55
1 Bze nag, X̱ana' Dios, da' žḻiža' Le',
na' bi wzó' cheḻa'ale da' ẕnnabla' Le'.
2 Bebán ḻaže', na' bechebe chia'.
Žḻiža' Le' ḻo da' ẕnnia', na' že' zedla'.
3 Benne' bi ẕḻe'ele' neda' chawe' ẕnnie' chia',
na' bennen' bi nake' chawe' žon ditjle' neda'.
Žesbága'gake' neda' ẕia, na' ḻo yeḻa' ẕža'a chégake' ẕbia ḻáže'gake' neda'.
4 Že' zedle ḻáẕda'wa' ḻo beḻa' žen chia',
na' ẕchebe yeḻa' got neda'.
5 Ẕžébeḻi'a, na' žẕízeḻi'a,
na' žak chia' da' ẕcheben neda'.
6 Wnnía': “Chela' gonno' chia' x̱il ka' ka zej nak x̱il bsia,
tia' ḻo be'ze gan yezí' ḻaža'a.
7 Da' ḻi wẕonnja' zíto'le, na' soakza' ḻe'e latje dach.
8 Gon byena' bi be gon chia' be' bdone', na' be' waḻe.”
9 Bžia yi' benne' ka' bi zej nake' chawe', X̱ana' Dios.
Bchix̱ da' ẕnnágake', dan' ẕḻe'ela' da' ẕinnj, na' da' ẕia da' žóngake' ḻo yež nga.
10 Dot ža, na' yele žéchjgekle' yež.
Žóngake' da' ẕinnj, na' da' bi nak chawe' ḻo yež nga.
11 Nža' yež nga da' bi nak chawe' da' žóngake'.
Žóntezgake' da' wen ḻaže', na' da' ẕinnj ḻo nez chen.
12 Chela' gok no benne' bi ẕḻe'ele' neda' chawe', bennen' bene' neda' ẕia, na' bzoelan'.
Chela' gok benne' ẕže'e neda', bennen' bdíḻ-ḻene' neda' na' bkache' kwina' ḻawe' ḻe',
13 san le' benkzon', na' goko' ka to bi' lježa'.
Wẕí' ḻo no'o neda', na' goko' toze ḻen neda'.
14 Tẕen bchaḻjžo dot ḻáže'žo, na' ḻo yeḻa' ži'i ḻaže' wdažo ḻo liž Dios.
15 Dios, ben ga sen yeḻa' got benne' ka' choḻze, benne' ka' bi zej nake' chawe'.
Ben ga chó'ogake' ḻo yi' gabíl kate' ne zóagake' nbángake'.
Nža'gak lížgake' da' bi nak chawe' da' žóngake'.
16 San ka nak chia' neda', bḻiža' Dios,
na' X̱ana' Dios beslé' neda'.
17 Zildo', na' wawbíž, na' kate' žen wbíž ẕcháḻjḻena' Dios.
Žḻiža' Ḻe', na' Ḻe' ženle' chia'.
18 Yeya'we' be' da' nakkza' ḻo na'gak benne' ka' ẕdíḻ-lengake' neda',
na' gone' ga kweza' chawe',
ḻa'kze zej nnita' benne' zante, benne' bi ẕḻé'egekle' neda' chawe'.
19 Dios nake' Bennen' zóateze', na' ẕnna biá'teze'.
Nake' chawe', na' wžía yi'e benne' ka'.
Ki gone' chégake' dan' bi žsángake' da' žóngake', na' bi ẕžébegake' Dios.
20 Benne' wen da' ẕinnj ka' ẕdíḻ-ḻengake' benne' ka' ẕgá'nḻengake' ḻégake' chawe'.
Ẕží'igake' che diža' da' bénḻengake' benne' ka'.
21 Da' ẕcháḻjgake' naken diža' cháwe'do', san yo'o yichj ḻáẕdo'gake' yeḻa' ẕža'a.
Žóngake' x̱tanḻe'e diža' da' ẕcháḻjgake', san naken ka to ya ntoche'.
22 Bde ywa' chio' x̱kože' X̱anžon' na' Ḻe' gon choche' le'.
Batkle we'e latje chejchegw benne' chawen' to chi'ize.
23 San Le', Dios, gono' ga cho'ogak benne' wen da' ẕinnj ka',
na' benne' wet benách ka', na' benne' wen ḻaže' ka', ḻo yi' gabíl,
kate' bi na' góngake' gachj yiz ka' da' yéla'gake',