1 Bchi'a ḻaže' neda', X̱ana' Dios, dan' bena' da' naken chawe'.

Bx̱en ḻaža'a Le', X̱ana' Dios, na' bi gok chop ḻaža'a.

2 Bwíakze ḻáẕda'wa', X̱ana' Dios, na' bwia dan' bena'.

Bwíakze da' yo'on yichj ḻáẕda'wa'

3 dan' žákbe'ela' žeyache' ḻáže'lo' neda',

na' žona' ka nak da' naken dot da' li chio'.

4 Bi na' gona' tẕen benne' ka' žóngake' da' chawe' ḻáwzele.

Bi na' gona' toze benne' ka' ẕḻoé'ezele chawe' kwíngake'.

5 Bi ẕḻe'ela' chawe' latje gan ẕdobgak benne' ka' bi zej nake' chawe',

na' bi žoa'a tẕen ḻen benne' ka' žóngake' da' ẕia.

6 Ẕḻe'elo' bi be ẕia nbaga'a,

na' wak biga'a ḻo bkog la'y chio', X̱ana' Dios,

7 gan goḻa' da' ka' we ḻawa'a Le',

na' wzenla' benách ka' ka nak da' ẕen da' beno'.

8 X̱ana' Dios, nži'ila' ližo' gan zo',

na' latje la'y gan nḻa' ḻaw yeḻa' ẕen chio'.

9 Bi wžía yi'o neda' tẕen ḻen benne' doḻa' ka',

na' bi wdío' neda' tẕen ḻen benne' wetw benách ka',

10 benne' ka' žóngake' da' bi naken chawe',

na' ẕnéẕjwtezegake' mežw nich bi wchi'a ḻaže' no benne' da' ẕinnj da' béngake',

11 san neda' gónteza' da' nak ḻi ḻaže'.

Beslá neda', na' beyache' ḻaže'l neda'.

12 Dan' bénteza' da' nak chawe',

na' wká'n ẕenkza' Le', X̱ana' Dios, ḻawgak benne' ka' zej ndobe' ḻawo' Le'.

<- SALMOS 25SALMOS 27 ->