1 መꬍና ጎዳይ ሙሳ ሀዋዳን ያጌዳ፤ 2 “እስራኤልያ አሳዉ ኡባዉ ሀዋዳን ያጋደ ኦዳ፤ ‘ታን፥ መꬍና ጎዳይ፥ ህንተ ጾሳይ ጌሻ ግድያ ድራዉ፥ ህንተካ ጌሻ ግድተ። [a]

3 “ ‘ህንተፐ እቱነ አተናን ባረ አባነ ባረ ዳዮ ቦንቾ፤ ታ ሳምባታቱዋካ ቦንችተ። ታን፥ ጾሳይ፥ ህንተ ጾሳ። [b]

4 “ ‘ታና አጊደ ኤቃቶ ጎይኖፕተ፤ ዎይ ቃይ ብራታፐ ሲልሴዳ፥ ጾሳቱዋ ህንተንቶ መꬎፕተ። ታን፥ መꬍና ጎዳይ፥ ህንተ ጾሳ። [c]

5 “ ‘ህንተ እትፐተꬃ ያርሹዋ መꬍና ጎዳዉ ያርሽያ ዎደ፥ ሄ ያርሹ ህንተ ድራዉ አከታናዳን፥ በስያዋዳን ያርሽተ። 6 ሄ ያርሹ ህንተ ያርሼዳ ጋላሳን ዎይ ዎንተꬃ ጋላሳን ሜተቶ፤ ሄዘንꬆ ጋላሳይ ጋካናዉ አቴዳዌ ደኦፐ ሄዌ ጹገቶ። 7 ሄዛንꬆ ጋላሳን አ ሞፐ፥ ሄዌ ሸነይያባ፤ ታን ሄዋ አክከ። 8 ሄዋ ምያ ኦንነ ባረ ናጋራን ኦሸቴ፤ አያዉ ጎፐ፥ እ መꬍና ጎዳዉ ጌሻ ግዴዳዋ ቱንሴዳ። ሄ አሳይ ባረ አሳ ግዶፐ ቦሄቶ።

9 “ ‘ህንተ ጋድያን ሞኬዳ ካꬃ ህንተ ጫክያ ዎደ፥ ጋድያ ጋጻ ጋካናዉ ጫኮፕተ፤ ቃይ ጫካፐ ስምና ደእያ ቃርምያካ ቃርሞፕተ። [d] 10 ነ ዎይንያ አይፍያ ሙለ ማጻደ ምꬃ ካሎዮፓ፤ ሳኣን ዎꬌዳ ዎይንያ አይፍያካ ማጾፓ፤ ሄዋ ህዬሳቶነ በተቶ አጋ። ታን፥ መꬍና ጎዳይ፥ ህንተ ጾሳ።

11 “ ‘ህንተ ዉኦፕተ።

“ ‘ዎርዶቶፕተ።

“ ‘እቱ እቱዋ ጭሞፕተ። [e]

12 “ ‘ታ ሱንꬃን ዎርዱዋን ጫቆፕተ፤ ያቲደ ህንተ ጾሳ ሱንꬃ ቱንሶፕተ። ታን መꬍና ጎዳ። [f]

13 “ ‘ነ ሾሩዋ ሱጎፓ፤ ዎይ ቦንቆፓ።

“ ‘ከራ ኦꬅያ ብታንያ ድርጉዋ ድጋደ፥ እት ቃማነ ነ ማታን አይሶፓ። [g]

14 “ ‘ቱልያ ሸቆፓ፤ ዎይ ቃይ ቆቅያ ስንꬃን ꬉቢያዋ ዎꬆፓ፤ ሽን ኔን ጾሳዉ ያያ። ታን መꬍና ጎዳ። [h]

15 “ ‘ፕርዳ ፕርዳደ ደሽሶፓ፤ ህዬሳ አ ህዬሳተꬃ ድራዉ ማዳደ ፕርዶፓ፤ ዱርያካ አ ዱረተꬃ ድራዉ ያያደ አጎፓ። ሽን ነ ሾሮ ቱማተꬃን ፕርዳ። [i]

16 “ ‘ነ አሳ ግዶን ኢታ ዝግርሳ አካደ ዩዮፓ።

“ ‘ነ ሾሩዋ ዎꬍያዋ አያነ ኦꬆፓ። ታን መꬍና ጎዳ።

17 “ ‘ነ እሻ ነ ዎዛናን እጾፓ።

“ ‘ነ ሾሩዋ ጋሱዋን ኔን ናጋራ ኦና ማላ፥ አ ሴራ።

18 “ ‘ኩሽያ ጭጎፓ፤ ቃይ ነ አሳፐ እቶነ ኡሉዋን ቅምያ ኦይቆፓ። ሽን ነ ሾሩዋ ነ ሁጲያዳን ሲቃ። ታን መꬍና ጎዳ። [j]

19 “ ‘ታ አዛዞቱዋ ናጋ።

“ ‘ነ መህያፐ እት ቆሞ መህያ ሀራ ቆሞ ዱማ መህያን ብራስሶፓ።

“ ‘እት ሾይቃን ላኡ ቆሞ ዘረꬃ ዘሮፓ።

“ ‘ቃይ ላኡ ቆሙዋፐ ዳደቴዳ ማዩዋ ማዮፓ። [k]

