1 መꬍና ጎዳፐ ኤርማሳኮ ዬዳ ቃላይ ሀዋ፤ 2 “መꬍና ጎዳ ጌሻ ጎልያ ፐንገን ኤቃ። ሀ ቃላ ሀዋዳን ያጋደ አዋያ፤ ‘ህንተኖ፥ መꬍና ጎዳዉ ጎይናናዉ ሀ ፐንገቱዋና ገልያ ይሁዳ አሳቶ፥ ኡባይካ መꬍና ጎዳ ቃላ ስስተ! 3 ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ “ህንተ ኦግያነ ህንተ ኦሱዋ ላምተ፤ ታን ህንተና ሀ ሳኣን ዎꬃና። 4 ጭሞ ቃላን፥ ሀዌ መꬍና ጎዳ ጌሻ ጎልያ! ሀዌ መꬍና ጎዳ ጌሻ ጎልያ! ሀዌ መꬍና ጎዳ ጌሻ ጎልያ ያጊደ አማነቶፕተ። 5 ህንተ ህንተ ኦግያነ ኦሱዋ ቱሙዋፐ ላሞፐ፥ እቱ እቶ ቱሙዋ ፕርዶፐ፥ 6 በተቱዋነ አዉ ባይና ናናቱዋ፥ አስናይ ሀይቄዳ አምኤ ማጫ አሳ ናቀናን አጎፐ፥ ሀ ሳኣን ጽሎ አሳቱዋ ሱꬃ ጉሰናን አጎፐነ፥ ህንተ ቆሄተናዳን፥ ሀራ ጾሳቶ ጎይነናን አጎፐ፥ 7 ታን ህንተ ማይዛ አዋቶ መꬍ መꬍናዉ እሜዳ ቢታን ህንተና ዎꬃና። 8 በእተ! ህንተ አይነ ፓና ጭሙዋ ቃላን አማነቲታ” ያጌ’ ያጋ” ያጌ።

9 ጾሳይ ሀዋዳን ያጌ፤ “ህንተ ዉኢታ፥ ዎꬊታ፥ ሻርሙጺታ፥ ጫቂደ ዎርዱዋ ማርካቲታ፥ ባኣላ ግያ ኤቃዉ ያርሹዋ ያርሺታ፥ ሀዋፐ ካሰ ህንተ ኤረና ሀራ ጾሳቶ ጎይኒታ። 10 ያቲደ ታ ሱንꬃን ጼገቴዳ ጌሻ ጎልያ ዪደ፥ ታ ስንꬃን ኤቂደ፥ ‘ኑን ሳሮ አቴዶ!’ ያጊታ። ሽን ሀ ሸነይያ ኦሱዋ ኡባ ኦꬃናዉ ሳሮ አቴድቴ? 11 ታ ሱንꬃን ጼገቴዳ ሀ ጌሻ ጎሊ ህንተዉ ፓንጋቱ ቆሰትያ ጎንጎሎ ጌድቴየ? ህንተ ኦꬅያዋ ኡባ ታን ታ ሁጲያን በኣድ” ያጌ መꬍና ጎዳይ። [a]

12 ጾሳይ ሀዋዳን ያጌ፤ “ታን ታ ሱንꬃዉ ደኢያሳ ኦꬃደ ኮይሮ ዶሬዳ፥ ሴሎን ታ ሳኣ አነ ቢተ። ታ አሳ እስራኤልያ ኢታተꬃ ድራዉ፥ ታን ሄ ሳኣ ዋቴደንቶ በእተ። [b] 13 ህንተ ሀ ኡባባ ኦꬄድታ። ታን ህንተዉ ዛራ ዛራደ ኦዳድ፤ ሽን ስሰናን እጼድታ። ታን ህንተና ጼሳድ፤ ሽን ታዉ ኮይበይክታ ያጌ መꬍና ጎዳይ። 14 ሄዋ ድራዉ፥ ታን ሴሎ ቦላ ኦꬄዳዋ፥ ሀዋን ህንተ አማነትያ፥ ታ ሱንꬃን ጼገቴዳ ሀ ጌሻ ጎልያ ቦላካ ኦꬃና። ህንተዉነ ካሰ ህንተ አዋቶ እሜዳ ሳኣን ሀዋን፥ ታን ሴሎ ቦላ ኦꬄዳዋ ማላ ዛረꬃደ ኦꬃና። 15 ህንተ ዳቦቱዋ፥ ኤፍሬማ ዘረꬃቱዋ ታን ድጌዳዋዳን፥ ታ ስንꬃፐ ህንተናካ ድጋና” ያጌ።

