Marcos 12

Takau pegkegchau aidau pachisa tibau

(Mt. 21.33-46; Lc. 20.9-18)

1 Jesús ataktú augmatbaun pachis aents aidaun jintintak, tau: “Aents niina ajajin uvan aajakui, dutika tanishig, uva yumiji ijugtinnash umik, wajasá diistinnash torre ajiauwai. Dutika ujumak takau aidaun: Atum takastajum nuniakjum minash sujustajum tusa susa ukuak tikich nugkanum weuwai. 2 Nunik uva juut jegamtai, makichik inaken awemauwai takau batsatbaunum, nui jegamtai uva neje jukbaun niinun susatnume dutikam itagtuati tusa, 3 nui jegamtai uva neje jukbaun niinun susatnume dutikam itagtuati tusa, nunik jegattaman takau aina nu suwimawag sutsuk wainak awagkiajui. 4 Dutikawagmatai ataktú tikich inaken awemauwai, tujash nunak kayai buuknum tukuag upukajui, dutikawag pegkegchaun chichagkag awagkiajui.

5 “Dutikawagmatai tikichin awemauwai, nunashkam maawajui. Dutikamtai tikichin kuashat ishiakui; dutikamun ujumak suwimainak, tikichnak maawajui.

6 “Inagnamun niina uchijí makichkiuch aneetaiji ajamun dita batsatbaunum awemauwai: ‘Mina uchignak ajantusampap diimain ainawa’ tusa anentaimas. 7 Tujash takau aidauk ditak pempeentunisajag: ‘Auwai ju aja juna jukitnuk, maami, dutika juka iinu emami’, tuidau. 8 Tusag achikaju, dutika maawag uva ajakbauwa nuna ukumtikiag iyashinak ajapawajui.

9 “¿Nunash uva ajagtina dusha utugmainaita? Dekas ajagtina nu tajakug nunú ajanum takaina nunak kajeg idaiyak, ajanak tikichin sumainai.

10 “¿Atumek Agagbauwa duka ausachuk ainajum:

“ ‘Kayá ekenag jegamin aidau, kaya pegkegchauwai tusag dakitjajua nunú, yamai dekas jegá ichichkatin kaya apujtutia iman wajasé;

11 Nunak Apu Apajuí dutikau asamtai jutii diismak anentai ejetumaitsui’ tawa duka?”

12 Tutai achiktag tuidau, wagki augmatus tawa nunak, ditan pachis tawa nuna dekaidau asag, tujash aents tuwakajua nuna ishamaidau asag, ukuinak weajui.

Kuichik akikmamu pachisa Jesús iniasbau

(Mt. 22.15-22; Lc. 20.20-26)

13 Nunikag ujumak fariseo aina nuiyan, Herodesan aentsji aidaujai awemajui, Jesusan iniastinme dutikam wajintig, nunikmatai tsanumjugmi tusag. 14 Dutikawajam ditashkam Jesusan jegaantag:

—Maestroh, dekainaji, amek dekaskea nu tame duka, nunin asam aents tuina dukesh uyumatsme, wagki dita shiig awajkatasam tachau asam, Apajuí jinti dekaskea duke pachisam jintinkagtau asam. ¿Amesh wajinpa, Cesarash sumainashit, atsa sumainchaukaih? tusag inidau.

15 Tama Jesús dita tsanubaujin dekaju asa:

—¿Wagka pegkegchau anentaiyai dekapjustasagmesh wakegagme? ¡Makichik kuichik itagtuakjua diistajai!, tau.

16 Tutai ditashkam ejentuntaju, dutikam:

—¿Yana niimempaita jusha, tuja yana daajiyaita ju agagbauwa jusha?, tau.

Tutai dita aiinak:

—Cesardauwai, tiaju.

17 Tiagtai Jesús ayaak:

—Cesardauwa duka Cesarak susatajum, Apajuinua duka Apajuí susatajum, tiuwai.

Nuna timatai anentai jegagchajui.

Jakau nantagtin pachisa iniimsamu

(Mt. 22.23-33; Lc. 20.27-40)

18 Nuniku ai saduceo aidaushkam Jesusan tajuntajui, jakauk nantakchagtin ainawai tinu aina nunú, nunikag iniinak:

19 —Maestroh, Moisés agag ukugtamkiuwa nuig, makichik aents nuwentin uchi akiitsuk jakamtaig, yachi nuwan juki uchin akig yachí uchijiya nunin emamainai tawai. 20 Nuniamunum siete yachigbau aajakui. Nuanuiya nagkamchak iwai nuwenauwai, tujash uchin akiitsuk jakauwai. 21 Nunikmatai tikich yachi jukiuwai. Nunik niishkam uchinak akiitsuk jakauwai. Kampatuma nu jukishkam nunisag jakauwai. 22 Nuni nuninakua siete aajakajua duka uchinak akiitsuk ashí jinawajui. Nunikaju ai dui pujus nuwashkam jakauwai. 23 Dusha atak nantamu atina dui nantainakush, ¿siete aajakajua nu nunak nuwatkajua duish, yana nuweg atinaita?, tuidau.

