1 መꬍና ጎዳይ አሮና፥ “ኔን፥ ነ አቱማ ናናቱነ ሌዋቱ ጌሻ ሳኣ ኦሱዋን ፖለትያ ናጋራ ቶካና፤ ኔንነ ነ አቱማ ናናቱ ጻላላይ ህንተ ቄሰተꬃ ኦሱዋን ፖለትያ ናጋራ ቶካና። 2 ኔንነ ነ አቱማ ናናይ ማርካተꬃ ዱንካንያ ስንꬃን ኦꬅያ ዎደ፥ ኔናና ግዲደ ማዳና ማላ፥ ሌዊያ ዛረ ግድያ ነ ዳቦቱዋ አሀ። 3 ኡንቱንቱ ህንተፐ ጋርሳና ዱንካንያ ኦሶ ኡባ ኦꬅኖ፤ ሽን ኡንቱንቱካ ህንተካ እትፐ ሀይቀናዳን፥ ኡንቱንቱ ጌሻ ሳኣ ሚሻኮነ ያርሽያ ሳኮ ሺቆፕኖ። 4 ኡንቱንቱ ህንተናና እትፐ ግድኖ፤ ጋከትያ ዱንካንያን ደእያ ኦሶ ኡባ ኦꬅኖ። ሌዋቱዋፐ አትና፥ ሀራ ኡራይ ኦንነ ህንተኮ ሺቆፖ። 5 ላኤንꬁዋ እስራኤላቱዋ ቦላ ሀንቁ ዎና ማላ፥ ጌሻ ሳኣነ ያርሽያ ሳኣ ኦሱዋ ኦꬅተ። 6 ሌዋቱዋ ህንተ ዳቦቱዋ እስራኤላቱዋ ግዶፐ ታን ታ ሁጲያዉ ዶራድ። ኡንቱንቱ ጋከትያ ዱንካንያ ኦሱዋ ኦꬃናዉ ህንተንቶ እሙዋዳን እማደ፥ መꬍና ጎዳዉ ዱማያድ። 7 ሽን ኔንነ ነ አቱማ ናናቱ ጻላላይ ያርሽያ ሳኣ ኦሱዋ ኡባነ ጋርዱዋ ግዶን ደእያ ቄሰተꬃ ኦሶ ኡባ ኦꬅተ። ቄሰተꬃ ኦሱዋ ታን ህንተንቶ እሙዋዳን ኦꬃደ እማይ፤ ሀራ ኡራይ ኦንነ ጌሻ ሳኣኮ ሺቅያዌ ሀይቆ” ያጌዳ።

8 ሄዋፐ ጉይያን መꬍና ጎዳይ አሮና፥ “እስራኤላቱ ታዉ እምያ ጌሻ እሞታ ኡባ ታን ነዉ እማድ። ታን ነዉ ነ ድራውነ ነ አቱማ ናናዉ ኡንቱንቱ ድራዉ መꬍናዉ ግሻ ኦꬃደ እማድ። 9 ታዉ እምያ አꬌዳ ጌሻ እሙዋፐ ታማን ጹገተና ባጋይ ህንተሳ ግዳናዋ: ኡንቱንቱ ታዉ እምያ ጌሻ እሙዋ ኡባፐ ካꬃ ያርሹ፥ ዎይ ናጋራ ድራዉ ያርሽያ ያርሹ፥ ዎይ ናቁዋ ድራዉ ያርሽያ ያርሹ ኔሳነ ነ አቱማ ናናቱዋሳ ግዳናዋ። 10 ህንተ ሄዋ ጌሻ ሳኣን ሚተ፤ አቱማዌ ኡባይ ሄዋ ሞ፤ ሄዌ ህንተዉ ጌሻ ግዳናዋ።

11 “ሀዌ ቃይ ኔሳ። እስራኤላቱዋ ቃꬆ ያርሹዋ ኡባ ነዉ፥ ነ አቱማ ናናቶነ ነ ማጫ ናናዉ መꬍናዉ ግሻ ኦꬃደ እማይ፤ ህንተ ጎልያ አሳ ግዶን ዎጋዳን ጌሻ ግድያ ኡባይ ሄዋ ሞ።

12 “ኡንቱንቱ ታዉ እምያ ኮይሮ አይፍያፐ ሎኦ ዎጋራ ዛይትያ ኡባ፥ ያላጋ ዎይንያ ኤሳ ኡባነ ሙሩታ ካꬃ ኡባ መꬍና ጎዳዉ እማይ። 13 ኡንቱንቱ መꬍና ጎዳዉ አህያ ኡንቱንቱ ጋድያን ደእያ ኮይሮ ጋኬዳ አይፊ ህንተሳ፤ ህንተ ጎልያ አሳ ግዶን ዎጋዳን ጌሻ ግድያ ኡባይ ሄዋ ሞ።

