1 ሄዋፐ ጉይያን መꬍና ጎዳይ ሙሳ፥ “ባ፤ ግብጼ ካትያኮ ባደ፥ ‘መꬍና ጎዳይ ሀዋዳን ያጌ፤ “ታዉ ጎይናና ማላ፥ ታ አሳ የዳ። 2 ኔን ኡንቱንታ የደናን እጾፐ፥ ታን ነ ቢታ ኡባን ሸꬍያ ኩንꬃና። 3 ናይለ ሻፋን ሸꬊ ሾሀካታና። ኡንቱንቱ ሾሀካት ከሲደ ነ ሶ፥ ነ ስርጻ፥ ነ ግሱዋ ግዶ፥ ነ ኦሳንቻቱዋ ጎልያ ግዶ ገላና፤ ነ አሳ ቦላ ከሳና፤ ነ ጮጭያነ ነ ꬊልያ ዎꬅያ ከርያን ገላና። 4 ሸቱ ነ ቦላ፥ ነ አሳ ቦላነ ነ ኦሳንቻቱዋ ኡባ ቦላ ከሳና” ያጌ’ ያጋደ ኦዳ” ያጌዳ።

5 ሄዋፐ ጉይያን መꬍና ጎዳይ ሙሳ፥ “ኔን አሮና፥ ‘ነ ጻምኣ ኦይቃደ፥ ሻፋቱዋ ቦላ፥ ዜሬቶ ሃꬃቱዋ ቦላነ ድኡዋ ኦላ ቦላ ነ ኩሽያ ምጫደ ሸቱ ግብጼ ጋድያ ቦላን ከሳናዳን ኦꬃ’ ያጋደ ኦዳ” ያጌዳ። 6 አሮነ ግብጼ ሃꬃቱዋ ቦላ ባረ ኩሽያ ምጭና ሸቱ ከሲደ፥ ግብጼ ጋድያ ማዬድኖ። 7 ሻሬቻቱካ ባረንቱ ꬋማሹዋን ሄዋዳን ኦꬄድኖ፤ ኡንቱንቱካ ግብጼ ጋድያን ሸꬊ ከሳናዳን ኦꬄድኖ።

8 ካቲ ሙሳነ አሮና ጼስሲደ፥ “ሀ ሸቱዋ ታፐነ ታ አሳፐ ድጋና ማላ፥ መꬍና ጎዳ ህንተንቱ ዎስተ፤ ያቶፐ መꬍና ጎዳዉ ያርሹዋ ያርሻና ማላ፥ ታን አሳ የዳና” ያጌዳ። 9 ሙሴ ካትያ፥ “ካትያዉ ሸቱ ኔፐነ ነ ሶፐ ꬋያና ማላነ ናይለ ሻፋ ጻላላን አታና ማላ፥ ታን ነዉ፥ ነ ኦሳንቻቶነ ነ አሳዉ ዎሳና ዎድያ ኔን ኬራ” ያጌዳ። 10 ካቲ፥ “ዎንታ” ያጌዳ። ሙሴ፥ “መꬍና ጎዳ ኑ ጾሳ፥ ማላይ ኦንነ ባይናዋ ኔን ኤራና ማላ፥ ኔን ጌዳዋዳን ሀናናዋ። 11 ሄ ሸቱ ኔፐ፥ ነ ጎልያፐ፥ ነ ኦሳንቻቱዋፐነ ነ አሳፐ ꬋያናዋንታ፤ ኡንቱንቱካ ናይለ ሻፋ ጻላላን አታናዋንታ” ያጌዳ። 12 ሙሴነ አሮነ ካትያ ማታፐ ከሴድኖ፤ ካትያ ቦላ መꬍና ጎዳይ አሄዳ ሸቱዋባ ሙሴ መꬍና ጎዳኮ ዎሴዳ። 13 መꬍና ጎዳይ ሙሴ ኦቼዳዋዳን ኦꬄዳ፤ ሸቱ ሶን ካረንነ ደምባን ሀይቄድኖ። 14 ግብጼ አሳይ ኡንቱንታ ሺሽ ሺሺደ ዶሬድኖ፤ ቢታይ ሄዋ ጽንቁዋን ዜኤዳ። 15 ሽን ካቲ ሸቱ ባይናዋ በኤዳ ዎደ አ ዎዛናይ ዶንጭሌዳ፤ መꬍና ጎዳይ ኦዴዳዋዳንካ፥ እ ሙሴነ አሮነ ኦዴዳ ኦዱዋ ስሰናን እጼዳ።

