1 ይሁዳ ካቲ ዮሳፌጸ ካተቴዳ ታማነ ሆስፑንꬃ ላይꬃን አካባ ናአይ ዮራመ ሳማርያን እስራኤልያ ቦላ ካተቴዳ፤ እ ታማነ ላኡ ላይꬃ ካተቴዳ። 2 እ መꬍና ጎዳ ስንꬃን ኢታ ኦꬄዳ። ሽን ባረ አዉዋነ ባረ ዳይ ኤልዛቤል ኬሻ ኢታ ግደና፤ አያዉ ጎፐ፥ አ አዉ ኦꬄዳ ባኣላ ኤቃ እ ꬎቆሌዳ። 3 ግዶፐነ ናባጻ ናአይ እዮርባም እስራኤልያ አሳ ኦስሴዳ ናጋራ እ ካሌዳፐ አትና ꬋይስቤና።

4 ሞኣበ ቢታ ካቲ ሜሻእ ዶርሳ ሄሜ። እ እስራኤልያ ካትያዉ ጼቱ ሻአ ቦልትቦልታ ዶርሳቱዋነ ጼቱ ሻአ ኮልያ ዶርሳቱዋ እስክያ ላይꬃን ላይꬃን ጊሬ። 5 ሽን እስራኤልያ ካትያ አካብ ሀይቄዳዋፐ ጉይያን፥ ሞኣበ ካቲ ሜሻእ እስራኤልያ ቦላ ማካሌዳ።

6 ሄ ዎደ ካቲ ዮራመ ሳማርያፐ ከሲደ፥ እስራኤልያ ኡባ ሺሼዳ። 7 ቃይ ይሁዳ ካትያ ዮሳፌጻኮ ኪታ የዲደ፥ “ሞኣበ ካቲ ታ ቦላ ማካሌዳ፤ ሞኣበና ኦለታናዉ ኔን ታናና ባኒ?” ያጌዳ።

ዮሳፌጸ፥ “ኤ ታን ባና። ታን ነ ማላ፤ ታ አሳይካ ነ አሳ ማላ፤ ቃይ ታ ፓራቱካ ነ ፓራቱዋ ማላ” ያጊደ ዛሬዳ። 8 ዮሳፌጸ ቃይ፥ “ኑን ሀቃ ኦግያና ቢደ ኡንቱንታ ኦላኔ?” ያጊደ ኦቼዳ።

ካትያ ዮራመ፥ “ኤዶማ ዎራን ደእያ ኦግያና ቢደ ኦላና” ያጊደ ዛሬዳ።

9 ሄዋ ድራዉ፥ እስራኤልያ ካቲ፥ ይሁዳ ካቲነ ኤዶማ ካቲ ኦላዉ ከሴድኖ። ኡንቱንቱ ላፑን ጋላሳ ኦግያ ዩዬዳዋፐ ጉይያን፥ ኦላንቻቶካ ኡንቱንታ ካሌዳ መህያዉካ አይ ሃꬅነ ባዋ። 10 ሄ ዎደ እስራኤልያ ካቲ፥ “አየ አና! መꬍና ጎዳይ ኑና ሀ ሄዙ ካተቱዋ እትፐ ሞኣበ ካትያዉ አꬂደ እማናዉ ጼሴዳ” ያጌዳ። 11 ሽን ዮሳፌጸ፥ “ኑን አ ባጋና መꬍና ጎዳ ኦቻናዳን ሀዋን ትምቢትያ ኦድያዌ ባዌ?” ያጊደ ኦቼዳ።

እስራኤልያ ካትያ ኦላ ጋዳዋቱዋፐ እቱ፥ “ኤላሳ ማዲደ ደኤዳ ሻፋጻ ናአይ ኤልሳእ ሀዋን ደኤ” ያጊደ ዛሬዳ።

12 ዮሳፌጸ፥ “ኤ፥ እ ቱሙ ትምቢትያ ኦድያዋ” ያጌዳ። ሄዋፐ ጉይያን፥ እስራኤልያ ካቲ፥ ዮሳፌጽነ ኤዶማ ካቲነ ኤልሳአኮ ዱገ ዎꬌድኖ።

13 ኤልሳእ እስራኤልያ ካትያ፥ “ታናናነ ኔናና አዬ ጋꬅያዌ? ባ፤ ባደ ነ አዉነ ነ ዳያነ ኦቼዳ ትምቢትያ ኦድያዋንታ ኦቻ” ያጌዳ።

እስራኤልያ ካቲ ዛሪደ፥ “ቱይት፥ አያዉ ጎፐ፥ ሀ ሄዙ ካተቱዋካ እትፐ ሞኣበ ካትያዉ አꬂደ እማናዉ ኑና ጼሴዳዌ መꬍና ጎዳቴ!” ያጌዳ።

