Marcos 11

Jesús Jerusalén wayamu

(Mt. 21.1-11; Lc. 19.28-40; Jn. 12.12-19)

1 Jerusalén tikiju awajus weenak, jegawajui Betfagé nuigtú Betania Olivosan mujajin diiká awa nui, nunik Jesús ni jintintaijin jimajan awemauwai, 2 nunik chichajak:

—Wetajum au yaakat yaijuch awa awi, nuwi waikmajum wainkattagme burro tsakat jigkam wajau, makichik aentskesh entsamchatai, nu atiajum itaatajum. 3 Nu dutikagmin makichik aentskesh: ¿Wagka aikagme? tusa inimpainakuig, Apu atsumawai, wamak awagkittawai tusajum ukuktajum, tiuwai.

4 Tiajam wegag, burrok yaakta waitijin agaan jigkam wajattaman wainkajui, nunikag atiawajui.

5 Dutikiagtai ujumak aents nui ijunaidau:

—¿Wagka burrosh atiagme? tusag inidau.

6 Tiagtai ditashkam Jesús titá tibaunak dutiksag tiajui, tutai jukiti tusag idaisajui. 7 Dutikawag burron jukiag Jesusan ejetuawag, burro tuntupen jaanchji aidaun aitkajui, dutikawagmatai niishkam ekebiuwai. 8 Kuashat aents jaanchji aidaun ainag emainai tikich aidauk ajanmayan dukan tsupijag ainag emaidaush aidau. 9 Imatikainak aents eemak weedau, ukunum minidaushkam untsumkag:

—¡Emematiagmi! ¡Apu Apajuí awemam miná duka pegkegmai! 10 ¡Pegkejai iina apají David inamajakua nui inamjatatus mina nu! ¡Nigki nayaimpinmash ememattai atí! wajaidau.

11 Nunik Jesús Jerusalén wayá, jega Apajuí ememattainum weuwai. Nunik ashí wají nui atatman diis ukuak, etsa akaegu asamtai jintintaiji doce aina nujai Betania weuwai.

Higuera nejechu Jesús yumigja maamu

(Mt. 21.18-22)

12 Kashinia dui betanianmaya jiinki wegamunum Jesús yapajuau, 13 nunikmá ikaag wainkau higuera duken, nunik neje atsuash tusa diistatus wejiu; tujash jegantá diikmá nejeg atsau ayatak dukeg au, higo[a] nejetchau asamtai. 14 Jesús higueran chichajak:

—¡Ame nejekbaunak makichik aentskesh tuke yuwachagtin ainawai!, titatman ni jintintaiji aidau antugkajui.

Jega Apajuí ememattainum aents batsatun Jesús jiigbau

(Mt. 21.12-17; Lc. 19.45-48; Jn. 2.13-22)

15 Jerusalén jegawag jega Apajuí ememattainum Jesús wayá, nui sujak batsatun sumau aidaujai agaa jiijú, dutikak aents kuichki yapajiin aidau mesajinashkam shitatki akaketuk, paumá sujin aidau ekeemtaiji aidaunash dutiksag akaketkau, 16 dutika jega Apajuí ememattaiya nui makichik wajinakesh takusá wayawainum tusa dakitau. 17 Nunik jintinkagtak:

—Apajuí chichame agagbaunum:

“Mina jegajuk ashí tikich nugkanmaya aidau Apajuí aujuinaku ijuntai tutai atinai” tawa nuniaig atum kasa aidau batsamtai emaugme, tiu.

18 Nuna timatai sacerdote apuji, maestro chicham umiktinun jintinkagtin aidaujai antukag, wajuk maumainaita tusag egatuidau; wagki ni jintinkagtamun ashí aents puyatjus antujuidau asamtai nuna ishamainak. 19 Tujash kiitai, Jesusak jintintaiji aidaujai yaaktanmaya jiinjajui.

Higuera yumigjamua nu kukajú wainkamu

(Mt. 21.20-22)

20 Shiig kashikmas ai nagkaemakmag, higuera ashí kagkapejai kukag wajattaman wainkaju. 21 Nunik Pedro adeag Jesusan chichajak:

—Maestroh, diisia ame higuera yumigjam ukukmaum nu kukajá wajana, tau.

22 Tutai Jesús ayaak:

—Imá Apajuiyaig dekaskeapi titajum. 23 Wagki dekaskenum tajime, makichkitigmekesh ju muja chichagkujum: ¡Jui atsuk nayants wajaata! tusam anentaiminish utujimtsuk dekas wi taja duka nuniktatuapi tamak, nunisag uminkattawai. 24 Nuadui tajime, Atum Apajuí aujku segakjumek, dekas jukittajapi titajum, nuniakjumek jukittagme. 25 Atum Apajuí aujkugmek, tikichjai kajegdaikamu ajutjamkuig tsagkujatajum, atumnashkam Apajuí nayaimpinum puja dushakam aikasag tsagkugtamjatnume atum pegkegchau chichakbaugminash. 26 Wagki atum tsagkugkagtushtaik, atumin Apa nayaimpinum puja dushakam, atum pegkegchau chichakbaugminash tsagkugtamjashtatjume.

Sacerdote apuji aidau Jesusan iniasagbau

(Mt. 21.23-27; Lc. 20.1-8)

27 Ataktú wakitkiag Jerusalén jegawajui. Nunik jega Apajuí ememattainum Jesús wekaetatman sacerdote apuji, maestro chicham umiktinun jintinkagtin aidau nuigtú tikich apu aidaujai jegaantag, 28 iniinak:

—¿Aminash ya jintinkagtuata tusash awetamae? ¿Ya ju aikata tusash tujamae?, tuidau.

29 Tuinam Jesús ayaak:

—Wishakam iniastajime, atum nu aigkagmin ujaktajime ya jutikata tujutmataiya jutikaja junash. 30 ¿Juagnash ya yamijatjata tiuwaita, Apajuik awemauwait atsa aents aidauk awemauwait? Nunú aigkatajum, tau.

31 Tama utujimkag, ditak pempeentunikiag chichainak: “Juagnak Apajuí awemauwai tajinish, ‘¿tujash wagka dekaskeapi tichau ainagme’ tujamtata jama? 32 ¿Wajintajiki, aents aidau awemauwai titajiash?” Tuinayatak aents aidaun ishamaidau Juagkak dekaskenum profetayai tuidau asagmatai. 33 Nuninak Jesusan chichajuinak:

—Dekatsji, tuidau.

Tiagtai Jesús ayaak:

—Wisha tichattajime yana chichamenia jutikaja nunak, tiuwai.

<- Marcos 10 Marcos 12 ->