16 መꬍና ጎዳይ ሄዋፐ ጉይያን፥ ሙሳ “ኔን አሮና፥ ‘ነ ጻምኣ ምጫደ፥ ቢታ ባና ሾጫ’ ያጋደ ኦዳ። ግብጼ ቢታ ኡባን ባናይ ጩቻ ከሳናዋ” ያጌዳ። 17 ኡንቱቱ ሄዋዳን ኦꬄድኖ፤ አሮነ ጻምኣ ኦይቂደ ባረ ኩሽያ ምጪደ፤ ባረ ጻምአን ቢታ ባና ሾጭና አሳነ፥ መህያ ቦላ ጩቻይ ዬዳ። ግብጼ ጋድያን ሀ ጋጻፐ ያ ጋጻ ጋካናዉ፥ ባና ኡባይ ጩቻ ከሴዳ። 18 ሻሬቻቱካ ባረንቱ ꬋማሹዋን ሄዋዳን ኦꬃናዉ ባጸቴድኖ፤ ሽን ዳንዳይበይክኖ። ጩቻይ አሳ ቦላነ፥ መህያ ቦላ ኩሜዳ። 19 ሻሬቻቱ ካትያ፥ “ሀዌ ጾሳ ኦሱዋ” ያጌድኖ። ሽን ካትያ ዎዛናይ ዶንጭሌዳ፤ ጾሳይ ጌዳዋዳንካ፥ እ ኡንቱንቱ ኦድያዋ ስሰናን እጼዳ። [a]

20 መꬍና ጎዳይ ሙሳ፥ “ጉራን ደንዳደ፥ ካቲ ሻፋ ቢሽን አናና ጋከታደ ኔን አ፥ ‘መꬍና ጎዳይ ያጌ፤ “ታዉ ኦꬃና ማላ፥ ታ አሳ የዳ፤ 21 ኔን ታ አሳ የደናን እጾፐ፥ ታን ነ ቦላ፥ ነ ኦሳንቻቱዋ ቦላ፥ ነ አሳ ቦላነ ነ ጎለቱዋ ግዶ ኡዱንጽያ ዉድያ የዳና፤ ግብጼቱዋ ጎለንነ ኡንቱንቱ ደእያ ቢታ ኡባን ኡዱንጺ ኩማናዋ። 22 ሽን ሄ ጋላስ ታ አሳይ በተ ግዲደ ደእያ ጎሸና ጋድያን ኡዱንጺ ኩመናዳን ታን ተኣደ፥ ኡንቱንቱ ቢታ ሻካና፤ ታን መꬍና ጎዳይ፥ ሀ ጋድያ ኡባን ደእያዋ ኔን ሄዋን ኤራና። 23 ታን ታ አሳነ ነ አሳ ሻካና፤ ሀ ዎልቃማ ማላታይ ዎንት ሀናና” ያጌ’ ያጋደ ኦዳ” ያጌዳ። 24 መꬍና ጎዳይ ሄዋፐ ጉይያን፥ ጌዳዋዳን ኦꬄዳ፤ ካትያ ሶንነ አ ኦሳንቻቱዋ ሶን ዳሮ ኡዱንጽያ ዉዲ ዬዳ፤ ግብጼ ጋድያ ኡባ ባይዜዳ።

25 ሄ ዎደ ካቲ ሙሳነ አሮና ጼስሲደ፥ “ቢተ፤ ሀ ጋድያን ህንተንቱ ጾሳዉ ያርሽተ” ያጌዳ። 26 ሽን ሙሴ፥ “ሄዌ ልከ ግደና፤ ኑን መꬍና ጎዳ ኑ ጾሳዉ ሺሽያ ያርሾቱ ግብጼቱዋ ሸነይያዋ ግዳናዋ፤ ኑን ኡንቱንታ ሸነይያ ያርሾቱዋ ኡንቱንቱ ጼልሽን ያርሾፐ፥ ኡንቱንቱ ኑና ሹቻን ጫድክኖ? 27 ኑን መꬍና ጎዳ፥ ኑ ጾሳዉ፥ ያርሾቱዋ ሺሻናዉ እ ኑና አዛዝያዋዳን፥ ሄዙ ጋላሳ ኦግያ መላ ቢታ ባና ኮሼ” ያጌዳ። 28 ካቲ፥ “መꬍና ጎዳዉ፥ ህንተንቱ ጾሳዉ፥ ህንተንቱ መላ ቢታ ቢደ ያርሻና ማላ፥ ታን ህንተንታ የዳና፤ ሽን ህንተንቱ ሃኪደ ቦፕተ፤ ታዉ ሀእ ዎስተ” ያጌዳ። 29 ሙሴ፥ “ታን ነ ማታፐ ከሶ ሳኣናካ መꬍና ጎዳ ዎሳና፤ ሀ ኡዱንጽያ ዉዲ ዎንት ካትያፐ፥ አ ኦሳንቻቱዋፐነ አ አሳፐ ክቻናዋ። ሽን መꬍና ጎዳዉ ያርሻናዉ አሳ የደናን እጻናዉ ካቲ ኑና ዛር ጭመና ማላ አኬኮ” ያጌዳ። 30 ሄዋፐ ጉይያን ሙሴ ካትያ ማታፐ ከሲደ፥ መꬍና ጎዳ ዎሴዳ። 31 መꬍና ጎዳይ ሙሴ ኦቼዳዋዳን ኦꬄዳ፤ ኡዱንꬅያ ካትያፐ፥ አ ኦሳንቻቱዋፐነ አ አሳፐ እቱነ አተናን ክቼዳ። 32 ሽን ሀእካ ቃይ ካትያ ዎዛናይ ዶንጭልና፥ አሳ የደናን እጼዳ።

<- ከሳ 7ከሳ 9 ->