16 ጾሳይ ሀዋዳን ያጌ፤ “ኤርማሳ፥ ሄዋ ድራዉ፥ ሀ አሳቶ ዎሶፓ፤ ኡንቱንቱ ግሻታ ኦቾፓ ዎይ ዋሶፓ፤ ኔን ኡንቱንቶ ጋናቶፓ። አያዉ ጎፐ፥ ታን ነዉ ስስከ። 17 ኡንቱንቱ ይሁዳ ካታማቱዋንነ የሩሳላመ ኦገቱዋን ኦꬅያዌ አየንቶ በእኪየ? 18 ናናይ ምꬃ ምጺኖ፤ አዎቱ ታማ ኤꬂኖ፤ ማጫ አሳቱ፥ ‘ሳሉዋ ካታቶ’ ግያ ጾሳትዉ ኡክꬃ ኡካናዉ ꬊልያ ሙናቂኖ። ኡንቱንቱ ታና ቆሀና ጊደ፥ ኡሻ ያርሹዋ ሀራ ጾሳቶ ጉሲኖ። [c] 19 ሀዋን ቱሙ ቆሄትያዌ ታኔ? ሀዋን ቆሄቲደ ዬላትያዌ ባረንቱ ሁጲያዉ ኡንቱንታ ግድክኖ?” ያጌ መꬍና ጎዳይ።

20 ሄዋ ድራዉ፥ ኡባ ሞድያ ጾሳይ ሀዋዳን ያጌ፤ “በእተ፥ ታ ይሉነ ታ ሀንቁ ሀ ሳኣ ቦላ፥ አሳ ቦላነ መህያ ቦላ፥ ጋደን ደእያ ምꬃ ቦላነ ቢታን ደእያ ካꬃ ቦላ ጉካና። ጉኪደ ኤጻና፤ ቶአናዉካ ዳንዳየና” ያጌ።

21 ኡባፐ ዎልቃማ መꬍና ጎዳይ፥ እስራኤልያ ጾሳይ ሀዋዳን ያጌ፤ “ህንተ ጹግያ ያርሹዋ ሀራ ያርሾቱዋና ጉጂደ፥ ሄ አሹዋ ህንተዉ ሚተ። 22 ታን ኡንቱንታ ግብጼ ቢታፐ ከስያ ጋላስ፥ ጹግያ ያርሹዋባ ግድና፥ ሀራ ያርሾቱዋባ ግድና፥ ህንተ ማይዛ አዋቶ ኦዳበይከ ዎይ አዛዛበይከ። 23 ሽን ታን ኡንቱንቶ ሀ አዛዙዋ እማድ፤ ‘ታዉ አዛዘትተ። ያቶፐ፥ ታን ህንተ ጾሳ ግዳና፤ ህንተካ ታ አሳ ግዳና። ህንተዉ ሎአና ማላ፥ ታን ህንተና አዛዝያ ኦግያ ኡባን ሀመትተ’ ያጋድ። 24 ሽን ኡንቱንቱ ታዉ ስሰናን ዎይ ሀይዘናን እጼድኖ። ኡንቱንቱ ባረንቱ ኢታ ዎዛና ሙመተꬃዳን ሀመቴድኖ፤ ኡንቱንቱ ስንꬃዉ ብያዋ አጊደ፥ ጉየ ቤድኖ። 25 ህንተ ማይዛ አዎቱ ግብጼ ቢታፐ ከሴዳ ጋላሳፐ ዶሚደ፥ ሀች ጋካናዉ፥ ታን ታ ቆማቱዋ፥ ትምቢትያ ኦድያዋንታ ዎንትና ዎንትና ህንተዉ ኪታደ ታካድ። 26 ሽን ህንተ ታዉ ስሰናን ዎይ ሀይዘናን እጼድታ። ህንተ ሞርግያ ꬉልሴድታነ ህንተ ማይዛ አዎቱዋፐካ አꬊደ፥ ኢታባ ኦꬄድታ።

