1 Za'a ḻawo' Le', X̱ana' Dios, nich gape chi'o neda'.

Ben ga biž yedoe'ela'.

2 Gokḻen neda', na' beslá neda' dan' nako' chawe'.

Bze nag chi'a, na' beslá neda'.

3 Nako' ka to yej x̱e gan soa' chawe',

na' wak yida' gan zo' Le' dot ža, na' yele.

Bseḻa' no benne' yeslé' neda',

dan' nako' Le' ka to yej x̱e gan zoa' choch.

4 X̱ana' Dios, beslá neda' ḻo na'gak benne' ka' bebéj yíchjgake' Le',

na' ḻo na'gak benne' ka' žóngake' da' ẕinnj, na' zej nake' yichj ža'a.

5 Žx̱en ḻaža'a Le', X̱ana' Dios.

Le' ẕwíakzo' neda' kate' ne naktia' bí'do'te.

6 Le' ba nox̱kzo' neda' katen' za' golja'.

Le' beno' ga bžoja' ḻo ḻe'e x̱na'a.

Wká'n ẕénteza' Le'.

7 Bebángekle benne' zanḻe'e kan gok chia',

san Le' ẕwíakzo' binlo neda'.

8 Ben ga góḻteza' da' we ḻawa' Le',

na' wká'n ẕena' Le' dot ža.

9 Bi wzó' neda' cheḻa'ale kate' ba ngola'.

Kate' yedó ḻaža'a, bi kwej yichjo' neda'.

10 Benne' ka' ẕžá'agake' neda' ẕnnégake' chia',

na' benne' ka' žak ḻáže'gake' gótgake' neda' ba béngake' toze diža'.

11 Ẕnnágake': “Bzoa Dios ḻe' cheḻa'ale.

Le cho'o chejx̱enžo-ne' dan' bi zoa no benne' yeslé' ḻe'.”

12 Dios, bi so' zi'to' ga zoa' ni.

Dios chia', da ka' gaze gákḻeno' neda'.

13 Ben ga yedoé'egekle,

na' nítgekle benne' ka' ẕdíḻ-ḻengake' neda'.

Ben ga soagak ḻo yeḻa' sto',

na' chíx̱gekle benne' ka' žak ḻáže'gake' góngake' chia' da' ẕinnj,

14 san neda' wx̱én ḻáže'teza' Le', na' we ḻáwteza' Le'.

15 Wzenla' benne' ka' nako' chawe',

na' wzéntezela' ḻégake' kan besló' neda',

ḻa'kze bi nnezla' baḻ chi'i besló' neda'.

16 Wchaḻjkza' che da' ẕenḻe'e da' beno' Le', X̱ana' Dios,

na' wsá'a ḻáže'gak benne' ka' kan nakkzo' chawe'.

17 Dios, Le' bsedlo' neda' kate' ne naktia' bí'do'te.

Ẕḻoe'ela' benne' ka' ka nak da' ẕenḻe'e da' beno'.

18 Bi kwej yichjo' neda' kate' ba ngola', na' ba bgocha',

san be' neda' latje wzenla' ẕa'sóa' ka' ka nak yeḻa' wak chio',

na' wzenla' bi'do' ka' bi na' gáljgakbe' ka nak chio',

19 na' da' chawe' da' nako', da' naken ẕenḻe'e, Dios.

Le' beno' da' ka' zej nakḻe'en ẕen.

Dios, ¿noẕkze benne' nake' ka nako' Le'?

20 Le' beno' ga wdía' ḻo da' zan da' zede,

na' ḻo da' ka' bi žakgak chawe',

na' gono' ga yebana' neda',

na' yechiso' neda' ḻo yežw ba.

21 Gono' ga gakža' ẕen, na' yeyón ẕeno' neda'.

22 Neda' we ḻawkza' Le', na' chinna' da' žóḻ-ḻento'.

X̱ana' Dios, goḻkza' che da' likze chio' na' chinna' da' ka'.

Nako' Benne' La'y chegak benne' Israel ka'.

23 Soa' ḻo yeḻa' ba nez kate' goḻkza' chio' Le',

na' yebekzle be' da' nakkza' dan' beya'wo'.

24 Wcháḻjteza' che da' chawe' da' nako' dot ža, na' yele,

dan' beno' ga bedoé'egekle, na' bchíx̱gekle benne' ka' ben byéngake' góngake' neda' ẕia.

<- SALMOS 70SALMOS 72 ->