1 ሄዋፐ ጉይያን ዳዊተ፥ “ይሁዳ ካታማቱዋፐ እቱዋ ፑደ ቦ?” ያጊደ መꬍና ጎዳ ኦቼዳ።

መꬍና ጎዳይ አ፥ “ኤ፤ ባ” ያጌዳ።

ዳዊተ፥ “ሀቃ ቦ” ያጊደ ኦቼዳ።

መꬍና ጎዳይ፥ “ከብሮነ ባ” ያጊደ ዛሬዳ።

2 ዳዊተ ባረ ማቼቱዋ ላአቱዋ፥ እዝራኤልያ አህኖኣሞነ ቃርመሎስያ፥ ናባላ አምአቶ አብጋሎነ አኪደ፥ ከብሮነ ካታማ ቤዳ። [a] 3 ዳዊተ ባረናና ደእያ አሳቱዋካ ኡንቱንቱ ሶ አሳ ኡባና አህና፥ ከብሮነንነ አ ሄራን ደእያ ጉꬃ ካታማቱዋን ኡቴድኖ። 4 ይሁዳ አሳቱ ከብሮነ ካታማ ዪደ፥ ያን ኡንቱንቱ ዳዊታ ይሁዳ አሳ ቦላ ካተያናዉ ኦኬድኖ።

ሳኦላ ሞጌዳዋንቱ ያቤሻ ግልኣደ ካታማ አሳቱዋ ግዴዳዋ ዳዊተ ስሴዳ ዎደ፥ [b] 5 አሳ ኪቲደ ኡንቱንታ፥ “ህንተንቱ ህንተንቱ ጎዳ ሳኦላ ሞጌዳ ኬካተꬃ ድራዉ፥ መꬍና ጎዳይ ህንተንታ አንጆ። 6 ሀእካ መꬍና ጎዳይ አገና ሲቁዋነ ቱማተꬃ ህንተንታ በሶ፤ ቃይ ህንተንቱ ሀ ኬካተꬃ ኦꬄዳ ድራዉ፥ ታንካ ህንተንቶ ሎኦተꬃን ኩሽያ ዛራና። 7 ሀእ ዛር ምንተ፤ ጻልተ፤ አያዉ ጎፐ፥ ህንተንቱ ጎዳይ ሳኦል ሀይቂክቼዳ፤ ቃይ ይሁዳ አሳቱ ታና ኦኪደ፥ ባረንቱ ቦላ ካተዬድኖ” ያጌዳ።

8 ሳኦላ ኦላንቻቱዋ ጋዳዋይ ኔራ ናኣ አባኔር ሳኦላ ናኣ እያቡስታ አኪደ፥ ማህናይማ ጌተትያ ሳኣ አፌዳ። 9 ሄዋፐ ካላ ጋላኣደ፥ አሴራ፥ እዝራኤላ፥ ኤፍሬማ፥ ቢንያማነ እስራኤልያ ቢታ ኡባ ቦላን ካተዬዳ። 10 ሳኦላ ናኣ እያቡስተ እስራኤልያ ቦላ ካተትያ ዎደ አዉ ኦይታሙ ላይꬃ፤ እ ላኡ ላይꬃ ካተቴዳ፤ ሽን፥ ይሁዳ አሳይ ዳዊታ ካሌዳ። 11 ዳዊተ ከብሮናን ይሁዳ አሳቱዋ ቦላ ላፑን ላይꬃነ ኡሱፑን አግና ካተቴዳ።

12 ኔራ ናኣ አባኔርነ ሳኦላ ናኣ እያቡስተ አሳይ ማህናይማፐ ጋባኦና ካታማ ቤድኖ። 13 ጻሩይ ናአይ እዮኣብነ ዳዊታ አሳይ ከስ ቢደ፥ ጋባኦና ዳጋቴዳ ሃꬃ ማታን ኡንቱንቱና ጋከቴድኖ፤ እት ጭታይ ዳጋቴዳ ሃꬃፐ ሄፍንꬃ ባጋና ኡትና፥ እት ጭታይ ሀፍንꬃ ባጋና ኡቴድኖ። 14 ያትና፥ አባኔር እዮኣባ፥ “አነ ዎዳላቱ ደንዲደ፥ ኑ ስንꬃን ኦላ ጋከትኖ” ያጌዳ።

ሄዋፐ ጉየ ዮኣበ፥ “ኤኖ፥ ደንዲደ ጋከትኖ” ያጌዳ። 15 ሄዋ ድራዉ፥ ቢንያማ ባጋዉነ ሳኦላ ናኣ እያቡስተ ባጋዋ ታማነ ላኡ አሳቱ ፓይዱዋን ከሲደ፥ ዳዊታ ባጋዋ ኤቄዳ ታማነ ላኡ አሳቱዋና ኦላ ጋከቴድኖ። 16 እቱ እቱዋ ሁጲያ ኦይቂደ፥ ባረ ኦይቄዳዋ ምይያን ምይያን ማሻ ድርግንꬂደ፥ እትፐ ሀይቄድኖ፤ ሄዋ ድራዉ፥ ጋባኦናን ደእያ ሄ ሳአይ ሄልካት-ሀዙርም (ማሻ ጋድያ) ጌተቴ። 17 ሄ ጋላስ ዎልቃማ ኦላይ ኦለትና፥ ዳዊታ አሳይ አባኔራነ እስራኤልያ አሳነ ጾኔዳ።