27 “ሀዋ ኡባ ኔን ኡንቱንቶ ኦዳና፤ ሽን ኡንቱንቱ ነ ግያዋ ስስክኖ። ኔን ኡንቱንታ ጼሳና፤ ሽን ኡንቱንቱ ነዉ ኮይክኖ። 28 ሄዋ ድራዉ፥ ኤርማሳ፥ ኔን ኡንቱንቶ ሀዋዳን ያጋ፤ መꬍና ጎዳዉ ባረ ጾሳዉ አዛዘተና ዎይ ሴርና ስመና ካዉተꬃይ ሀዋ። ቱሙ ꬋዬዳ፤ ቱማይ ኡንቱንቱ እንጻርሳፐ ባዬዳ። 29 ህንተ ሁጲያ ሜዲደ ኦልተ። አያይነ ባይና ꬎቃ ደረቱዋ ቦላ ከሲደ ዝላልተ። አያዉ ጎፐ፥ መꬍና ጎዳይ ባረና ይሎዬዳ የለታ እጼዳነ አግ ባሼዳ ያጋ” ያጌ።

30 ቃይካ መꬍና ጎዳይ ሀዋዳን ያጌ፤ “ይሁዳ አሳቱ ታ ስንꬃን ኢታባ ኦꬄድኖ። ኡንቱንቱ ታ ሱንꬃን ጼገቴዳ ጌሻ ጎልያ ቱንሳናዉ፥ ታና ሸነይያ ኤቃቱዋ አሂደ፥ አ ግዶን ዎꬄድኖ። 31 ኡንቱንቱ ባረንቱ አቱማ ናናቱዋነ ማጫ ናናቱዋ ታማን ጹጊደ ያርሻናዉ፥ ህኖማ ዛንጋራ ꬎቃን ቶፌታ ግያ ያርሹዋ ሳኣ ግምቤድኖ። ሽን ሄዌ ታን ኡንቱንቱ አዛዛቤናባነ ታ ቆፋን ባይናዋ። [d] 32 ሄዋ ድራዉ፥ ሄ ሳአይ ህኖማ ዛንጋራ ዎይ ቶፌታ ጌተትያዌ አቲደ፥ ሹካ ዛንጋራ ያገቲደ ጼሰታና ጋላሳቱ ዪኖ ያጌ መꬍና ጎዳይ። አያዉ ጎፐ፥ ሞግያ ሳአይ ባይና ድራዉ፥ ቶፌት ኡንቱንቱ ባረንቱ አሃ ሞግያ ሳኣ ግዳናዋ። 33 ሄ ዎደ ሄ አሳቱዋ አሃይ ሳሉዋ ካፎቶነ ሳኣ ዶአቶ ቁማ ግዳና፤ ኡንቱንቱ ያሽሲደ የደርስያዌ ደኤና። 34 ታን እልልሳነ ናሸቻ ኮሻይ፥ ቡላችያዋነ ቡላቼትያን ኮሻይ ይሁዳ ካታማቱዋንነ የሩሳላመ ኦገቱዋን ስሰተናዳን ድጋና። አያዉ ጎፐ፥ ቢታይ መላ አታና” ያጌ። [e]

<- ኤርማሳ 6ኤርማሳ 8 ->