LUKA 13

A ngepachinah maw lydenah

1 Ma ningcai taco ma letei a ungpaw cawngsaw thaikheh taco Zisu hai letah raang uhbui Pilat tei Galili cawngsaw thuihlainah aa tua leimei ning tah a thaw sahpaw he kong khah aa ching. 2 Zisu tah, “Ma hratei thihnah a ingpaw Galili cawngsaw sahlo he khah ahringpaw Galili cawngsaw sahlo navy tah aa sua vy rawng tah a cang tatah maw naa rawh? 3 Cang be tah ka ca ching he! Naaning zong na ngepachih ly caco he ceh na lyde hra he ceh. 4 A cang ly leh Siloam ing a sangpaw a cing ning tah a naiseh pawhe cawngsaw pahrawhluireh khah Jerusalem khuapui chung letei a ungpaw a hringpaw cawngsaw sahlo navy tah aa sua vy cawtah a cang naa tah maw? 5 Cang be tah ka ca ching he! Naaning zong na ngepachih ly caco he ceh na lyde hra he ceh,” a tah he.

6 Taico Zisu tah ma tawchingnah bia heh ching he ka, “Cawngsawpaw tah a buichung letah thuiku kung kung kheh cing ka, a thui maw thui ly tatah a va ming tihtah zehmai hmuh be. 7 Macawtaco buichung a mingkaipaw hai letah, ‘Ma thuiku kung heh a thui maw, thui ly tatah kung thung chung mingkai neh ka, zehmai hmuh bei neh. Hyhly! Cholui chang a pahry,’ tatah a tah.

8 Buichung a mingkaipaw taco, ‘Abuipaw, ato kung kung kheh chung tei heh cawh ming cawng tua, a kaekang heh thlo pá neh ka, alui achawpaw ka bia a. 9 Hangkung lang a thui caco chah thlang ka, ma hratah cang ly tei a thui ly caco, hyhly thlang lepui ceh,’ a tah,” tatah a tah.

Kai king no Sabat ning tah a dangsah

10 Sabat ning tah Zisu tah synagog sangkheh letah a cawngpah leimeining he takhei, 11 kung hrawhluireh chung khachia tah a tlepaw canuno a za ung. A kai a king thlu thah ka, a pathlang khy bingbi lytah a ung myca. 12 Zisu tah ma no cawh a hmuh tihtah a hmelang va chuh law tatah y ka, “Cawngsawno, nama cawh na ciacung lynah taco a ca thlaw myca,” a tah. 13 Taico a cung letah a kih pahnia ka, sungkheh teitah canuno cawh a ka pathlang khy ka, Khazing khah a reithai.

14 Sabat ning tah Zisu tah cawngsaw a dangsah cawtah synagog a uhtu cawh a thingae ka, zawpuipaw khah, “Raihrenah ning ningruh a ung, Sabat ning rei lytah ma ningruh chung leco a vong tah na dangsah bei he ceh,” tatah a tah he.

15 Abuipaw tah a hai letah, “Naaning cungmai raipha sahlo! Ahotahmai Sabat ning tah a co cang seh, a la cang seh, naa ing taitah thlaw he ceh ka, tui ding sá pawtah seikhui thlang bei he ceh maw? 16 A cang caco Abraham pathlah a cangpaw, Setan tei kung hrawhluireh chung hrai katei a sahpaw heh Sabat ning zong tah dangsah pápaw cang bei maw?” a tah he.

17 Ma hratei bia a palei tih he taco Ama a caraepaw vytei khah aaning a zeh. Canghrasala zawpuipaw taco a tuapaw hming ningang chuipaw vytei cawtah khei aa thaw a chah ngetei.

Aihrang ci le raangri tawchingnah bia

(Mt 13:31-33; Mk 4:30-32)

18 Zisu tah, “Khazing painah raang cawh zekhatamaw a lo? Zekhatamaw kaa tawching a? 19 Cawngsawpaw pakheh tah a ly chung letah a lingpaw aihrang ci khatah a lo. Aihrang ci cawh ka chang ka, thingkung tah a ka tua ka, pavaw sahlo tah a cai sahlo letah a cawng tei he,” a tah.

