2 ከብሮነ ካታማን ዳዊታዉ ናናይ የለቴድኖ፤ እዝራኤልያ አህኖኣማ የሌዳ ባይራ ናአይ አምኖና፤ 3 ቃርመሎስያ ናባላ አምአታ አብጋላ የሌዳ ናአይ ክልኣብ ላኤንꬁዋ፤ ጋሹራ ካትያ ታልማያ ናታ ማእካ የሌዳ አበሴሎም ሄዘንꬁዋ። 4 ኦይደንꬁ ሀጊት ናኣ አዶንያ፤ እቼሸንꬁ አቢጻል ናኣ ሻፋጽያ። 5 ኡሱፑንꬁ ዳዊታ ማቻት ኤግል ናኣ ይትራኣማ፤ ሀ ናናይ ኡባይ ከብሮናን ዳዊታዉ የለቴድኖ።

6 ሳኦላ አሳናነ ዳዊታ አሳና ኦለትያ ዎደ፥ አባኔር ሳኦላ አሳቱዋ ግዶን ምን ምኒደ ቤዳ። 7 ሳኦላዉ አታ ናታ ርጽፎ ጌተትያ እት ጋራዳታ ደአዉ፤ እያቡስተ አባኔራ፥ “ታ አዉዋ ጋራዳትና አያዉ አቃዲ?” ያጊደ ኦቼዳ።

8 አባኔር አ ሃሳያን ዳርስ ይሎቲደ ያቡስታ፥ “ታና ኔን ይሁዳ ካና ሁጰ ጋድየ? ሀቼ ታን ነ አዉዋ ሳኦላዉ፥ አ እሻቶነ አ ዳቦቶ ሎኣድ፤ ታን ኔና ዳዊታ ኩሽያን አꬃደ እማበይከ። ሽን ሀእ ኔን ታና ሀ ምሽራት ጋሱዋን ሞታዳ! 9-10 ሳኦላ ዛርያፐ ካዉተꬃ ዎꬅ አኪደ፥ ዳነፐ ቢደ በርሳበሀ ጋካናዉ፥ እስራኤልያ ቦላነ ይሁዳ ቦላ፥ ዳዊታ ካዉተꬃ ኤሳናዉ መꬍና ጎዳይ ጫቂ ዎꬄዳ ሀ የዉዋ ታን ኦꬃና ꬋዮፐ፥ ጾሳይ አባኔራ ጉፋንꬆ” ያጌዳ። [a] 11 እያቡስተ አባኔራዉ ያዬዳ ድራዉ፥ ሀራ ቃላ ቃትቤና።

12 አባኔር ከብሮናን ደእያ ዳዊተኮ፥ “ቢታይ ኦሴ? ኔን ታናና ቃላ ጫቁዋ ጫቃ፤ እስራኤልያ አሳይ ኡባይ ኔኮ ስማናዳን ታን ኔና ማዳና” ያጊደ ኪታ የዴዳ።

13 ዳዊተ፥ “ሎኦ! ታን ኔናና ቃላ ጫቁዋ ዎꬃና። ሽን ታን ኔና እትባ ኦቻይ፤ ኔን ታና በአናዉ ይያ ዎደ፥ ሳኦላ ናቶ ሚካሎ ታዉ አከናን ዮፓ” ያጌዳ። 14 ሄዋፐ ጉይያን፥ ዳዊተ ሳኦላ ናኣ እያቡሰቱዋኮ ኪቲደ፥ “ጼቱ ፕልስጼማቱዋ ቃራቱዋ ጭሎሻደ አኬዳ ታ ማቻቶ ሚካሎ ታዉ እማ” ያጌዳ። [b] 15 እያቡስተ ኪታ የዲደ፥ እ አስና ላውሻ ናኣ ፓልጽኤላፐ ዎꬅ አኪደ አህሴዳ። 16 እ አስናይ ባሁሪማ ካታማ ጋካናዉ ዬኪደ እ ጌዱዋ ካሌዳ፤ አባኔር አ፥ “ጉየ ስማደ ሶ ባ” ያጌዳ፤ ብታኒ ጉየ ስሚደ ቤዳ።

