Ulugu 3

Yesuea ïe hamoi hamomäiaïe ödägi gelo Yonea ïe idi fodola daialasi

(Ulugu 3.1–4.13)

Ödägi gelo Yonea ado mala säla ïaha nelo

(Madiu 3.1-12; Maga 1.2-8; Yone 1.19-28)

1 Dabeliasa Sisa e Olomoïe gini beaha nelo amoïe gäheo i mimogogida, Bödiasa Bailadi eada, Disiligi Yudiaïe gamane beaha aligiloge nelo. Amo gala, Heledoeada Disiligi Galiliïe beaha aligiloge nelo. Amase, edoo Filibiada disiligi äudä, Iduleale Dalagonaidisilele beaha aligiloge nea, Ilisaniasaeada Disiligi Abiliniïe beaha aligiloge nelo. 2 Gobela ïlo busa edefade Anasale Gaiafasale neebe amo gaaluda, Segelaeaïe malö Yone e sege udia dolö aligilo made dibea ami nebegi, Godea ema ado säla ïaha nelo. 3 Amalebegi, Yonea ödä Yodona dibe amo ga madela sege dibe amo sulubadelagi nawesa nea, udia dolöma ado mala säla ïahalea, Dilia nafade hamoi amo Godea hëmäia, iso asigi besula ödägi gemolö dialeala säla ïaha nelo. 4 Amoïe bea sälo Aisaeaïe bebagi ado säla dëdëla negei dibe amoda gowe.

Sege nafade udia dolö aligilo made dibea ami nea, afädëa uuala wesalea, Dafidilo Geloi misiäia, idi fodola dadaiaha namialo. Ïe idida, mogolafalï fodomalo. 5 Dogomo dibe amolige, gau dibe amolige, sulubadela abaha maadelahilä, gogoi dibe amoli sulubadelagi föla nobaha maademalo. Idi halowei dibe amo hedabola mogola fodosa maadelahilä, idi fedafu digafui dibe amoli sulubadela abala bobagisa maademalo. 6 Udia dolö nagadaia nefolalebe amoli sulubadelaea, Godeïe damula aulo bimolömelëla uuala wesa neala

säi amo dëdëla negei dialea. Aisaea 40.3-5

7 Udia dolö yafie Yonea ili ödägi gemäia maala gegedoi nebegi, Yonea ilima sähalea, Dilida säiabëïe malö gadoi nebego. Godea mihaläla së ïmolö amogi fisäla doadigila moholömelëla dilima nowëa säla ïasio. 8 Dilia nafade hamosa nelo amo fisila asigi besui nebegoïe gägä negela ulufaha namialo. Dilia dihilimu sähaleada, Nilïle naadoda Abalahama nelola sämolöi mademelë. Na dilima ado afädë sähago. Godea igi difolalebe gowe neawelahilä, Abalahamaïe malölali hamomolöi neamelëla sähago. 9 I nefolalebe amoli abulöïe i mia gabi bogi dialea. I gägä hedabi made negelo nefolalebe amoli sulubadela abaha maadelahilä, nulogi gobemolömelëla säi. 10 Amala säi amo nabalahilä, udia dolö gegedoi nefolalo amolia Yonema nabahalea, Amai nilïa edo hamomolödula nabi. 11 Amala nabasebegi, ea säla obëgësalea, Afädëa fagulo äudä dibe ameada, elö fagulo maade amogali ïmalo. Amase, afädë molö galebe ameada, amo gadola wäla hamomalola säla i. 12 Dolö odoa dagisi muni nelo nefolalo amolige Yonea ili ödägi gemäia misi nefolalo. Ilia ema nabahalea, Säla Olelelo-o, nilïa edo hamomolödula nabi. 13 Amala nabasebegi, ea ilima säla obëgësalea, Dilia dagisi muni neahalea, gamanea säi amo gadolamu nimalo. Odoa baala nimabiola säla ï. 14 Amo gadola wäla, ami dolö odoaea Yonema nabahalea, Nilïa edo hamomolödula nabi. Amalebe, Yonea ilima säla obëgësalea, Udia dolöma muni neahalea, nolealela egedidigila säla nimabio. Amase, odoaïe muni nimolöïe gudisalea wäfalï säsäla gudimabio. Ami ilia bidi ïasebe amoda, dofeala helësëmolö dialeala säi.

15 Udia dolö asigia sisiläfüla beaha nefolalo amolia asigia, Yone eda Gelesoledula helësëi. 16 Amala helësësebegi, Yonea ili sulubadelama sähalea, Nada dili ödäea gesa neawemelë. Be, hobeala afädë moholö neebe amoda, nïe geloi amo baagila awäla, eda geloi edefade neebe amo moholömelë. Neda hedabi made ameada, ïe emo usili fisigämolö amo dofea made neawe. Eada dili Eleloi Gesamilea nulo söalea gemolömelë. 17 Eada eladi gadoi ëi widi dobi amoïe isole giwile gasala sadia adogola mogeloïe nama gadoi gaula nea. Ea mogela iso amo mosö afädëgi negesilahilä, ïe widi dobilo sege amo gëgelë doala digila, giwi amo nulo usilo made, wisamu neebea ami gobemolömelëla säla ï. 18 Udia dolö amolile isogi gäwilasila, Yonea ado yafie odoa säla ïalahilä, Ado Mala Hedabi säla ïaha nelo.

