1 ትምቢትያ ኦድያዋንቱፐ እቱዋ ማቻታ ኤልሳአኮ ባደ፥ “ነ ቆማይ ታ አስናይ ሀይቄዳ። እ መꬍና ጎዳዉ ያይያ አሳ ግድያዋ ኔን ኤራሳ። ሽን ሀእ አ አጮ ታ ናና ላኡዋ ባረዉ አይለ ከሳናዉ ዬዳ” ያጋደ አዉ ዋሳዱ።

2 ኤልሳእ እዝዉ፥ “ያትና ታን ነዉ አይ ኦꬆ? ነ ሶን አያይ ደኢ? አነ ታዉ ኦዳ” ያጌዳ።

ምሽራታ፥ “ታዉ ነ ቆማትዉ እት ኦቱዋን ዛይቲ ደእያዋፐ አትና፥ ሀራባይ አያይነ ባዋ” ያጋዱ።

3 ኤልሳእ እዞ፥ “ባ፤ ነ ሾሮቱዋ ኡባፐ መላ ኦቶቱዋ ጋርጻ። ላፋ ጋርጾፓ። 4 ሄዋፐ ጉይያን፥ ሶ ገላደ፥ ነ ቦላነ ነ ናናቱዋ ቦላ እፍꬃ ጎርዳ። ኦቶቱዋ ኡባን ዛይትያ ትጋ፤ ዛይቲ ኩሜዳ ኦቱዋ ኦቱዋ እት ባጋ ዛራ” ያጌዳ።

5 ምሽራታ ባደ፥ ካርያ ባረ ቦላነ ባረ ናናቱዋ ቦላ ጎርዳዱ። ኡንቱንቱ እዝዉ ኦቶቱዋ ሺሽና፥ አ ዛይትያ ትገꬃ ኦይቃዱ። 6 ኦቱዋ ኡባይ ኩሜዳ ዎደ፥ ምሽራታ ባረ ናኣ፥ “አነ ታዉ ሀራ ኦቱዋ አካደ ያ” ያጋዱ።

ሽን ናአይ ዛሪደ፥ “ሀር እት ኦቱነ አትቤና” ያጌዳ። ሄዋፐ ጉይያን፥ ዛይቲ ጎግያዋ አግ ባሼዳ።

7 ምሽራታ ስማደ ባደ፥ ኤልሳኤዉ ኦዳዱ። እ፥ “ባደ ዛይትያ ዛልኣደ፥ ነ አጩዋ ጭጋ። አቴዳዋን ኔንነ ነ ናናይነ ጎኤቲደ ደአናዉ ዳንዳዪታ” ያጌዳ።

8 እት ጋላስ ኤልሳእ እት ዱረ ምሽራታ ደእያ ሹኔማ ጌተትያ ካታማ ቤዳ። ምሽራታ አ ሾባደ፥ ቁማ ምዛዱ። ሄ ጋላሳፐ ዶሚደ፥ እ ሄዋና አꬍያ ዎደ ኡባን፥ ቁማ ማናዉ እ ሶ ገሌ። 9 አ ባረ አስና፥ “ሀ ኡባ ዎደ ኑ ማታና አꬍያ ብታኒ ጾሳ አሳ ግድያዋ ታን ኤራይ። 10 ሄዋ ድራዉ፥ አነ እት ጉꬃ ክፍልያ ቦላ ፖቅያን አዉ ኬጾይተ፤ አ ግዱዋን ግሱዋ፥ አራታ፥ ጻራጴዛነ ጾምፕያ ዎꬆይተ። ሄዋፐ ጉይያን፥ እ ኑኮ ዬዳ ዎደ ኡባን፥ ሄዋን ገላና ዳንዳዬ” ያጋዱ።

11 እት ጋላስ ኤልሳእ ሹኔማ ካታማ ዪደ፥ ባረ ክፍልያ ፑደ ከሲደ፥ ያን ሸምፔዳ። 12 ሄዋፐ ጉይያን፥ ባረ ቆማ ግያዛ፥ “ባ፤ ሄ ምሽራቶ ጼሳ” ያጌዳ፤ ግያዝ ጼስና፥ አ ያደ ኤልሳአ ስንꬃን ኤቃዱ። 13 ኤልሳእ ግያዛ፥ “ሀ ምሽራቴ ‘ኔን ኑ ድራዉ፥ ሀዋ ኡባ መቶታዳ። ያትና ኑን ነዉ አይ ኦꬃነ? ነዉ ኑን ቢደ፥ ካትያ ዎይ ኦላ ጋዳዋ ሃሳይስያብ ደኢ?’ ያጋደ እዞ ኦቻ” ያጌዳ።