18 ጻሩይ ናናይ ሄዙ ዮኣበ፥ አብሻይነ አሳሄል ሄ ሳኣን ደኢኖ፤ አሳሄል ገንእያዳን ኤሌሊደ ዎጼ። 19 አሳሄል ኡሸቻ ዎይ ሀድርሳ ጌናን አባኔራ የደርሱዋ ስኬዳ። 20 አባኔር ጉየ ዛር ጼሊደ፥ “አሳሄላ፥ ላ ኔኔ?” ያጊደ ኦቼዳ።

አሳሄል፥ “ኤ ታና” ያጌዳ።

21 አባኔር አ፥ “እት ባጋ፥ ኡሸቻ ዎይ ሀድርሳ ስማ፤ አሳቱዋፐ እቱዋ ኦይቃደ አ ኦላ ሚሻ ቃራ አካ” ያጌዳ፤ ሽን አሳሄል አ የደርስያዋ አጋናዉ ኮይቤና።

22 ቃይካ አባኔር አሳሄላ፥ “ታን ኔና አያዉ ዎꬎኦ? ታና የደርስያዋ አጋ! ኔና ዎꬋደ፥ ታን ነ እሻ እዮኣባ ዴሙዋ ዎታደ ጼላኔ?” ያጊደ ሴሬዳ። 23 ሽን አሳሄል አ የደርስያዋ አገናን እጼዳ። ሄዋ ድራዉ፥ አባኔር ቶራ ጉየ ቱምኢደ፥ አሳሄላ ኡሉዋ ጫዴዳ፤ ቶራይ ዞክያና ፕን ከሴዳ፤ አሳሄል ሄ ሳኣን ኩንዲደ ሀይቄዳ። አሳሄል ሀይቄዳ ሳኣ ጋኬዳ አሳይ ኡባይ ሄዋን ኤቄዳ።

24 ሽን እዮኣብነ አብሻይ አባኔራ የደርሴድኖ፤ አዋይ ዉልያ ዎደ፥ ጋባኦና መላ ቢታ አፍያ ኦግያን ጊያሀ ካታማፐ ስንꬃ ባጋና ደእያ አማ ጌተትያ ዞዝያ ከሴድኖ። 25 ቢንያማ አሳቱ አባኔራ ጉየና ሺቄድኖ፤ ኡንቱንቱ እት ጭታ ግዲደ፥ እት ደርያ ሁጲያን ኤቄድኖ። 26 ሄዋፐ ጉይያን አባኔር እዮኣባ ጼሲደ፥ “መꬍናዉ ኦለቲደ ደአኔየ? ሀዋ ዉርሰꬃይ ጫሞ ግዳናዋ ኔን ኤርኪ? ነ አሳቱዋ፥ ‘ህንተ እሻቱዋ የደርስያዋ አግተ’ ጌናን አዉደ ጋꬃይ?” ያጌዳ።

27 እዮኣበ አባኔራ፥ “ጾሳይ ኤሮ! ኔን ሃሳየናን አጌዳዋ ግድንቶ፥ ታ አሳይ ባረ እሻቱዋ ሳአይ ዎንታና ጋካናዉ የደርሳና ሽን” ያጌዳ። 28 ሄዋ ድራዉ፥ እዮኣበ ኡልቱዋ ፑኔዳ፤ አሳይ ኡባይ ኤቄዳ። እስራኤላቱዋካ ዛረꬂደ የደርስበይክኖ ዎይ ኦልበይክኖ። 29 አባኔርነ አ አሳይ ሄ ጋላሳ ቃማ ኡባ ሳልፒደ አራባ ጋራራ ቤድኖ፤ ዮርዳኖሳ ሻፋ ፕኔድኖ። ጉራና ሀመቲደ ማህናይማ ስሜድኖ።

30 እዮኣበ አባኔራ የደርስያዋ ባሺደ፥ ባረ አሳ ኡባ እት ሳኣ ሺሼዳ፤ ጼልያ ዎደ፥ አሳሄል ባይናን ዳዊታ አሳፐ ታማነ ኡዱፑን አሳይ ፓጬዳ። 31 ሽን ዳዊታ አሳይ አባኔራ አሳፐነ ቢንያማ ዛራቱዋፐ ሄዙ ጼታነ ኡሱፑን ታሙ አሳቱዋ ዎꬌድኖ። 32 አሳሄላ አሃ አኪደ፥ ቤተሌመ ካታማን ደእያ አ አዉዋ ዱፉዋን ሞጌድኖ፤ እዮኣብነ አ አሳይ ቃማ ሀመቲደ አቄድኖ፤ ዎንቱማꬃን ከብሮነ ካታማ ጋኬድኖ።

<- 2 ሳሜላ 12 ሳሜላ 3 ->