1 መꬍና ጎዳይ ሙሳነ አሮና ሀዋዳን ያጌዳ፤ 2 “መꬍና ጎዳይ ህግያን አዛዜዳ ዎጋይ ሀዋ: ትላ ቦላና ደእያ ዎይ ቦርስያባይ ባይና፥ እ ሞርግያን ሞርገ ምꬃይ ዎꬍቤና ዞኦ ኡሳቶ ነዉ አሀና ማላ፥ እስራኤልያ አሳዉ ኦድተ። 3 ቄስያ ኤልኣዛራዉ እዞ እምተ፤ እ እዞ ዱንካኔዳ ሳኣፐ ጋጻ አፍና፥ እት አሳይ እዞ አ ስንꬃን ሹኮ። 4 ቄስያ ኤልኣዛር እ ሱꬃፐ አማሬዳዋ ባረ ብራꬍያን አኪደ፥ ጋከትያ ዱንካንያዉ ስንꬃ ባጋና ላፑን ገደ ጫጫፎ። 5 እ ጼልሽን ኡሳታ ጹገቱ፤ እ ጋልባይ፥ አሹ፥ ሱꬃይነ ቶጪ ጹገቶ። 6 ቄሲ ዝጋ፥ ሂሶጵያ ታሽያነ ዞኦ ቁንጩትያ አኪደ፥ ኡሳቶ ጹግያ ታማን ኦሎ። 7 ሄዋፐ ጉይያን፥ ቄሲ ባረ ማዩዋ ሜጮ፤ ባረ ቦላካ ሃꬃን ሜጨቶ፤ ያትደ ዱንካኔዳሳ ገሎ፤ ሽን ኦማርሳ ጋካናዉ እ ዎጋዳን ቱና ግዳናዋ። 8 ሄ ኡሳቶ ጹጌዳዌ ቃይ ባረ ማዩዋ ሜጮ፤ ባረ ቦላካ ሃꬃን ሜጨቶ፤ እካ ቃይ ኦማርሳ ጋካናዉ ዎጋዳን ቱና ግዳናዋ።

9 “ሄዋፐ ጉይያን፥ ጌሻ አሳይ ኡሳታ ጹገቴዳ ብድንꬃ ሺሺደ፥ ዱንካኔዳ ሳኣፐ ጋጻና ጌሻ ሳኣን ዎꬆ። እስራኤልያ አሳይ ቱናተꬃፐ ጌይያ ሃꬃን ጎኤታናዉ ሄዋ ናግ ዎꬃና፤ ሄዌ ናጋራፐ ጌሻናሳ። [a] 10 ቃይ ኡሳት ብድንꬃ ሺሼዳ አሳይ ባረ ማዩዋ ሜጮ፤ ኦማርስ ጋካናዉ እ ዎጋዳን ቱና ግዳናዋ። ሀ ዎጋይ እስራኤልያ አሳዉነ ኡንቱንቱ ግዱዋን ደእያ ሀራ ጋደ አሳዉ ላኦካ መꬍና ዎጋ ግዳናዋ።

11 “ሀይቄዳ አሳ አሃ ቦችያ ኦንነ ላፑን ጋላሳ ዎጋዳን ቱናና። 12 ሄ ቱናተꬃፐ ጌይያ ሃꬃን ሄዛንꬃ ጋላስነ ላፑንꬃ ጋላስ፥ እ ባረና ጌሾ፤ ሄዋፐ ጉይያን፥ እ ዎጋዳን ጌሻ ግዳናዋ፤ ሽን ሄዛንꬃ ጋላሳንነ ላፑንꬃ ጋላሳን ባረና ጌሻና ꬋዮፐ፥ እ ጌሻ ግደና። 13 ሀይቄዳ ኡራ አሃ ቦችያ ኦንነ ባረና ጌሸናን አጎፐ፥ መꬍና ጎዳ ዱንካንያ እ ቱንሴ፤ ሄ ኡራይ እስራኤልያ አሳ ግዶፐ ቦሄቶ። ቱናተꬃፐ ጌይያ ሃꬃይ አ ቦላን ጫጫፈትቤና ድራዉ፥ እ ቱና፤ አ ቱናተꬃይ አ ቦላን ጋምኤ።

14 “እት ኡራይ ዱንካንያ ግዶን ሀይቆፐ ደእያ ዎጋይ ሀዋ: ዱንካንያ ግዶ ገልያ ኦንነ፥ ቃይ ዱንካንያ ግዶን ደእያ ኡባይካ ላፑን ጋላሳ ቱና ግዳናዋ። 15 ሄዋዳንካ፥ ቁምኤተናን ዶያ ደእያ ሚሻ ኡባይ ቱና ግዳናዋ። 16 ቃይ ደምባን ማሻን ሀይቄዳ አሳ፥ ዎይ ጮ ሀይቄዳ አሃ፥ ዎይ አሳ መቀꬃ፥ ዎይ ዱፉዋ ቦችያ ኦንነ ላፑን ጋላሳ ቱና ግዳናዋ።

17 “ቱናተꬃፐ ጌሻናዉ ጹጌዳ ኡሳት ብድንꬃፐ አማሬዳዋ አካደ፥ ኦቱዋን ዎꬃደ፥ ፑልቶ ሃꬃ አን ትጋ፤ 18 ጌሻ አሳይ ሂሶጵያ ቦንጭያ አኪደ፥ ሃꬃን ቱሽ ከሲደ፥ ዱንካንያ፥ ዱንካንያን ደእያ ሚሻ ኡባንነ ሄዋን ደእያ አሳ ኡባ ቦላን ጫጫፎ። ቃይ አሳ መቀꬃ፥ ዎይ ዱፉዋ፥ ዎይ ዎꬌዳ ኡራ፥ ዎይ ሀይቄዳ ኡራ ቦቼዳ አሳ ቦላ እ ጫጫፎ። 19 ጌሻ አሳይ ሄዘንꬃነ ላፑንꬃ ጋላሳን ቱኔዳ ኡራ ቦላን ጫጫፎ። እ ላፑንꬃ ጋላሳን ሄ ኡራ ቱናተꬃፐ ጌሾ፤ ሄ ጌዬዳ ብታኒ ባረ ማዩዋ ሜጮ፤ ባረ ቦላካ ሃꬃን ሜጨቶ፤ ሄ ጋላሳ ኦማርስ እ ጌሻ ግዳናዋ።

20 “ሽን ቱና ኡራይ ባረና ጌሸናዋ ግዶፐ፥ ሄ ኡራይ መꬍና ጎዳ ጌሻ ሳኣ ቱንሴዳ ድራዉ፥ እስራኤልያ አሳ ግዶፐ ቦሄቶ፤ ቱናተꬃፐ ጌይያ ሃꬃይ አ ቦላን ጫጫፈትቤና ድራዉ፥ እ ቱና። 21 ሀዌ ህንተንቶ መꬍና ዎጋ ግዳናዋ። ቃይ ቱናተꬃፐ ጌይያ ሃꬃ ጫጫፍያ አሳይ ባረ ማዩዋ ሜጮ፤ ቱናተꬃፐ ጌይያ ሃꬃ ቦችያ ኦንነካ ኦማርስ ጋካናዉ ቱና ግዳናዋ። 22 ቱና ኡራይ ቦችያ አያይነ ቱኔ። ቃይ ሄዋ ቦችያ ኦንነ ኦማርሳ ጋካናዉ ቱና ግዴ” ያጌዳ።

<- ፓይዱዋ 18ፓይዱዋ 20 ->