20 Taico Zisu tah a tah vypaw cawh, “Khazing painah raang cawh zekhatamaw kaa tawching a? 21 Canuno tah vedi hongkheh lekhei raangri pahlawh ka, a nong chi. Ma raangri taco vedi cawh a tho sahpaw hratah a cang,” a tah.

Ingkaw a bawpaw

(Mt 7:13-14, 21-23)

22 Taico Zisu cawh Jerusalem lang a seinah langpui letah khuapui zong khuatei zong pae pai lai ka, a cawngpah lai he. 23 Cawngsaw thaikheh tah, “Abuipaw, meh cawngtei long maw pachah a cang he a?” tatah aa hae.

24 Zisu taco, ma hrahei a tah he, “Ingkaw a bawpaw lang tah a nae pawtah thaw tah a zong my lo, zecawtamaw tatah ka ca ching he, cawngsaw a hlupui tah a nae zaa he ka, a nae khy bei he. 25 Ing hnuitu khah tho ka, a ingkaw khah a kha tae a. Taico naaning cawh ingkaw khungthing lang tah ingkaw khah khong he ceh ka, ‘Abuipaw ingkaw ma hong ky law,’ tatah naa ta a.

Canghrasala ama taco, ‘Ze taitah maw naa va chua? Naaning cawh ca hnih bei he neh,’ tatah a ca tah tae he a.

26 Mataico naaning tah, ‘Nama khatah kaa e hrui, kaa ding hrui tei kha, kaa khuatlang letah na ma cawngpah tei kha saw,’ naa tah a.

27 Canghrasala ama taco, ‘Naaning zong ca hnih bei he neh, zelang tamaw naa va chua tahpaw hnih bei neh. Naaning hming chahly a tuapaw vytei ka kae taitah seihly o!’ a ca tah tae he a.

28 Naaning vytei cawh alailang letah vathlang cang he ceh ka, Abraham le Isak le Jakob le Khazing khuavang vytei cawh Khazing painah raang chung lekhei naa hmuh tae he a. Ma tih taco cá he ceh ka, naa haw naa ria tae a. 29 Cawngsaw cawh nichua, nitlah, thuilang, tlanglang tah a vong a he ka, Khazing painah raang lawhdangnah hming lekhei a ty he a. 30 Ma tih taco ato letei a hningcaipaw zong heh a hme a sahpaw cang he ka, ato letei a hme a sahpaw zong heh a hningcaipaw a cang tae he a,” tatah a tah.

Jerusalem cawtah Zisu a nge a chia

(Mt 23:37-39)

31 Ma ning taco Farasi thaikhehpaw tah Zisu kha a vong he ka a hai letah, “Ma hminghmaw taihei piathlah la, hmingkheh kheh lang sei. Herod tah thaw a ca du,” tatah aa ching.

32 Zisu tah, “Va sei la, ma sihatei khah va ching o, ‘Atoning zong, ningthlamong zong, khachia sahlo tingchua he neh ka, a dang lypaw ka dang sá he a. A ningthung ning tah ka rai cawh ka paling a.’ 33 Zekhatah a cang zong tah atoning, ningthlaw le hazaining tai cawh ka sei longmang thlang a. Zecawtamaw tatah Khazing khuavang cawh Jerusalem khuapui khungthing lang letah thih phung cang be!

34 Vy Jerusalem! Jerusalem! Khazing khuavang sahlo khah za theh he ceh ka, Khazing tah naaning khatah a tawpaw he a cawngsaw sahlo khah alung tah naa vaseh tei he. Aa puino tah a sawtei leh a mathlaw rai letah a bakhupaw he hratah naa cawngsaw cawh uikhazeh uilui maw pakhawng du he neh ka, canghrasala du bei he ceh! 35 Mingtua hmai o, naa ing cawh a ching myca. Ka ca ching he, ‘Abuipaw ming tah a vongpaw cawh bonghnang song cang ky seh,’✡Hlaw 118:26 tatah naa tah hlai vytei cawh pa hmuh kaw khaw bei ceh,” tatah a tah.

<- LUKA 12 LUKA 14 ->