Ulugu 4

Mugabe busaea Yesu fedogola melï

(Madiu 4.1-11; Maga 1.12-13)

1 Eleloi Gesami Yesuma nobasebegi, e ödä Yodonagila obëgëi. Amasebegi, Gesamia e sege nafade udia dolö aligisia made ami sigi awäla ifosi. 2 Ami nebegi, mugabe busaea segeyo nabülasi biyidiagi Yesuea nafade hamomabelela fedogola beaha nelo. Amala fedogola beaha nebegi, Yesu e molö made naala neamu, segeyo amo gadola baagisebegi, Yesu e hä, sïdëa baagoi nelo.

3 Amala hamoi neebe amo bealahilä, mugabe busaea Yesuma sähalea, Di Godeïe malö nea galëda, igi gowema wahalo hamomalamola säi. 4 Amala säsebegi, Yesuea säla obëgësalea, Ado säla dëdëla negei dibe amea sähaleada, Udia dolögali namolö ïlo amoda, wahalo nase ameamu ïlo mademelëla säla dëdëla negei dialeala säi.

5 Amala säsebegi, mugabe busaea segebi ilibia neebedaia ami Yesu sigi fedalahilä, gädili sulubadela dibe amoli ema fodolofalï si hamo dagabolo wäla dagabola olesa maadei. 6 Amala olelahilä sähalea, Gädili dibe egowe sulubadela sigi namiäiaïe geloige, ëi edefadege negali ïaha maadei ameada, na ïmolö helësëse amogali ïmolöi ameada, hä, digali ïmolömelë. 7 Dia nïe emo mia gumusulahilä, nïe ëi gauia adaseda, digali ïaha maademolömelëla säi. 8 Yesuea ema säla obëgësalea, Ado säi dibe amea sähaleada, Dafidilo Geloi, dïe Gode neebe amo, dia ïe ëi gauia adamalolage, amase, ïemu hamoi hamomalolage, säla dëdëla negei dialeala säi.

9 Amala säsebegi, mugabe busaea Yesu Yalusaleme sigi awäla, Godeïe mosöa ilibiafalï gadogo ifosilahilä sähalea, Di Godeïe malö nea galëda, hä, di dihï guila nila sadia idogomo. 10 Amoïe mida, dafidi dëdëla negei dibe amea sähaleada, Ea ïe selesaia fii amolima di hedabola sigi namolö mosalola säsegi, 11 igia dïe emo daualoea, ilile naaboea di sogobala gauia adogomolömelëla säla dëdëla negei dialeala säi. 12 Amala säsebegi, Yesuea säla obëgësalea, Gomalä säi dialea. Dafidilo Geloi dïe Gode neebe amo fedogola bimabiola säla dëdëla negei dialeala säi.

13 Mugabe busaea, Yesu fedogola beaha maadelahilä, hobea bu obëgëmolöïe, fu hogodeläla helësëlahilä, Yesu dïgïla asi.

Yesu e Galili awäla Eleloi Gesamiïe geloigi nea, hamoi mi gäwila hamosa nelo

(Ulugu 4.14–9.50)

Yesuea Galili hamoi mi gäwila hamoi

(Madiu 4.12-17; Maga 1.14-15)

14 Gesamia Yesu neala gelolasisebegi, e Galili obëgëi. Udia dolö amodi nefolalo amoli sulubadelaea Yesuea hamoi amoïe ado säi amo nabala daidosa maadei. 15 Ea ilile gedolo mosö nefolalo amoligi nea säla olelesebegi, udia dolö nefolalo amoli sulubadelaea ïe ëi gauia adaha nelo.

Nasalese udia dolö ilia Yesu hamei made nelo

(Madiu 13.53-58; Maga 6.1-6)

16 Yesu hï e Nasalese ëdëia ami awäla nea, ea segeyo Sabadagi hï hamolo amo gadola hamomolöïe, e gedolo mosöa ami awäla nogila digai. Digalahilä, beba nidemolöïe nowela aligisebegi, 17 ilia bea sälo Aisaeaïe beba gali dilo amo ema neala ï. Amasebegi, Yesuea beba amo bobagia gala, ado afädë dëdëla negei dilo amo beagolelahilä, nidesa nelo amoda gowe.

18 Dafidilo Geloiïe Gesami e nema nea. Mida, na udia dolö busadäoi nefolalebe amolima Ado Mala Hedabi säla ïmäia, ea nïe busagia weli söga negelahilä, ea ne memelei. Udia dolö gide begela nafodoi nefolalo amolima dili fisigälasimolömelëlage, si golai nefolalebe amolima dili bu hedabola bimolömelëlage säla ïmäia, ne fisiga wei. Amase, dolö odoaea udia dolö daiasala gadiabosa nefolalebe amoli haila digila sigi obëgëmäiage, 19 Dafidilo Geloia udia dolö obeägïlasimolö fu walio dialeala säla ïmäiage, amala hamomolö mosalola säila

