1 ቃይካ ጾሳይ፥ “ህንተኖ፥ ቢንያማ አሳቶ፥ ህንተ ሸምፑዋ አሻናዉ ባቃትተ! የሩሳላመፐ ከስተ! ታቆአ ካታማን ማላካታ ፑንተ! ቤት-ሀካሬማ ግያ ሳን ማላታ በስተ! አያዉ ጎፐ፥ ሁጲሳ ባጋፐ ኢታባይነ ባላ ባሻይ ያና ሀኔ። 2 ታን ሎእያነ ናሸችያ ጽዮነ ካታማቱዋ ꬋይሳና። 3 ሞርከቱ ሄንꬃንቻቱዋዳን ባረንቱ ዉድያ አኪደ፥ አ ቦላ ያና። አ ዩሹዋን ባረንቱ ዱንካንያ ኤሳና፤ ባረንቱ ዉድያነ ባረንቱ ሳኣን ሳኣን ሄማና። 4 ኡንቱንቱ እቱ እቱዋ፥ ‘የሩሳላመና ኦለታናዉ ጊግተ! ደንድተ! አነ ኑን አ ሴታ ጋላስ ኦሌቶ። ሽን አየ አና! ሳአይ ቃሜ፤ ኦማርሳ ኩዋይ አዱቂ አዱቂ ቤ። 5 ሄዋ ድራዉ፥ ደንድተ! አነ ቃማ ኦሌቶ፤ አ ጌሱዋ ላሌቶ’ ያጊደ ማቀቲኖ” ያጌ።

6 ኡባፐ ዎልቃማ መꬍና ጎዳይ ሀዋዳን ያጌ፤ “ምꬃቱዋ ቃንጽተ። የሩሳላመ ግምቢያ ማታን ቢታ ዶሪደ ድድቅተ። ሄ ካታማን ናቁ ኩሜዳ ድራዉ፥ እ ሙረታናዉ በሴ። 7 ኦላይ ባረ ሃꬃ ፑልትያዋዳን፥ እካ ባረ ኢታተꬃ ፑልቴ። ማካላባይነ ባሻባይ አ ግዶን ስሰቴ። ኡባ ገደ አ ሳአይነ ማዱꬃይ ታ ስንꬃን ቤቴ። 8 ኔኖ የሩሳላመ፥ ታን ኔና ሴርያዋ አካ። አከናን እጾፐ፥ ታን ኔፐ ሻከታናነ ነ ቢታ እት አሳይነ ደኤና ባድነ ቢታ ከሳና” ያጌ።

9 ኡባፐ ዎልቃማ መꬍና ጎዳይ ሀዋዳን ያጌ፤ “ዎይንያ ቴራ ማጽያዋዳን፥ እስራኤልያ አሳ አቴዳዋንታ ሎይꬂደ ማጽተ። ዎይንያ ቴራ ቆርያ አሳዳን፥ ህንተ ኩሽያ ዳሻቱዋ ግዶ ላኤንꬁዋካ የድተ” ያጌ።

10 ታን ኦስ ኦዶሻ? ኦና ሴሮሻ? ኦን ስሳንዴሻ? በእተ፥ ኡንቱንቱ ስሰና ማላ፥ ኡንቱንቱ ሀይꬃይ ባረት ኡቴዳ። በእተ፥ መꬍና ጎዳ ቃላይ ኡንቱንቶ ቅሊጭያዋ ግዴዳ፤ ኡንቱንቱ አን ናሸትክኖ። 11 ሄዋ ድራዉ፥ መꬍና ጎዳ ሀንቁ ታናን ኩም ኡቴዳ። ታን ሀ ሀንቁዋ ተአናዉ ዳንዳይከ።

ያትና፥ ጾሳይ ታና ሀዋዳን ያጌ፤ “ታ ሀንቁዋ ኦግያን ደእያ ናናቱዋ ቦላነ ሺቄዳ ያላጋ አሳ ቦላ ትጋ። ማቻቶካ አስናካ፥ ጭም ዉሬዳ አሳካ እ አክ ባና። 12 ታን ሄ ቢታን ደእያዋንቱ ቦላ ታ ኩሽያ የድያ ዎደ፥ ኡንቱንቱ ጎለቱ፥ ኡንቱንቱ ጎሻናካ ኡንቱንቱ ማቼቱዋናካ ኡባይ ሀራቶ እመታና” ያጌ መꬍና ጎዳይ። [a]

13 ቃይካ ጾሳይ ሀዋዳን ያጌ፤ “ጉꬃይካ ዳሩካ ኡባይ ዎꬍያ ማናዉ ይርገቴ። ትምቢትያ ኦድያዋንቱካ ቄሳቱ ካ ኡባይ አሳ ጭሚኖ። 14 ታ አሳ ማዱꬃ ሳከናባ ጊደ፥ ጉꬃ ꬋልያ ዎꬂኖ። ሳሩ ባይናን፥ ‘ሳሮ፤ ሳሮ!’ ያጊኖ። [b] 15 ሀ ሸነይያ ኦሱዋ ኦꬂደ፥ ኡንቱንቱ ዬላቴድኖ? ቱይት፥ ኡንቱንቱ ሙለካ ዬላትበይክኖ። ኡንቱንቱ ዬላይ አየንቶካ ኤርክኖ። ሄዋ ድራዉ፥ ኡንቱንቱካ ኩንዴዳዋንቱ ግዶን ኩንዳና። ታን ኡንቱንታ ሙርያ ዎደ፥ ኡንቱንታ ካዉሻና” ያጌ መꬍና ጎዳይ።