17 አባኔር እስራኤልያ ጭማቱዋኮ ቢደ፥ ሀዋዳን ያጌዳ፤ “ዳዊተ ህንተንቱ ቦላ ካተታና ማላ፥ ዳሮ ዎድያ አሞቴድታ፤ 18 አነ ሄኮ ሀእ ፖልተ! አያዉ ጎፐ፥ መꬍና ጎዳይ፥ ‘ታ አሳ እስራኤልያ፥ ታን ፕልስጼማ አሳቱዋ ኩሽያፐነ ኡንቱንቱ ሞርክያ ኡባቱዋ ኩሽያፐ ታ ቆማ ዳዊታ ባጋና አሻና’ ጌዳዋ ሀሳይተ” ያጌዳ። 19 አባኔር ቢንያማ ዛረቶ ዱማ ሃሳዬዳ፤ ሄዋፐ ጉይያን፥ እስራኤልያ አሳይነ ቢንያማ አሳይ ኡባይ ኦꬃናዉ ኮዮዋ ኡባባ ዳዊታዉ ኦዳናዉ ከብሮነ ካታማ ቤዳ።

20 አባኔር ባረናና ላታሙ አሳቱዋ አኪደ፥ ከብሮነ ካታማ ቢና፥ ዳዊተ አስነ አ አሳዉ እሞታ ማኬዳ። 21 ሄዋፐ ጉይያን አባኔር ዳዊታ፥ “ኡንቱንቱ ኔናና ቃላ ጫቁዋ ጫቀታናዳንነ ነ ዎዛናይ አሞትያ ኡባ ሞዳናዳን፥ ታን ባደ እስራኤልያ አሳ ኡባ ካትያዉ ታ ጎዳዉ ሺሻይ” ያጌዳ፤ ዳዊተ አባኔራ ሞይዚደ ሳሮ የዴዳ።

22 ሄ ዎደ ዳዊታ አሳይነ እዮኣበ ኦላፐ ዳሮባ ኦሞዲደ ስሜድኖ፤ ሽን አባኔር ከብሮነ ካታማን ዳዊታና ደኤና፤ አያዉ ጎፐ፥ ዳዊተ የድና እ ሳሮ ቤዳ። 23 እዮኣብነ አናና ደእያ ኦላንቻቱ ጋክያ ዎደ፥ አሳይ እዮኣባ፥ “ኔራ ናኣ አባኔር ካትያ ዳዊታኮ ዪና፥ ካቲ አ የድና፥ እ ሳሮ ቤዳ” ያጊደ ኦዴዳ።

24 ሄዋ ድራዉ፥ እዮኣበ ካትያኮ ቢደ፥ “ዋናዲ! አባኔር ኔኮ ዪና፥ አያዉ ሳሮ የዳድ? ሄኮ እ ቤዳ! 25 ኔራ ናአይ አባኔር ኔና ጭማናዉ፥ ኔን ገልያሳነ ከስያ ሳኣ በአናዉነ ኔን ኦꬅያ ኡባባ ኤራናዉ ዬዳ” ያጌዳ።

26 እዮኣበ ዳዊታ ስንꬃፐ ከሲደ፥ አባኔራ ጌዱዋ ኪታ የዴዳ፤ ኡንቱንቱ አ ሲራ ሃꬃ ኦላ ምያፐ ጉየ ዛሬድኖ፤ ሽን ዳዊተ ሀ የዉዋ ኤረና። 27 አባኔር ከብሮነ ካታማ ጉየ ስሚደ ዬዳ ዎደ፥ እዮኣበ አናና ዱማ ሃሳያናዋዳን ድርሳ ፐንግያ አ አፌዳ፤ ባረ እሻ አሳሄላ ሱꬃ አቻናዉ አባኔራ ኡሉዋ ጫዴዳ፤ አባኔር ሄ ሳኣን ሀይቄዳ።