14 “እስራኤልያን መꬍና ጎዳዉ ዱማቴዳባይ ኡባይ ህንተሳ። [a] 15 ባይራ የለቴዳ አሳይ ዎይ መሂ፥ እስራኤላቱ መꬍና ጎዳዉ እሜዳዌ ህንተሳ። ሽን ባይራ የለቴዳ አሳነ ባይራ የለቴዳ ጌሻ ግደና መህያ ህንተ ዎዛናዉ በሰ። 16 እት አግና ናናቱዋ ዎዛናዉ ዱንካንያን ኤርቲያ ሚዛንያ (20 ጌራ) ልክያን እቼሹ ጻጋራ ብራ ዎዞ ጋትያ ቃንጽተ። 17 ሽን ሚዛ ባይራ፥ ዎይ ዶርሳ ባይራ፥ ዎይ ዴሻ ባይራ ህንተ ዎዛናዉ ኮሸና፤ ኡንቱንቱ ጌሻ። ኔን ኡንቱንቱ ሱꬃ ያርሽያ ሳኣ ቦላን ጫጫፋ፤ መꬍና ጎዳ ቶሹኩ ጊደ ሳዋና ማላ፥ ኡንቱንቱ ሞꬉዋ ታማን ጹጋ። 18 ኡንቱንቱፐ ቤትያ አሹ ዉጻኬዳ አንጎሱዋዳንነ ኡሸቻ ገድያዳን ህንተሳ። 19 እስራኤላቱ መꬍና ጎዳዉ እምያ ጌሻ ያርሹዋ ኡባ ነዉ፥ ነ አቱማ ናናቶነ ነ ማጫ ናናቶ መꬍናዉ ግሻ ኦꬃደ እማይ። ሀዌካ መꬍና ጎዳይ ኔናናነ ነ ዘረꬃቱዋና ጫቀትያ ማጽንያ ጫቁዋ” ያጌዳ።

20 ቃይካ መꬍና ጎዳይ አሮና፥ “ኡንቱንቱ ጋድያን ኔን አይነ ላታካ፤ ኡንቱንቱ ግዶን ኔና ጋክያ ሻኩ አያይካ ባዋ፤ እስራኤላቱዋ ግዶን ነ ላታይነ ኔና ጋክያ ሻኩ ታና” ያጌዳ።

21 ጾሳይ፥ “ሌዋቱ ጋከትያ ዱንካንያን ኦꬅያ ኦሱዋ ድራዉ፥ እስራኤላቱዋ አስራታ ኡባ ኡንቱንቶ እማድ። [b] 22 ሀቼፐ ዶሚደ፥ እስራኤልያ አሳቱ ባረንቱ ናጋራን ሀይቀና ማላ፥ ጋከትያ ዱንካንያኮ ሺቆፕኖ። 23 ጋከትያ ዱንካንያ ኦሱዋ ኦꬅያዋንቱነ ሄዋን ፖለትያ ናጋራ ቶክያዋንቱ ሌዋቱዋ። ሀዌ የለታ ኡባዉ መꬍና ዎጋ። ሌዋቱ እስራኤልያ አሳ ግዱዋን አይነ ላትክኖ። 24 ሄዋ ድራዉ፥ እስራኤላቱ መꬍና ጎዳዉ እሙዋዳን እምያ አስራታ፥ ታን ሌዋቶ ኡንቱንታ ላታዳን እማድ። ታን ኡንቱንቱባ፥ ‘ኡንቱንቱ እስራኤልያ አሳ ግዱዋን አይነ ላትክኖ’ ያጌዳዌ ሄዋሳ” ያጌዳ።

25 ቃይ መꬍና ጎዳይ ሙሳ፥ 26 “ኔን ሌዋቱዋ ሀዋዳን ያጋ፤ ‘ታን ህንተንቶ ላታዳን እሜዳ አስራታ ህንተ እስራኤልያ አሳፐ አክያ ዎደ፥ ህንተ ሄ አስራታፐ አስራታ መꬍና ጎዳዉ እምተ። 27 ህንተ እሙ ህንተንቶ ካꬃ ቡክያ ኡዱማ ካꬃዳንነ ጉምእያ ዎይንያ አይፍያዳን ፓይደቴ። 28 ቃይ ሀዋዳን እስራኤልያ አሳፐ ህንተ አክያ አስራታ ኡባፐ እሙዋ መꬍና ጎዳዉ እምተ፤ ሀ አስራታፐ መꬍና ጎዳ ድራዉ ቄስያ አሮናዉ ህንተ እማናዉ በሰ። 29 ህንተ አክያ እሞታ ኡባፐ፥ ሎእያዋነ ጌሻ መꬍና ጎዳዉ ግሹዋ ኦꬂደ፥ ህንተ እማናዉ በሴ’ ያጋ።

30 “ቃይ ኔን ሌዋቱዋ፥ ‘ኡባፐ ሎኦ እሙዋ ህንተ እሜዳዋፐ ጉይያን፥ አቴዳዌ ህንተንቶ ካꬃ ቡክያ ኡዱማ ካꬃዳንነ ጉምእያ ዎይንያ አይፍያዳን ፓይደታና። 31 ህንተነ ህንተ ጎልያ አሳይ ሄዋፐ አቴዳዋ ሀቃንነ ሚተ፤ አያዉ ጎፐ፥ ሄዌ ጋከትያ ዱንካንያን ህንተ ኦꬅያ ኦሶ ህንተ ድርጉዋ። 32 ሎኦ ባጋ ጾሳዉ እም ድጌዳዋፐ ጉይያን ህንተ ምያ ዎደ፥ ባይዛንቻ ግድክታ። ሽን ሎኦ ባጋ ሄ እሞታፐ ከሰናን ደኢደ፥ ህንተ እስራኤልያ አሳ እሞታ ቱንሰናዳን ናገትተ። ሄዋዳን ኦꬃና ꬋዮፐ፥ ህንተ ሀይቃና’ ያጋ” ያጌዳ።

<- ፓይዱዋ 17ፓይዱዋ 19 ->