säi. Aisaea 61.1-2

20 Amala nidesa maadelahilä, Yesuea beba amo galila beba beaha aligilo amo hïma ïalahilä, e fila digai. Amala hamosebegi, udia dolö gedolo mosöa sefolalo amoli sulubadelaea ema sisila sefolalo. 21 Amala sefolalebegi, ea ilima sähalea, Ado bebagi dëdëla negei nidesebegi, dilia nabaha sefolalo amoda, walio wegi wäla, hä, gausiaha gomelëla säi. 22 Amala säi amo nabalahilä, udia dolö sefolalo amoli sulubadelaea ïe ëi gauia adogola, ado hedabi hïdo elöi ïe nafigila säi nabi amogi asigigi fudugilahilä sähalea, Egoweda Yosebeïe malö madelela säi. 23 Yesuea ilima sähalea, Udia dolöea ado besula säse go gadola, dilia oböla, nema sähalea, Alögoda-o, dihï wahimalola säla, Gabaniama nea mala hamosa nelo nilïa nabi amoda, wige dihï segea nea hamolo amo gadola wäla hamomalola sämolöledu.[a] 24 Na dilima dofä sähago. Bea sälo neebe amoda hïle segeafalï, udia dolö nefolalebe amolia säla olela gausialo mademelë. 25 Elaia nelo amo gaalu, gäheo i ohodoaïe aube gafeia sege made digala mu gala digila esoi dibegi, sege amo sulubadelagi sïdë i edefade dilo. Segeyo amo gaalu, Isilale segea ami dofä udia didalo yafie sefolalo 26 gaso, Godea Elaiama ili sefolalebea ami mosalola made säla, Saidono segeïe Salebada gaamugi udia didalo afädë sebea amimu mosaloi. 27 Hä, amo gadola wäla, bea sälo Elaisa neebe amo gaaluge, Isilale segea udia dolö gudubu hamoi yafie sefolalo gaso, amoligi afädë made wahila, gädili Silia fii Naimono afädë emu wahimelëla säi. 28 Udia dolö gedolo mosöa sefolalo amolia amala säi amo nabalahilä edefademalä mihaläi. 29 Ilile gaamu amoda segebidaia dilo. Hä, ili nowelahilä, Yesu naabogi gaula iluala didigila gaamu yala baagido segea asi. E amala sigi awälahilä, däeo bidigi amila bobala saledelä hamosebegi 30 gaso, ili mogogi amila doadigila moholöi asi.

Yesuea dolö afädëma mugabe fedai nesila digi

(Maga 1.21-28)

31 Amalebe Yesu e awäla Disiligi Galiliïe gaamu Gabaniama ami digai. Ami awälahilä, segeyo Sabadagi udia dolö nefolalo amolima säla olelesa nelo. 32 Ea geloi gaulahilä geloi hïdo elöi olelei amogi, udia dolö ea säla olelese nabaha sefolalo amoli asigigi fudugisa sefolalo. 33 Gedolo mosöa amida dolö afädëma mugabe nafade afädë fedai sulo. Amea gelola üalala digila sähalea, 34 Wae! Nasalese fii Yesu-o, nilï neebeawi dia edo hamomolöïe misi. Amai dia nilï nufulöïe misile. Dida na dawa. Dida mogoi hedabifalï, Gode neebeala misimelëla säi. 35 Amala säsebegi, Yesuea nemosalea, Adomabu! Dolö go dïgïla doadigila mosöla säi. Amala säsebegi, mugabe amea dolö amo udia dolöïe sidaia nagadaia nidala awälahilä, neala nafadela made, geleä doadigila asi. 36 Udia dolö nefolalo amoli sulubadela iso asigigi fudugilahilä, hilidomu säla didigahalea, Wae! Ado amoda edo gadoi adodu. Mugabe iliada ea doadigila mosöla säse amo gadola mosäia, mosöla säloïe geloi hïdo elöi gaula neebemelëla säi. 37 Disiligi amogi Yesuea hamoi amoïe ado säi amo nabala daidosa maadei.

Yesuea Fidaïe esöa wahilasi

(Madiu 8.14-15; Maga 1.29-31)

38 Yesu e gedolo mosöa amila Saimonoea mosöa asi. Saimonoïe esöa hëgï olo edefademalä oloi dilo amo, Yesuea wahimäia, ilia ema säla ï. 39 Amalebe, Yesu e awäla udia amo mia ga madela nea, hëgï olo amoma nemosebegi, hëgïla oloi amo damui. Amala säi amole, udia amea nowelahilä, ili molö muäia neala ï.

Yesuea udia dolö oloi yafie wahi

(Madiu 8.16-17; Maga 1.32-34)

40 Deadi eso digase amo gaalu, udia dolö ilia oloi elö elöla difolalo amoli sulubadela Yesu neebea gaula mofiai. Amalebe, Yesuea ili afädë afädëlama naaboea diigisebegi, ili wahisa maadei. 41 Amase, ea udia dolö yafiema mugabe fedai nelo amoge sulubadela nesila digisa maadesebegi, mugabe amoli doadigila awähalea, gelola üalala didigala sähalea, Dida Godeïe malömelëla säla didigai. Amalebe, Godea Afädë Memelei moholömelëla säla negei amo e gabula dawadigisebegi, ea ilima nemosalea adomabula säi.

Yesu e gaamu odoagi nawesa nelo

(Maga 1.35-39)

42 Yosefalï nowela Yesuea gaamu amo dïgïla, sege udia dolö aligilo made dibea ami asi. Udia dolö yafie nefolalo amolia hobeala e hogogola awäla e beagolelahilä, di made moholömelëla säla, ilia e gauia idogoi. 43 Gauia idogosebegi, Yesuea ilima sähalea, Gaamu odoa difolalebe amoligi, Godea Beaha Maadela Sigi Neebe amoïe Ado Mala Hedabi säla ïmäia, Godea ne fisiga weimelëla säla ï.

44 Hä, Yesu e Disiligi Yudiamadi nawesa nea, gedolo mosö difolalebe amoligi ado mala säla ïïa nawesa nelo.

<- Ulugu 3 Ulugu 5 ->