamose amo gala, Godea ïe hamoi hamolasilo bea sälo nefolalo amolima dafidi säla ï amo gadola, ïe galone musügä negei dilo amo gadola wäla, hamosa maademolömelëla säsio.

8 Afädëa Hebeni gadogola säse nabi amea nema bu elö sähalea, Selesaia fii duhuludaiage nagadaiage emesalala neebe amoïe naabodaia beba hogala negei dibe amo, dia nimolö mosöla säsio. 9 Amala säsebegi, ne selesaia fii neebea ami awäla ema sähalea, Dia beba holöfalï go nema ïmola säi. Amala säsebegi, ea nema sähalea, Dia neala muö. Nafia nase amoïe hëdäda, nebali ödä hëdä amo gadoi gasoda, dïe hagömo sëmolömelëla säsio. 10 Amala säsebegi, beba holöfalï ïe naaboea gaula neebe amo, na neala mai. Neala nasebegi, nïe nafia hëdäda, nebali ödä gadoi gabio. Oböla, naala dëgïlebeda, nïe hagömo oböla sësio.

11 Amala hamosebegi, ilia nema sähalea, Udia dolö gädili yafiegi nefolalebe amolilege, gafodo elö elöi yafie nefolalebe amolilege, ado elö elöla sälo yafie nefolalebe amolilege, amase, beaha aligilo gini yafie nefolalebe amolilege, dia bu bea säla, säla ïaha namolö dialeala säla ïasio.

<- Ulufai 9Ulufai 11 ->