20 “ ‘እት አሳይ ሀራ አሳ ገላናዉ ጊጋ ኡቴዳ ዳንጋጽራትና ግሶፐ፥ ቃይ ሄ ዳንጋጽራታካ ባረ ዳንጋጽረተꬃፐ ዎዘታቤናኖ ግዶፐ፥ ኡንቱንቱ ሙረታናዉ በሴ፤ ሽን እዛ ባረ ዳንጋጽረተꬃፐ ዎዘታቤና ድራዉ፥ ኡንቱንታ ዎꬋናዉ ኮሸና። 21 ግዶፐነ ሄ ብታኒ ባረ ናቁዋ ያርሾ ግድያ ዶርሳ ኦርግያ ጾሳ ዱንካንያኮ መꬍና ጎዳ ስንꬃ አሆ። 22 ቄሲ ሄ ናቁዋ ያርሹዋ ዶርሳ አኪደ፥ ብታኒ ኦꬄዳ ናጋራ መꬍና ጎዳ ስንꬃን አቶ ጊሴ፤ እ ኦꬄዳ ናጋራይካ አቶ ጌተታና።

23 “ ‘ህንተ ካናነ ቢታ ገልያ ዎደ፥ አይፍያ ምያ አይ ቆሞ ምꬃ ቶኮፐካ፥ ሄ ምꬃ አይፍያ ሜተተናዋዳን ፓይድተ፤ ሄዙ ላይꬃይ ዉራናዉ ሄ ምꬃ አይፊ ሜተተና፤ አ ሞፕተ። 24 ኦይደንꬆ ላይꬃን ሄ ምꬃ አይፊ ኡባይ መꬍና ጎዳዉ ጋላታ ሺሽያ ጌሻ ያርሹዋ ግዳናዋ። 25 ሽን ሄ ምꬃ አይፊ ህንተንቶ ሎይꬅ ዳራና ማላ፥ እቼሸንꬆ ላይꬃ አይፍያ ሚተ። ህንተ ሀዋዳን ኦꬆፐ፥ ህንተ ምꬃ አይፊ ዳራና። ታን መꬍና ጎዳይ ህንተ ጾሳ።

26 “ ‘ሱꬃይ አ ግዶን ደእያ አይ አሹዋካ ሞፕተ።

“ ‘ካዮፕተ ዎይ ሻሬቾፕተ። [l]

27 “ ‘ህንተ ሁጲያ ብናና ጋርሳና ዩሽ አꬂደ ቃንጾፕተ፤ ቃይ ህንተ ቡቻካ ዩሽ አꬂደ ቃንጾፕተ። [m]

28 “ ‘ሀይቄዳ አሳ ድራዉ ህንተ ቦላ ቃንጸሬꬆፕተ፤ ዎይ ጫቻ ማላታ ህንተ ቦላን ከሶፕተ። ታን መꬍና ጎዳ።

29 “ ‘ቢታይ ዎዳላ ቱናተꬃን ኩሜዳዋ ግደና ማላ፥ ነ ናቶ ሻርሙጻ ኦሶ አꬃ እማደ ቱንሶፓ። [n]

30 “ ‘ታ ሳምባታቱዋ ቦንችተ፤ ታዉ ጎይንያ ሳኣካ ቦንችተ። ታን መꬍና ጎዳ። [o]

31 “ ‘ሞይትልያ ሃሳይስያዋንቱኮነ ሻሬቾቱዋኮ ቦፕተ፤ ህንተ ቱነና ማላ ኡንቱንታ ኮዮፕተ። ታን፥ መꬍና ጎዳይ፥ ህንተ ጾሳ። [p]

32 “ ‘ፑሉሜዳ አሳነ ጭሜዳ አሳ በእያ ዎደ ኡቴዳ ሳኣፐ ደንዳ ኤቃ፤ ኡንቱንታ ቦንቻ፤ ነ ጾሳዉ ያያ። ታን መꬍና ጎዳ።

33 “ ‘ህንተ ጋድያን ህንተናና ደእያ በተቱዋ ቦላን ሱገꬃባ ኦꬆፕተ።[q] 34 ህንተ ጋድያን ህንተናና ደእያ በተ አሳ ህንተ ቢታ አሳዳን ጼልተ፤ አ ህንተ ሁጲያዳን ሲቅተ። አያዉ ጎፐ፥ ህንተካ ካሰ ግብጼ ጋድያን በተ ግዲደ ደኤድታ። ታን፥ መꬍና ጎዳይ፥ ህንተ ጾሳ።

35 “ ‘ህንተ ጌሳ ልክያባን፥ ሚዛናን ዎꬂደ ልክያባንነ ማክያባን ዎርዶቶፕተ። [r] 36 ህንተ ኪሉዋ ሚዛናይ፥ ህንተ ማክያባይነ ልክያ ሚሻቱ ኡባይ ልከ ግድኖ። ታን ህንተና ግብጼ ጋድያፐ ከሳደ አሄዳ መꬍና ጎዳ ህንተ ጾሳ። 37 ህንተ ታ ህግያነ ታ አዛዙዋ ኡባ ናግተነ ኦꬅተ። ታን መꬍና ጎዳ ያጋ’ ” ያጌዳ።

<- ዎጋ 18ዎጋ 20 ->