8 መꬍና ጎዳይ ሙሳነ አሮና ሀዋዳን ያጌዳ፤ 9 “ካቲ ህንተንታ፥ ‘ጾሳይ ኦꬅያ ማላታ ታና በስተ’ ግያ ዎደ፥ ኔን አሮና፥ ‘ነ ጻምኣ አካደ፥ ካትያ ስንꬃን ኦላ’ ያጋ፤ ያቶፐ እ ሾሻ ከሳና” ያጌዳ። 10 ሙሴነ አሮነ ካትያኮ ገሊደ መꬍና ጎዳይ ኡንቱንታ አዛዜዳዋዳን ኦꬄድኖ፤ አሮነ ባረ ጻምኣ ካትያ ስንꬃንነ አ ኦሳንቻቱዋ ስንꬃን ኦልና ሾሻ ከሴዳ። 11 ሄዋፐ ጉይያን ካቲ ኤራንቻቱዋነ ብትያዋንታ ጼስስና ኡንቱንቱካ፥ ሀ ግብጼቱዋ ሻሬቾቱ ባረንቱ ꬋማሹዋን ሄዋዳን ኦꬄድኖ። 12 ኡንቱንቱ ኡባይካ ባረንቱ ጻምኣ ጻምኣ ኦልና፥ ጻምአቱ ሾሻ ከሴድኖ፤ ሽን አሮና ጻምአይ ኡንቱንቱ ጻምአቱዋ ምቴዳ። 13 ግዶፐነ መꬍና ጎዳይ ኦዴዳዋዳንካ ካትያ ዎዛናይ ዶንጭሌዳ፤ እ ኡንቱንቱ ኦዱዋ ስሰናን እጼዳ።

14 መꬍና ጎዳይ ሙሳ፥ “ካትያ ዎዛናይ ዶንጭሌዳ፤ አሳ እ የደናን እጼዳ። 15 ካቲ ሃꬃኮ ብያ ዎደ፥ ጉራደ ኔን አኮ ባደ አናና ጋከታናዉ ናይለ ሻፋ ዶናን ኤአ፤ ሾሻዉ ላመቴዳ ጻምኣ ኦይቃ አካደ ባ። 16 ኔን አ፥ ‘መꬍና ጎዳይ፥ እብራዌቱዋ ጾሳይ ኔና፥ መላ ቢታን ታዉ ጎይናና ማላ፥ ታ አሳ የዳ ያጊደ፥ ታና ኔኮ ኪቴዳ፤ ሽን ሀኖ ጋካናዉ ኔን ስሳበይካ። 17 መꬍና ጎዳይ፥ ታን መꬍና ጎዳ ግድያዋ ኔን ሀዋን ኤራና። ታን ናይለ ሻፋ ሃꬃ ታ ኩሽያን ደእያ ጻምአን ሾጭና ሃꬃይ ሱꬃዉ ላመታናዋ። [b] 18 ናይለ ሻፋ ሞሊካ ሀይቃናዋ፤ ሻፋይካ ጽንቃናዋ፤ ግብጼቱ ሄ ሻፋ ሃꬃ ኡሻናዉ ዳንዳይክኖ’ ያጋደ ኦዳ” ያጌዳ።

19 መꬍና ጎዳይ ሙሳ ሀዋዳን ያጌዳ፤ “ኔን አሮና፥ ‘ነ ጻምኣ ኦይቃደ ግብጼ ሃꬃቱዋ ቦላ፥ ሻፋቱዋ ቦላ፥ ዜሬቶ ሃꬃቱዋ ቦላ፥ ድኡዋ ኦላ ቦላን ነ ኩሽያ ምጫ’ ያጋ፤ እ ምጭና ኡንቱንቱ ሱꬃዉ ላመታናዋ፤ ግብጼ ቢታ ኡባን፥ ሀራይ አትና፥ ምꬃፐነ ሹቻፐ ዎጪደ ከሴዳ ሃꬃ ትግያ ሚሻ ኡባ ጋርሳን ደእያ ሃꬃይ ሱꬃዉ ላመታና” ያጌዳ።

20 ሙሴነ አሮነ መꬍና ጎዳይ አዛዜዳዋዳን ኦꬄድኖ። ካትያ ስንꬃንነ አ ኦሳንቻቱዋ ስንꬃን እ ባረ ጻምኣ ደንꬂደ፥ ሻፋ ሃꬃ ሾጭና ሃꬃ ኡባይ ሱꬃዉ ላመቴዳ። 21 ሄ ሻፋ ሃꬃ ግዱዋን ደእያ ሞለቱ ሀይቄድኖ፤ ሻፋ ሃꬃይ ሎይꬅ ዜኤዳ ድራዉ፥ ግብጼ አሳይ ኡሻናዉ ዳንዳይቤና። ግብጼን ኡባ ሳን ሱꬃይ ኩሜዳ። 22 ግብጼ ሻሬቾቱካ ባረንቱ ꬋማሹዋን ሄዋዳን ኦꬄድኖ፤ መꬍና ጎዳይ ኦዴዳዋዳንካ ካትያ ዎዛናይ ዶንጭልና፥ ሙሴነ አሮነ ኦዴዳዋ ስሰናን እጼዳ። 23 ሄዋፐ ጉይያን ካቲ ሀዎ አይነ ህርገናን ባረ ሶ ስሚደ ቤዳ። 24 ግብጼ አሳይ ኡባይ ናይለ ሻፋ ሃꬃ ኡሻናዉ ዳንዳይቤና ድራዉ፥ ኡሽያ ሃꬃ ደማናዉ ናይለ ሻፋ ጋጻን ኦላ ቦኬድኖ።

25 መꬍና ጎዳይ ሃꬃ ሾጮደፐ ላፑን ጋላሳ ግዴዳ።

<- ከሳ 6ከሳ 8 ->