24 Tiagtai Jesús ayaak:

—Atumek Agagbau aina nu nuigtú Apajuí senchijiya dushakam dekachu asajum dewakugme. 25 Atak nantamu atina duik nuwenbauk atsutnai, ángel nayaimpinum batsata nuninuk agtinai. 26 Tujash jakau nantajagtinun pachis tawa duka, ¿atumek ausachuk ainajum Moisés papí agagbauwa nui Apajuí zarza kegamunum chichaak: “Witjai Abraham, Isaac, Jacob aina nuna Apajuijinuk” tawa duka? 27 ¡Apajuik jakau aidaun Apajuijinchui, iwaaku aina nuna Apajuijiyai! Nunin aig atumek shiig kuashat dewagme, tiuwai.

Chicham umiktin dekas imana nu

(Mt. 22.34-40)

28 Jesús shiig aimkamun maestro chicham umiktinun jintinkagtin aina nuiya antuku asa, jegantun iniak:

—¿Tuwaita ashí chicham umiktin aina nuiya dekatkau umimaina dusha?, tau.

29 Tutai Jesús ayaak:

—Ashí chicham umiktajum tibauwa nuiya dekatkau umimainuk juuwai: “Antuktajum Israel aidauwah, Apu iina Apajuijiya duka, Apuk makichkiuchi. 30 Amina Apujum Apajuiya nu, ashí anentaimjai, ashí amina wakanmijai, ashí amina anentaimtagmijai, ashí amina senchigmijai aneeta, tawai. 31 Tuja tikichia duka jujai betekmamtinai, duka: Tikich aidaush amek anenmamsam aneeta”, tawai. Tikich chicham umiktin juna nagkaesauk atsawai, tau.

32 Tutai maestro chicham umiktinun jintinkagtinchakam:

—Maestroh duka dekas tame, imá makichik Apajuik awai, tikichik atsawai; 33 tuja ashí anentaijai, ashí anentaimtajai, ashí senchijai nuigtú tikich iik anenmamsa aneamua nuuwai kuntin maa apeaku Apajuí ememattaiya nuna nagkaesauk, tiuwai.

34 Shiig anentaimas timatai, Jesús wainak:

—Apajuí inama nuig atushat atsume, tiuwai.

Nui nagkamsag makichik aentskesh inimainchau dekapjajui.

Cristush yana uchijigkita tibau

(Mt. 22.41-46; Lc. 20.41-44)

35 Jesús jega Apajuí ememattainum jintinkagtak:

—¿Wajuk asamtaiya maestro chicham umiktinun jintinkagtin aidaush, Cristuk Davita uchijiyai tuinawa? 36 David Wakaní Pegkejiya nu ichachiam:

“Apu mina Apujun chichajak:

Ekeemsata mina untsujui,

nunikamin wi amina shiwajum aidaunak ashí idaitustajame”, tiuwai.

37 David mina Apug tawa nuniaish, ¿wajuk asaya Davita uchijish amainaita? tau.

Tutai nui aents tuwakú aidauk shiig aneasag antujuidau.

Maestro chicham umiktinun jintinkagtin aidau pegkegchaujin pachisa Jesús tibau

(Mt. 23.1-36; Lc. 11.37-54; 20.45-47)

38 Jesús jintinkagtak: “Maestro chicham umiktinun jintinkagtin aina nujaig kuitamamkatajum, ditak nugkutai esagman nugkujag yujainak, plazanum igkuntuinakush eme anenjus kumpamjitnume tusag wakejin ainawai, 39 nuninak jega ijuntainum nuniachkush yuamunum wainakush aents eme anentsá ekeemsati tibaunum ekeemsagtatus wakejin ainawai, 40 nuninak nuwa waje aina nuna jee aidaun atankiag tsanumainak dukap Apajuí aujú yujau ainawai. Nunú aidau imá senchi bakumatin ainawai”.

Nuwa waje ujunauch ofrenda egkeamu

(Lc. 21.1-4)

41 Jesús ofrenda egketainum igkuas, aents aidau kuichkin egkeagtai diyak eketu; tuja kuashat wiyakuch aidaushkam kuichkin kuashat chimpidau. 42 Nuniai nuwa waje ujunauch taa, niishkam jimagchik kuichik cobre najanamu, akiktanash imanis akikchaun egkeauwai. 43 Nunikmatai jintintaiji aidaun untsuká ikaunman chichajak:

—Dekas tajime, ju waje ujunauchia ju ashí kuichkin egkeena nuna nagkaesau imá kuashat egkeae, 44 wagki ashí tikich egkeawaja duka ampinun egkeawaje, tujash juka ujunauchitak ni sumaka yumainjiya nunak ashí egkeae, tiuwai.

<- Marcos 11 Marcos 13 ->