Heledoea Yone galabaia negei

19 Ilile gamane beaha aligilo Heledoea ïe edoo Filibiïe udia Helodiasa fedela nii amogige, mala nafade odoa hamoi amogige, Yonea Heledoma nemoi. 20 Amala nemosebegi, Heledoea ïe nafade hamoi amolidaia baala edela, oböla Yone galabaia negei.

Yonea Yesu ödägi gei

(Madiu 3.13-17; Maga 1.9-11)

21 Yonea udia dolö sulubadela ödägi gesalea, Yesuge ödägi gei. Amala gesebegi, Yesuea Godebalä adoi amole, mu dusuia gala 22 Eleloi Gesami haea maliabu gadoi Yesudaia digala fii. Amala hamose amo gaalu, selesaia mosöala ado afädë säia idogosalea, Dida nïe malö. Na di boba hamosa neawe. Dima edefademalä obeägïsa neawela säi.

Yesuïe yaua mäula ilile ëi

(Madiu 1.1-17)

23 Yesuea hä, ïe hamoi mi gäwila hamosa nelo amoda, gäheo i nabülasi ohodoa gadoi nea hamosa nelo. Udia dolö nefolalo amoliada, eda Yosebeïe malö neala helësësa nefolalo.

Yosebe eda, Hilaiïe malö nelo.

24 Hilai eda, Madadaïe malö.

Madada eda, Ilibaiïe malö.

Ilibai eda, Maligiïe malö.

Maligi eda, Yanaiïe malö.

Yanai eda, Yosebe edaioïe malö.

25 Yosebe edaioda, Madadiasaïe malö.

Madadiasa eda, Amosiïe malö.

Amosi eda, Nahumuïe malö.

Nahumu eda, Eseliïe malö.

Eseli eda, Nagaiïe malö.

26 Nagai eda, Madaïe malö.

Mada eda, Madadiasa elöïe malö.

Madadiasa eda, Semeniïe malö.

Semeni eda, Yosegeïe malö.

Yosege eda, Yodaïe malö nelo.

27 Yoda eda, Yoananaïe malö.

Yoanana eda, Elesaïe malö.

Elesa eda, Selubabeleïe malö.

Selubabele eda, Sealadieleïe malö.

Sealadiele eda, Neliïe malö.

28 Neli eda, Melegiïe malö.

Melegi eda, Adiïe malö.

Adi eda, Gosamaïe malö.

Gosama eda, Elemadamaïe malö.

Elemadama eda, Eliïe malö.

29 Eli eda, Yasuaïe malö.

Yasua eda, Elieseïe malö.

Eliese eda, Yolimiïe malö.

Yolimi eda, Madadaïe malö.

Madada eda, Ilibaiïe malö.

30 Ilibai eda, Simeonoïe malö.

Simeono eda, Yudaïe malö.

Yuda eda, Yosebeïe malö.

Yosebe eda, Yonamaïe malö.

Yonama eda, Eliagimiïe malö.

31 Eliagimi eda, Meleaïe malö.

Melea eda, Menaïe malö.

Mena eda, Madadaïe malö.

Madada eda, Nadanaïe malö.

Nadana eda, Debidiïe malö.

32 Debidi eda, Yesiïe malö.

Yesi eda, Obediïe malö.

Obedi eda, Boasaïe malö.

Boasa eda, Salomonoïe malö.

Salomono eda, Nasonoïe malö.

33 Nasono eda, Aminadabaïe malö.

Aminadaba eda, Adaminiïe malö.

Adamini eda, Alaniïe malö.

Alani eda, Hesolonoïe malö.

Hesolono eda, Feleseïe malö.

Felese eda, Yudaïe malö.

34 Yuda eda, Yeigabaïe malö.

Yeigaba eda, Aisagaïe malö.

Aisaga eda, Abalahamaïe malö.

Abalahama eda, Delaïe malö.

Dela eda, Neholoïe malö.

35 Neholo eda, Seluguïe malö.

Selugu eda, Eleuïe malö.

Eleu eda, Felegeïe malö.

Felege eda, Ebeliïe malö.

Ebeli eda, Selaïe malö.

36 Sela eda, Gainanaïe malö.

Gainana eda, Alabagasadaïe malö.

Alabagasada eda, Semeïe malö.

Seme eda, Noaïe malö.

Noa eda, Elamegeïe malö nelo.

37 Elamege eda, Meduselaïe malö.

Medusela eda, Inogoïe malö.

Inogo eda, Yaledeïe malö.

Yalede eda, Mahalaleleïe malö.

Mahalalele eda, Genanaïe malö.

38 Genana eda, Enosoïe malö.

Enoso eda, Sedeïe malö.

Sede eda, Adamaïe malö.

Adama eda, Godeïe malö nelo.

<- Ulugu 2 Ulugu 4 ->