28 ዳዊተ ሀ የዉዋ ስሴዳዋፐ ጉይያን፥ “ታንነ ታ ካዉተꬃይ ኔራ ናኣ አባኔራ ሱꬃን መꬍና ጎዳ ስንꬃን መꬍናዉካ ኦሸቶኮ። 29 አ ሱꬃይ እዮኣባነ አ አዉዋ ሶ አሳ ኡባ ኦቾ፤ አሹዋ ቦላ ማዱꬃይ ደእያ አሳይ፥ ዎይ ጋልባይ ሎይꬅ ሳክያ አሳይ፥ ዎይ ዎቢያ አሳይ፥ ዎይ ማሻን ሀይቂያ አሳይ፥ ዎይ ኮሻቴዳ አሳይ እዮኣባ ዛርያን ኡባካ ꬋዮፖ!” ያጌዳ። 30 ሄዋዳን ኦꬂደ፥ ጋባኦና ካታማን ከሴዳ ኦላን ባረንቱ እሻ አሳሄላ አባኔር ዎꬌዳ ድራዉ፥ እዮኣብነ አ እሻ አብሻይ አባኔራ ዎꬌድኖ።

31 ዳዊተ እዮኣባነ አናና ደእያ አሳ ኡባ፥ “ህንተንቱ ማዩዋ ፔꬍተ፤ ማቅያ ማይተ፤ አባኔራ ሻንቻማ ስንꬃን ሀመቲደ ዬክተ” ያጌዳ። ካቲ ዳዊተ ሻንቻማ ካሊደ ቤዳ። 32 አባኔር ከብሮናን ሞገቴዳ፤ ካቲ ባረ ቃላ ꬎቂሲደ ዱፉዋን ዬኬዳ፤ አሳይ ኡባይካ ዬኬዳ።

33 ካቲ አባኔራዉ፥

አሳይ ኡባይ አባኔራዉ ዛረꬂደካ ዬኬዳ።

35 ሳአይ ፖኦ ደእሽን፥ ዳዊተ ኡክꬃ ማናዳን ሾባናዉ አሳይ ኡባይ አኮ ዬዳ፤ ሽን ዳዊተ፥ “አዋ አይፊ ዉለናን ደእሽን፥ ኡክꬃ ዎይ ሀራባ ባረናና በኦፐ፥ ጾሳይ ታና ዎꬎ” ያጊደ ጫቄዳ። 36 ካቲ ኦꬄዳዋ አሳይ ኡባይ በኢደ ናሸቴዳ፤ ቱሙካ ካቲ ኦꬄዳ ኡባባይ አሳ ኡባ ናሸቼዳ። 37 ሄዋ ድራዉ፥ ሄ ጋላስ ዳዊታ አሳይ ኡባይነ እስራኤልያ አሳይ ኡባይ ካቲ ኔራ ናኣ አባኔራ ዎꬍስቤናዋ አኬኬድኖ።

38 ካቲ ባረ ቆማቱዋ ሀዋዳን ያጌዳ፤ “እስራኤልያ ቢታን ዎልቃማ አሳይነ ካፑ ሀይቄዳዋ ህንተንቱ አኬክክቴ? 39 ታን ኦከቴዳ ካትያ ግዶፐነ፥ ሀቼ ታዉ ምዪ ፓጬዳ። ሀዋንቱ ጻሩይ ናናይ ታዉ ምኔድኖ፤ ኢታ ኦꬄዳዋንቶ መꬍና ጎዳይ ኡንቱንቱ ኦሱዋዳን ዛሮ” ያጌዳ።

<- 2 ሳሜላ 22 ሳሜላ 4 ->