ምሽራታ፥ “ታን ሀዋን ታ አሳ ግዶን ደእሽን፥ ታና መትያባይ ባዋ” ያጋዱ።

14 ሄዋፐ ጉይያን፥ ኤልሳእ ግያዛ፥ “ያትና ኑን እዝዉ አይ ኦꬃኔ?” ያጊደ ኦቼዳ።

ግያዝ፥ “እዝዉ ናእ ባዋ፤ እ አስናይካ ጭሜዳ” ያጌዳ።

15 ኤልሳእ፥ “ምሽራቶ ቃይካ ጼሳ” ያጌዳ። እዞ ጼሴዳ፤ እዛ ያደ፥ ፐንግያን ኤቃዱ። 16 ኤልሳእ ምሽራቶ፥ “ላይꬅ ሀኖደ ኔን አቱማ ናኣ እድማና” ያጌዳ።

ምሽራታ፥ “ሀይ ታ ጎዳዉ፥ ኔን ጾሳ አሳ ግድኪ፥ ታዉ ዎርዶቶፓ!” ያጋዱ። [a]

17 ሽን ምሽራታ ሻሃራዱ፤ ኤልሳእ እዝዉ ኦዴዳዋዳን ላይꬃን ሄ ዎደ አቱማ ናኣ የላዱ።

18 ሄ ናአይ ድጬዳ፤ እት ጋላስ ካꬃ ጫክያ አሳቱዋና ደእያ ባረ አዉዋኮ ቤዳ። 19 ባረ አዎ፥ “ዎ ታ ሁጲያዉ! ዎ ታ ሁጲያዉ!” ያጌዳ።

አ አዉ እት ቆማዉ፥ “ቶካደ አ ዳይኮ አፋ” ያጊደ ኦዴዳ።

20 ቆማይ ናኣ አኪደ፥ አትኮ አፍና ጋላሳ ሴታይ ጋካናዉ ናአይ ባረ ዳይ ክዉዋን ኡቴዳ፤ ሄዋፐ ጉይያን፥ ናአይ ሀይቂ አጌዳ። 21 ምሽራታ ናኣ ፑደ አፋደ፥ ጾሳ አሳ አርሳን ግስሳዱ። ያታደ አ ቦላ እፍꬃ ጎርዳደ ባዱ።

22 ሄዋፐ ጉይያን፥ ባረ አስና ጼሳደ፥ “ታን ጾሳ አሳኮ ኤለካ ባደ ያና ማላ፥ ቆማቱዋፐ እቱዋነ ሀረቱዋፐ እቱዋነ ታዉ የዳ” ያጋዱ።

23 እ፥ “ሀቼ አግና ጼሩዋ ጋላሳ ዎይ ሳምባታ ግደናባ፥ አዬ ኔና አኮ አፍያዌ?” ያጌዳ።

አ፥ “አያይነ ባዋ” ያጋዱ። 24 ሄዋፐ ጉይያን፥ ሀርያ ኮራደ፥ ባረ ቆማዉ፥ “ሀርያ ላጋ! ታን ነዉ ኦዳና ጋካናዉ፥ ሎዳን ላጎፓ” ያጋዱ። 25 ምሽራታ ሄዋፐ ደንዳደ፥ ቃርመሎሳ ደርያን ደእያ ጾሳ አሳኮ ባዱ።

ኤልሳእ ምሽራታ ይያኖ ሃኩዋን በኢደ፥ ባረ ቆማ ግያዛዉ፥ “በአ፥ ሹኔማ ካታማን ደእያ ምሽራታ ያዉ። 26 ኦ ሞካናዉ ዎጻ ባደ፥ ‘ኔን ሳሬ? ነ አስናይ ሳሬ? ነ ናአይ ሳሬ?’ ያጋደ ኦቻ” ያጌዳ።

ምሽራታ፥ “ኑን ኡባይካ ሳራ” ያጋዱ።

27 ምሽራታ ደርያ ቦላን ደእያ መꬍና ጎዳ አሳኮ ጋኬዳ ዎደ፥ ሆካደ አ ገድያ ኦይቃዱ።

ግያዝ ምሽራቶ ድጋናዉ ሺቄዳ፤ ሽን ጾሳ ብታኒ አ፥ “አጋ! አ ዎልቃማ መቱዋን ደአዉ፤ ሽን መꬍና ጎዳይ ታፐ ሄዋ ገንꬄዳ። እ መቱዋ ታዉ ኦድቤና” ያጌዳ።

28 ሄዋፐ ጉይያን ምሽራታ፥ “ታ ጎዳዉ፥ ኔን ታዉ ናኣ እማናዳን ታን ኔና ኦቻድታ? ታን ኔና፥ ‘ታና ጮ መላ ቃቃዮፓ’ ያጋበይክታ?” ያጋዱ።

29 ኤልሳእ ግያዛ፥ “ነ አዱሳ ማዩዋ ነ ሳቂያን ስርቃ፤ ያታደ ታ ጋትማ አካደ ኤሌላ፥ ኦግያን ኦናናነ ጋከቶፐ፥ ሳሮቶፓ፤ ኦንነ ኔና ሳሮቶፐ፥ ዛራደ ሳሮቶፓ። ታ ጋትማ ናኣ ዴሙዋን ዎꬃ” ያጌዳ።