14 ኤልሳእ፥ “ታን አዉ ኦꬅያ ኡባፐ ዎልቃማ መꬍና ጎዳይ ኤሮ! ይሁዳ ካትያ ዮሳፌጻ ድራይ ባይናዋ ግድንቶ፥ ታን ኔና አይፍያንነ ጼልከነ በእከ ሽን። 15 አነ ታዉ ሀእ ዲꬃ ዲጽያዋ አህተ” ያጌዳ።

ዲጽያዌ ዲጽሽን፥ መꬍና ጎዳ ዎልቃይ አ ቦላ ዎꬌዳ። 16 ኤልሳእ፥ “መꬍና ጎዳይ፥ ‘ሀ መላ ዛንጋራ ኡባን ኦላ ቦክተ’ ያጌ። 17 አያዉ ጎፐ፥ መꬍና ጎዳይ፥ ጫርኩዋ ዎይ እራ በእክታ፤ ሽን ሀ ቦኬዳ ዛንጋራን ሃꬃይ ኩማና፤ ህንተንቱ፥ ህንተንቱ ሚዛይነ ህንተንቱ ሀራ መሂ ኡሻና ያጌ። 18 ሀዌ መꬍና ጎዳ ስንꬃን ላፋባ፤ ቃይ መꬍና ጎዳይ ሞኣባካ ህንተንቶ አꬂደ እማና። 19 ግምበቴዳ ካታማቱዋነ ዎልቃማ ካታማቱዋ ኡባ ህንተንቱ ጾናና። ሎኦ ምꬃቱዋ ኡባካ ቃንጻና፤ ሃꬃ ፑልቶቱዋ ኡባቱዋካ ህንተንቱ ባራና፤ አራዳ ሾይቃቱዋ ኡባ ቦላን ሹቻ ላሊደ ባይዛና” ያጌዳ።

20 ዎንተꬃ ጋላስ ዎንታ ያርሹዋ ያርሽያ ዎዲ ጋክና፥ ኤዶማ ባጋና ሃꬃይ ጎጌዳ፤ ሃꬃይ ቢታን ኤሌዳ።

21 ሞኣበ ቢታ አሳይ ሄዙ ካተቱ ኡንቱንታ ኦላናዉ ዬዳዋ ስሴዳ። ናናይ፥ ጭማይ ኦላ ሚሻ ቶካናዉ ዳንዳይያ አሳይ ኡባይ ጼሰት ዪደ፥ ባረንቱ ቢታ ዛዋ ናጌድኖ። 22 ኡንቱንቱ ዎንታ ጉራና ደንድያ ዎደ፥ ሃꬃ ቦላ ዎꬌዳ ጻልቂ ዞኢደ፥ ኡንቱንቶ ሱꬃ ማላቲደ ቤቴዳ። 23 ያትና ኡንቱንቱ፥ “በእተ፥ ሀዌ ሱꬃ! ካተቱ ባረንቱ ግዶን እቱ እቱዋና ኦለቲደ፥ ሀይቂ ዉሬድኖ። ሞኣበ አሳዉ፥ አነ ቢደ፥ ኡንቱንታ አቁዋ ቆጭሬቶ” ያጌድኖ።

24 ሞኣበ ቢታ አሳይ እስራኤላቱ አቁዋ ቤዳ፤ እስራኤላቱ ደንዲደ፥ ኡንቱንታ ሾጬድኖ። ኡንቱንቱ ጋድያ ቦላን ማዬድኖ፤ ሞኣበ አሳ ዎꬌድኖ። 25 ካታማቱዋካ ኦለቲደ ባይዜድኖ። አሳይ ኡባይ ሁጲያን ሁጲያን እት እት ሹቻ አኪደ፥ አራዳ ሾይቃቱ ኡባቱ ካመታና ጋካናዉ፥ ኡንቱንቱ ቦላ ኦሌዳ። ፑልቶ ኡባ ባሪደ፥ ሎኦ ምꬃ ኡባካ ቃንጼድኖ። ቂርሄሬሳ ጌተትያ እት ካታማ ግምበ ጻላላይ ኤቁዋን አቴዳ፤ ሽን ያምባርሻን ኦልያ አሳቱ ሄ ካታማካ ዶዲደ ሾጬድኖ።

26 ሞኣበ ካቲ ኦላይ ባረ ቦላ ጎቤዳዋ በኤዳ ዎደ፥ ማሻ ዳንጪደ ላፑን ጼቱ አሳቱዋ አኬዳ። ኦላ ግዱዋን ዳኪደ፥ ኤዶማ ካትያኮ ፕናናዉ ደንዴዳ፤ ሽን አዉ ሀነናን እጼዳ። 27 ሄዋፐ ጉይያን፥ ባረ ሳኣን ካተታናዉ ደእያ ባረ ባይራ ናኣ አኪደ፥ ካታማ ግምቢያ ቦላን ታማን ጹጊደ ያርሼዳ። ሞኣባቱ እስራኤላቱ ቦላ ሀንቁዋ ሱሌድኖ። ያትና እስራኤላቱ ሄ ካታማ አጊደ፥ ባረንቱ ጋድያ ስሜድኖ።

<- 2 ካታቱዋ 22 ካታቱዋ 4 ->