16 መꬍና ጎዳይ ሀዋዳን ያጌ፤ “ኦግያን ኤቂደ ጼልተ፤ በን ሎሶቱ ደኢያሳ ኦችተ። ‘ሎኦ ኦጊ ሀቃን ደኢ?’ ያጊደ ኦችተነ አን ሀመትተ። ያቲደ ህንተዉ ሸምፕ አክተ። ያግና ህንተ፥ ‘ኑን ሄ ኦግያን ሀመቶኮ!’ ያጌድታ። 17 ታን ናግያዋንታ ህንተ ቦላ ሱንꬃደ፥ ‘ማላካታይ ፑነትያ ዎደ ስስተ!’ ያጋደ ኦዳድ። ሽን ህንተ፥ ‘ኑን ስሶኮ’ ያጌድታ።

18 “ሄዋ ድራዉ፥ ካዉተꬃቶ፥ ስስተ! ማባራቶ፥ ታን ታ አሳ ኦꬅያዋ ኤርተ! 19 ሳኣን ደእያ አሳቶ፥ ሀዋ ስስተ! ታን ኡንቱንቱ ኢታ ቆፋ ድራዉ፥ ኢታባ ሀ አሳ ቦላ አሃድ። አያዉ ጎፐ፥ ኡንቱንቱ ታ ቃላ ስሰናን እጼድኖ፤ ታ ህግያካ ኦል ባሼድኖ። 20 ሳባ ግያ ቢታፐ ዬዳ እጻናይ ዎይ ሃኮ ቢታፐ ዬዳ ሳዊያ ቅማሚ ታዉ አይሴ? ህንተ ጹግያ ያርሹካ አከተና። ህንተ ያርሹ ታና ናሸቼና” ያጌ።

21 ሄዋ ድራዉ፥ መꬍና ጎዳይ ሀዋዳን ያጌ፤ “በእተ፥ ታን ሀ አሳ ስንꬃን ꬉበቱዋ ዎꬃና። አዎቱነ ናናቱ እትፐ ኡንቱንቱን ꬉበታና። ሾሮቱነ ላገቱ ꬋያና” ያጌ።

22 ቃይካ መꬍና ጎዳይ ሀዋዳን ያጌ፤ “በእተ፥ ሁጲሳ ባጋ ቢታፐ ኦላንቻቱ ዪኖ፤ እት ዎልቃማ ካዉተꬃይ ሳኣ ጋጻፐ ደንዴ። 23 ኡንቱንቱ ዎንዳፍያነ ቶራ ኦይቄድኖ። ኡንቱንቱ ቃረት ባይናዋንታነ የድ ማረናዋንታ። ኡንቱንቱ ባረንቱ ፓራን ፕሪጽያ ዎደ፥ አባይ ጉምያዋዳን ጉሚኖ። ህንተኖ፥ ጽዮነ ካታማ አሳቶ፥ ኡንቱንቱ ህንተና ኦላናዉ እት አሳዳን ሳልፔድኖ” ያጌ።

24 ኑን ሄ ኦዱዋ ስስና፥ ኑ ኩሺ ህልስ ጌዳ። ምሽራቶ ኦይꬃይ ኦይቂያዋዳን፥ ኑና መቱ ኡንኤዳ። 25 ሾይቃ ከሶፕተ፤ ኦግያናካ ሀመቶፕተ። አያዉ ጎፐ፥ ሞርኪ ማሻ ኦይቄዳ፤ ያና ሃናካ ዳጋንꬅያባይ ደኤ። 26 ሀእ ታ አሳዉ፥ ማቃ ማዪደ፥ ብድንꬃን ጎንዶረትተ፤ ባረ መጽ እት ናአዉ ዬክያዋዳን ሴላ ዬኩዋ ዬክተ። አያዉ ጎፐ፥ ꬋይስያዌ አኬከናን ደእሺና፥ ኑ ቦላ ያና።

27 ጾሳይ ኤርማሳ ሀዋዳን ያጌ፤ “ኤርማሳ፥ ኔን ኡንቱንቱ ኦግያ ጾሞሳና ማላነ ፓጫና ማላ፥ ታን ኔና ብራታ ፓጭያ አሳ ከሳድ፤ ታ አሳካ ፓጨትያ ብራታ ከሳድ። 28 ኡንቱንቱ ኡባይ ዝግር ዩይያ፥ ኦድና አከና ማካላንቻ። ኡንቱንቱ ናሃስያነ ብራታ፤ ኡንቱንቱ ኡባይካ ባይዙዋ ኦꬂኖ። 29 ብራታ ቦላን ደእያ ሽኣ ጹጊደ ጌሻና ማላ፥ ዎምፒናይ ዎልቃፐ ዎምፒነቴ። ሽን ጌሻናዉ ዋየቴዳ ዋዪ ኡባይካ መላ፤ ታ አሳ ግዶን ደእያ ኢታቱ ክችበይክኖ። 30 መꬍና ጎዳይ ኡንቱንታ ኦል አጌዳ ድራዉ፥ ኡንቱንቱ ኦለቴዳ ብራ ጌተቲኖ” ያጌ።

<- ኤርማሳ 5ኤርማሳ 7 ->