32
1 Ba nez ẕen naken che bennen' Dios ba benít ḻawe' x̱toḻe'e,
na' ba beké'e da' ẕinnj da' wbage'e.
2 Ba nez ẕen naken che bennen' Dios bi žesbage'e ḻe' ẕia, bennen' bi ẕcache'e x̱toḻe'e.
3 Kate' bi na' yex̱óalapa' doḻa' da' wbaga'a,
bedó ḻaža'a dan' wžeža' dot ža.
4 Ḻawe' ža, na' yele bsako'o neda', X̱ana' Dios.
Bedó ḻaža'a ka žebiže bej nis byo' wbá ka'.
5 Naž bex̱óalapa' doḻa' chia', na' bi bkacha'a da' ẕinnj dan' bena'.
Bechóg ḻaža'a bex̱óalapan' ḻawo' Le', X̱ana' Dios,
na' benít ḻawo'o Le' che x̱toḻa'a.
6 Che ḻen yógo'te benne' chio' ka' žaḻa' wḻížgake' Le' kate' ne zo' yenlo' chégake',
na' kate' žin da' wžía yin' benách ka',
dan' gaken ka to yegw nis ẕen da' bgóleḻe'en,
bi be gonen chegak benne' chio' ka'.
7 Le' nako' ka to latje gan gak wkache' kwina',
na' wkache' chawo'o neda' gan bi be wsakan' benách chio' ka'.
Goḻkza' zižje ka besló' neda' dan' žox̱o' neda'.
8 Ẕnna X̱anžon': “Wḻoe'ela' le' nez gan žaḻa' tio'.
Wsedla' le', na' wzejni'ila' le' da' žaḻa' gono'.
9 Bi gako' ka to bžina' o to burrw, bia ka' bi žejní'igeklba',
bia ka' žon byenen nna biá'gako'-ba', na' ko'o ya žoá'agakba' nich góngakba' ka žénelo' le'.”
10 Benne' ka' bi zej nake' chawe' žon byenen tégake' ḻo da' sáka'gake',
san benne' ka' žx̱en ḻáže'gake' X̱anžon',
Ḻe' žape chi'e ḻégake' ḻo yeḻa' ži'i ḻaže' chie'.
11 Ḻe'e, benne' chawe' ka', le yebele
na' le soa ḻo yeḻa' ba nez, dan' gokḻen X̱anžon' ḻe'e.