30 ሽን ናኣ ዳያ፥ “መꬍና ጎዳይ ኤሮ! ነ ሸምፑ ኤሮ! ታን ኔና የጋደ ቢከ” ያጋዱ። ኤልሳእ ደንዲደ፥ እዞ ካሌዳ። 31 ግያዝ ኡንቱቱፐ ስንꬃቲደ ቢደ ጋትማ ናኣ ዴሙዋን ዎꬄዳ፤ ሽን ኮሻይ ዎይ ሸምፑ ባዋ። ያትና ግያዝ ኤልሳኤና ጋከታናዉ ስም ዪደ፥ “ናአይ ቤጎትቤና” ያጊደ ኦዴዳ።

32 ኤልሳእ ሶ ገሊደ፥ ሄ ናኣ አሃይ አ አርሳን ግሴዳዋ በኤዳ። 33 ባረ ቦላነ ናኣ ቦላነ ካርያ ጎርዲደ፥ መꬍና ጎዳ ዎሴዳ። 34 ሄዋፐ ጉይያን፥ ናኣ አሃ ቦላ ከሲደ፥ ባረ ዶና አ ዶናን፥ ባረ አይፍያ አ አይፍያን፥ ባረ ኩሸቱዋካ አ ኩሸቱዋን ጋꬅ ዎꬂደ ግሴዳ። ናኣ ቦላይ ሆኤዳ። [b] 35 ኤልሳእ ደንዲደ፥ ሶ ግዶን ያነ ሃነ ስመረቴዳ። ላኤንꬁዋካ ስሚደ፥ ናኣ ቦላ ጮጎቲደ ግሴዳ። ያትና ናአይ ላፑ ገደ ሄꬍሼዳዋፐ ጉይያን ጼሌዳ።

36 ያትና ኤልሳእ ግያዛ ጼሲደ፥ “አነ ሀ ሹኔማቶ ጼሳ” ያጌዳ። ግያዝ እዞ ጼሴዳ። እዛ ዬዳ ዎደ፥ ኤልሳእ እዞ፥ “ነ ናኣ አካ” ያጌዳ። 37 ሄዋፐ ጉይያን፥ ምሽራታ ኤልሳአ ገድያን ኩንዳደ፥ ቢታን ጉፋናዱ። ያታደ ባረ ናኣ አካደ ካረ ከሳዱ።

38 ኤልሳእ ገልጋላ ስሚደ ዬዳ ዎደ፥ ቢታይ ኮሻት ኡቴዳ። ትምቢትያ ኦድያዋንቱ ጭታይ አ ስንꬃን ኡት ደእሽን፥ እ ባረ ቆማ፥ “ዎጋ ከርያ ታማን ዎꬃደ፥ ሀ አሳቶ ዎጽያ ካꬃ” ያጌዳ። 39 ኡንቱንቱፐ እቱ ሳንꬃ ማላትያ ቦንጨቱዋ ማጺደ አሀናዉ ጋደ ቤዳ። ዶልያ ጎስያ ቱራ ደሜዳ፤ ቶካናዉ ዳንዳይያዋ ኬሻ ዳሮ ጎስያ አኪደ ዬዳ። እ አየንቶ ኤረናን አንጬዳ፥ ከርያን የጌዳ። 40 አሳቱ ማና ማላ፥ ዎጽያ ትጌድኖ። ኡንቱንቱ ዎጽያ ቱሽ አ ም በኤዳ ዎደ፥ “ጾሳ አሶ፥ ሀ ከርያን ዎꬍያባይ ደኤ!” ያጊደ ዋሴድኖ። አሳቱ ማናዉ ዳንዳይበይክኖ።

41 ኤልሳእ፥ “ያቶፐ ታዉ ꬊልያ አኪደ ዪተ” ያጌዳ። ሄ ꬊልያ ከርያን ቆሊደ፥ “አሳይ ማናዳን ዎጽያ ትግተ” ያጌዳ። ሄዋፐ ስሚደ፥ ከርያን ኢታባይ ቤትቤና።

42 ኮይሮ ጋኬዳ ካꬃፐ ኡከቴዳ ላታሙ፥ ባንጋ ኮምፑዋ፥ ትሻ ካꬃና እትፐ ባረ ኦጎሩዋን የግ አኪደ፥ ጾሳ አሳዉ አህያ እት ብታኒ ባኣል-ሻሊሻ ግያ ሳኣፐ ዬዳ። ኤልሳእ ባረ ቆማ፥ “ማናዉ አሳዉ አꬃ” ያጌዳ።

43 አ ቆማይ፥ “ታን ጼቱ አሳ ስንꬃ ሀዋ ዋታ አꬆ?” ያጊደ ኦቼዳ።

ሽን ኤልሳእ፥ “ማናዉ አሳዉ አꬃ፤ አያዉ ጎፐ፥ መꬍና ጎዳይ ኡንቱንቱ ሚና ዶካይካ አታናዋ ያጌ” ያጌዳ። 44 ሄዋ ድራዉ፥ ቆማይ ኡንቱንቱ ስንꬃ አꬂና፥ ኡንቱንቱ ሜድኖ። መꬍና ጎዳይ ጌዳዋዳን፥ ዶካይ አቴዳ።

<- 2 ካታቱዋ 32 ካታቱዋ 5 ->