1 Nak X̱anžo Dios Benne' Wnná Bia' Ẕen,

na' žẕízegak yógo'te benne' ka' ni'a chie' Ḻe'.

Ži'e latje blo chie' dan' zoan ḻáwlegak kerubín ka', na' žẕo' yežlyó nga.

2 Ẕente nak X̱anžon' ḻaw Ya'a Sión.

Nake' ẕen ḻáwlegak yógo'te yež ka'.

3 Le wká'n ẕen La la'y che X̱anžon' da' naken ẕen,

na' da' žaḻa' žébežo.

4 Le', Benne' Wnná Bia' Ẕente, nži'ilo' da' nak chawe'.

Bzoa chocho' da' naken dot da' li.

Beno' da' naken chawe', na' da' naken dot da' li ni'a chegak ẕa'só Jakob ka'.

5 ¡Le wká'n ẕen X̱anžo Dios!

6 Moisés, na' Aarón gókgake' bx̱oz chie' ka'.

Samwel goke' to benne' bcháḻjḻene' Ḻe'.

Wnnábgekle' X̱anžo Dios to, na' Ḻe' bechebe'.

7 Bcháḻjḻene' benne' ka' to ḻo bejw gasj.

Béngake' da' wnnakze' Ḻe', na' da' bchi'le' ḻégake'.

8 Le', X̱anto' Dios, bechebo' chegak benne' ka'.

Bḻoe'elo' ḻégake' nako' Dios, na' ženít ḻawo'o Le' chegak benne' ka',

ḻa'kze žono' ga ẕzáka'gake' ni'a che doḻa' da' nbága'gake'.

9 ¡Le wká'n ẕen X̱anžo Dios!