79
1 X̱anto' Dios, yo'ogak benne' zi'to' ka' ḻo yežlyó chegak benne' chio' ka'.
Bcá'ngake' ca'ze yodo' la'y chio'.
Bchínnjgake' yež Jerusalén.
2 Bká'ngake' beḻa' žen gat chegak benne' wen žin chio' ka' gan bdawgak lab ka' ḻégake'.
Bdawgak bia yix̱e' ka' benne' chio' ka'.
3 Bláljgake' žen chegak benne' ka' ka nis ḻo nez ka' che yež Jerusalén,
na' bi wzóa no benne' wkache'e ḻégake'.
4 Benne' yež gawze ka' ẕchíx̱gake' neto'.
Yógo'te benne' ka' žon dítjgekle' neto', na' ẕká'ngake' neto' ka'ze.
5 ¿To chi'ize gak ki cheto', X̱anto' Dios?
¿To chi'ize ẕžo'o neto'?
¿To chi'ize gak yeḻa' ẕža'a chio' ka to yi'?
6 Bža'agak benne' yež ka', benne' bi zej nónbi'e Le',
na' benne' zi'to' ka', benne' bi žḻížgake' Le'.
7 Bžia yí'gake' ẕa'só Jakob ka',
na' bchínnjgake' lížgake'.
8 Bi yesbago'o neto' da' ẕia da' wbága'gak x̱a x̱na' gole cheto' ka'.
Da ka' gaze yeyache' ḻáže'lo' neto', dan' bedó ḻáže'to'.
9 Gokḻen neto', Dios, Benne' Weslá cheto', nich ga'n ẕen La la'y chio'.
Beslá neto', na' bsoḻe doḻa' cheto' nich ga'n ẕen La la'y chio',
10 dan' nnagak benne' ka':
“¿Ganẕkze Dios chegak benne' ka'?”
Bezí' wzón benne' ka' bétgake' benne' wen žin chio' ka'.
11 Ben ki nich yógo'te benne' chio' ka',
benne' ka' zej yoe'e ḻo na'gak benne' ka' bi ẕḻé'egekle' neto' chawe',
ḻé'egekle' da' gono'.
Ḻen yeḻa' wak ẕen chio' beslá benne' ka' nžog chégake' gátgake'.
12 Bneẕjw chegak benne' yež gawze ka' yegaže kwe' da' ẕinnj ka da' béngake',
dan' ben dítjgekle' Le', X̱anto' Dios.
13 Neto', benne' chio' ka', na' ẕila' chio' ka',
we ḻawto' Le' to chi'ize.